1 Mɔɔ mekɛ guale nu bie la, ɔziale ɔrale Kapɛnayɛm bieko, na bɛdele ye nganeɛ ndɛndɛ ne ala wɔ sua ne azo amuala. 2 Yeangyɛ biala, nyɛvolɛ yile aako ne mɔɔ ɔwɔ nuhua la fetee zɛhae mɔɔ adenle biala bɔbɔ ɛnla ɛkɛ ne ɛmmaa sonla ko bɔbɔ wɔ alie nwo nehane a. Na ɔhanle Edwɛkpa ne ɔhilele bɛ. 3 Na mgbavolɛ nna mɔɔ bɛzo nrenyia bie mɔɔ ɛdwudwe wɔ ahomanga nu la noko rale ɛkɛ ne bie. 4 Na ɔlua menli dɔɔnwo ne ati bɛangola ɛlɛka mɔɔ Gyisɛse wɔ la dwu, ɛhye ati bɛkpale sua ne azo ezumule ne foa ko na bɛdwulale ye nee ɛkpa ne amuala aze wɔ sua ne anu.

5 Na mɔɔ Gyisɛse nwunle bɛ diedi kpole ne wɔ ye nu kɛ ɔbahola yeaboa bɛ la, ɔzele wuliravolɛ ne kɛ, "Me ra, bɛva wɔ ɛtane amuala bɛhye wɔ!"

6 Na Dwuuma asɔne mgbanyima mɔɔ wɔ ɛkɛ ne na bɛdele la zele bɛ nwo kɛ: 7 "Ɛnee nwane bɔbɔ a ɛlɛka ɛhye a? Munzule edwɛkɛ a le ɛhye! Anzɛɛ ɔdwenle kɛ ɔle Nyamenle ɔ? Ɔluakɛ, Nyamenle angomekye ala a kola fa ɛtane kyɛ a."

8 Mɔɔ Gyisɛse ndɛndɛ ne ala nwunle mɔɔ wɔ bɛ adwenle nu la, ɔzele bɛ kɛ, "Duzu ati a ɛhye fale bɛ nwo a? 9-11 Mame, Ngoanedievolɛ ne, melɛ tumi kɛ mefa ɛtane mekyɛ wɔ azɛlɛ ye azo. Na emomu mebiza bɛ kɛ, boni yɛɛ ye hanle ɛnye se a, kɛ ɛkɛze wuliravolɛ ne kɛ, bɛva wɔ ɛtane bɛhyɛ wɔ anzɛɛ dwazo fa wɔ ɛkpa na tia? Na kɛ ɔkɛyɛ na bɛanwu kɛ Ngoanedievolɛ ne lɛ tumi fa ɛtane kyɛ la," akee mese wɔmɔ wuliravolɛ ɛhye kɛ, "Dwazo maa wɔ ɛkpa ne zo na kɔ sua nu, ɔluakɛ ɛ nwo ɛza!"

12 Na amgba noko ɔdwazole foa, na ɔmaanle ye ɛkpa ne zo ɛkɛ ne ala na ɔvale menli dɔɔnwo ne avinli ɔdiale kilikili ɔhɔle sua nu! Ɛhye zinle bɛ nwo totohyia, yemɔti bɛhanvole Awulae Nana Nyamenle na bɛzele kɛ, "Yɛtɛnwunle debie mɔɔ le kɛ ɛhye la bie ɛlɛ!"

13 Na Gyisɛse vindele hɔle ɛnweazo lɔ bieko, na ɔhanle edwɛkpa ne ɔhilele menli dɔɔnwo ne mɔɔ eza rabɔle yiale ye la. 14 Na mɔɔ ɔlua ɛnwea ne azo ɔlɛkɔ la, ɔnwunle Livae, mɔɔ ɔ ze a le Alefiyɛse la kɛ ɔde ye adwule ɛkponle nwo. Gyisɛse zele ye kɛ, "Bɛla maa yɛhɔ. Bayɛ me ɛdoavolɛ." Na amgba noko, Livae nyianle ahomeka na ɔdoale Gyisɛse ɔ nee ye hɔle.

15 Kenle ko ne ye nɔsolɛ ne, Livae dole ɛkponle, na ɔdole ɔ sa ɔvɛlɛle ɔ gɔnwo mɔ adwuledievolɛma nee ɛtanevolɛma dɔɔnwo wɔ ɔ bo amaa bɛahola bɛayia Gyisɛse nee ye ɛdoavolɛma ne mɔ. 16 Na mɔɔ Dwuuma asɔne mgbanyima ne mɔ nee kɛlɛhɛvolɛma ne mɔ mɔɔ doale Gyisɛse hɔle ɛkɛ ne bie la nwunle kɛ ɔ nee zɛhae menli ne mɔ ɛlɛto ɛsalɛ la, bɛbizale ye ɛdoavolɛma ne mɔ kɛ, "Duzu ati a ɔ nee ɛtanevolɛma to ɛsalɛ ko a?"

17 Na mɔɔ Gyisɛse dele mɔɔ bɛlɛka la ɔzele bɛ kɛ, "Bɛnwu sonla mɔɔ ɔte kpɔkɛ na ɔlɛkɔ ayileyɛlɛ la ɔ? Tɛ tenlenema ati a membale a; na ɛtanevolɛma ati ɔ."

18 Dwɔn ɛdoavolɛma ne nee Dwuuma mgbanyima ne ɔyɛ a kye ɛhɔne. Ɛhye ati bɛrabizale Gyisɛse kɛ, "Duzu ati a yɛmɛ yɛkye ɛhɔne na wɔ ɛdoavolɛma ne mɔ ɛngye bie a?"

19 Na Gyisɛse zele bɛ kɛ, "Asoo menli mɔɔ wɔ atɔfolɛ bo la bahola ahye ɛhɔne ɔ? Ɔwɔ kɛ bɛdi nyane wɔ melɛ ala mɔɔ atɔfolɛ kunli ne nee bɛ wɔ ɛkɛ la ɔ? 20 Na emomu, mekɛ bie bara mɔɔ bɛbaye atɔfolɛ nrenyia ne bɛavi ɛkɛ a, na zɔhane mekɛ ne a bɛdabɛ noko bɛbali bɛ nyane deɛ ne a. 21 Yɛɛ bɛnva ɛdanlɛ fofolɛ noko bɛnda mɔɔ ɛvo la anu! Ɛyɛ ɛhye a akee ɔmaa tokule ne tukue haanwu zɛ. 22 Zɔhane ala noko yɛɛ bɛnva nza fofolɛ bɛngua nwoma toba dɛba nu a. Ɛyɛ zɛhae a nwoma toba ne kpuke na nza ne yɛ mgbane. Ɛhye ati a nza fofolɛ biala, nwoma toba fofolɛ nu a bɛgua ye la."

23 Melɛ bie, wɔ Ɛnwomenlelielɛ Kenle ne anu ɛnee Gyisɛse nee ye ɛdoavolɛma ne mɔ lua ɛya bie anu. Na ɛnee ɛdoavolɛma ne mɔ ɛlɛbubu atoko adile, na eza bɛlɛdi ye ma ne bie noko.

24 Dwuuma asɔne mgbanyima ne mɔ bie zele Gyisɛse kɛ, "Ɔnle kɛ bɛyɛ zɔhane! Ɔluakɛ, ɔtia yɛ mɛla kɛ bɛkɛyɛ gyima bɛkɛbu aleɛ wɔ Ɛnwomenlelielɛ Kenle ne."

25,26 Na Gyisɛse zele bɛ kɛ, "Bɛtɛkengale mɔɔ Belemgbunli Devidi yɛle la anzɛɛ? Mekɛ bie mɔɔ ɛhɔne hunle ɔdaye nee ɔ nwo amra la, yeangɔ Awulae Nyamenle asɔne sua ne anu, wɔ Sɛlɛvolɛ Kpanyinli Abayata mekɛ zo yeangɔnli kpanwo nwuanzanwuanza ne mɔɔ azelɛvolɛ ne mɔ ala a bɛmaa bɛ adenle bɛmaa bɛdi la ɔ? Na ɛhye noko ɛnee tia mɛla ne." 27 Akee ɔzele bɛ kɛ, "Ɛnwomenlelielɛ Kenle ne wɔ ɛkɛ maa sonla boɛyɛlɛ, na tɛ sonla a wɔ ɛkɛ ne maa Ɛnwomenlelielɛ Kenle ne a. 28 Na Mame, Ngoanedievolɛ ne a melɛ tumi bɔbɔ kɛ ɔwɔ kɛ, mekile deɛ mɔɔ ɔwɔ kɛ sonla yɛ ye wɔ Ɛnwomenlelielɛ Kenle ne la a."