1,2 Mekɛ mɔɔ bɛdwule aze wɔ azule tandane ne anzi nehane la, nrenyia bie mɔɔ bozonle ɛva ye la vi azie ne azo nriandinle rale wɔ melɛ mɔɔ ɛnee bɔ zo mɔɔ Gyisɛse ɛlɛdwu file zo la.

3,4 Nrenyia ɛhye de sɛka-awolɛ ne mɔ avinli, na ɔlua ye anwosesebɛ ti saa bɛgua ye nwɔnzɔnwɔnzɔ biala a ɛnee yetete nu yelie ɔ nwo yehɔ. Awie biala noko ɛngola ɛngye ye ɛmbɔ ye kpanwu. 5 Alehyenlɛ nee aledwolɛ muala ɔkpɔsa azɛka ne mɔ azo na ɔteɛdea nu ɔkpɔsa awoka ne mɔ azo, na ɔfa awole ne mɔ mɔɔ bɛ nloa yɛ nla la bie ɔpepɛ ɔ nwo nane.

6 Mɔɔ Gyisɛse tɛbɔ azule tandane ne anye bɔbɔ la, yɛɛ nrenyia ne nwunle ye a, ɔti ɔvale ɛnriandinlɛ ɔrapɛle ɔfinle Gyisɛse anyunlu ɛkɛ ne.

7,8 Na Gyisɛse zele bozonle ne mɔɔ wɔ ye nu la kɛ, "Ɛvi ye nu finde, wɔmɔ sunsum evinli." Ɔvale ɛnelɛ ɛzulolɛ bie ɔkponlenle ɔ bo kɛ, "Gyisɛse, Anwuma Nyamenle Bedevinli ne Ara, duzu a ɛbava wɔayɛ me a? Ɔlua Awulae ati, mmasɛkye me!"

9 Gyisɛse bizale ye kɛ, "Na kɛ bɛfɛlɛ wɔ ɛ?" Sunsum evinli ne buale ye kɛ, "Ɛlɔne, anzɛɛ Ɛdodo, ɔluakɛ yɛzonle a yewɔ nrenyia ɛhye nu a."

10 Na akee sunsum evinli anzɛɛ awozonle ne mɔ bodole ye fane dɔɔnwo ne ala kɛ ɔmmafoa bɛ ɔmaa bɛkɔ moa.

11 Ɛnee agbolike kpolane bie luolua boka ne azo wɔ azule tandane ne anloa. 12 Ɔti awozonle ne mɔ bodole ye kɛ, "Maa yɛhɔwole agbolike ne mɔ nu."

13 Gyisɛse noko maanle bɛ adenle. Na awozonle ne mɔ vile nrenyia ne nu vindele, na bɛhɔwolole agbolike ne mɔ nu, na akee bɛ muala bɛdule twi, bɛvile kpomgbonloma ne azo bɛhɔguale azule tandane ne anu na bɛnlomanle bɔkɔɔ.

14 Agbolikeneavolɛma ne mɔ nriandinle hɔle namunamu mɔɔ zuozua ɛkɛ ne la azo, na bɛhanle mɔɔ ɛzi la amuala. Awie biala pelele rale kɛ ɔbanlea ye ɔdaye ɔ nye zo. 15 Na yeangyɛ biala yɛɛ menli ekpunli dɔɔnwo bie rayiale ɛleka mɔɔ Gyisɛse wɔ la a; na mɔɔ amgba ala bɛnwunle kɛ nrenyia ne anye zo ɛtete ye bɔkɔɔ, na ɔheda ɛdanlɛ ɔde ɛkɛ la, bɛ ahonle dule kpole kpalɛ. 16 Bɛdabɛ mɔɔ bɛnwunle mɔɔ ɛzi la hanle hilele bɛ gɔnwo mɔ, 17 na akee menli ekpunli dɔɔnwo ne bodole Gyisɛse kɛ ɔvi bɛ nwo ɛkɛ ne ɔhɔ. 18 Ɔti ɔhɔvole ɛlɛne ne anu bieko. Na nrenyia ne mɔɔ bozonle ne vale ye la zɛlɛle Gyisɛse kɛ ɔmaa ɔ nee ye ɛhɔ. 19 Noko akee Gyisɛse amkponle ɛhye azo.

Ɔzele ye kɛ, "Kɔ sua nu na kɔha mɔɔ Nana Nyamenle ɛyɛ ɛmaa wɔ la nee Ye nwanwane ninyɛne ne amuala kile ɛ gɔnwo mɔ; ɔ nee anwunvɔne mɔɔ yeze yemaa wɔ la."

20 Ɔti nrenyia ne hɔle Azua Bulu ne mɔ azo wɔ maanzinli ne anu, na ɔbɔle ɔ bo kɛ ɔka mɔɔ Gyisɛse ɛyɛ ɛmaa ye la ɔkile awie biala; na ye edwɛkɛ ne zinle awie biala anwo.

21 Mɔɔ Gyisɛse vole ɛlɛne nu dwule azule tandane ne anzi lɔ la, menli ekpunli dɔɔnwo bie rabɔyiale ye wɔ ɛnwea ne azo.

22 Na Gyeeyaelɛse, mɔɔ nea ɛkɛ ne asɔne ne azo la rahotole Gyisɛse, 23 na ɔbodole ye kɛ ɔrayɛ ɔ ra raalɛ ekyi bie ayile. Ɔvale abodelɛ ɔzele kɛ, "Ɔka ekyii ɔwu. Mesɛlɛ wɔ, bɛla bava ɛ sa mgbane bɔbɔ gua ɔ nwo zo maa ɔnyia ngoane."

24 Gyisɛse nee ye hɔle, na menli dɔɔnwo ne noko doale bɛ. 25 Na raalɛ bie wɔ menli ne anu mɔɔ mogya ɛdu ye dedee ɛvolɛ bulu nee nwiɔ a. 26 Yenwu amaneɛ wɔ dɔketama nee ninsivolɛma dɔɔnwo asa anu, na yezɛkye ye ezukoa kpokpoti, ɔlua zo yeyɛ ehyianli noko akee ɔ nwo anza ekyi bɔbɔ, ye ewule ne dɛlale dɛba ne. 27 Yede Gyisɛse nwanwanendeɛ ne mɔɔ yeyɛ la nganeɛ, na ɔlua ɛhye noko ati ɔwolole menli ɛwolaa ne anu dedee ɔrazɔle ye tɛladeɛ ne anu.

28 Ɔhanle ye ɔ ti anu kɛ, "Saa mesɔ ye tɛladeɛ ne anu mgbane bɔbɔ a, me nwo baza." 29 Na amgba noko ɔzɔle ye nu ala la, mogya ne mɔɔ tu ye la pɛle, na ɔdele ye wɔ ye nu kɛ ɔ nwo ɛza bɔbɔ!

30 Na ɛkɛ ne ala Gyisɛse nwunle kɛ ye ayileyɛlɛ tumi ne ɛvi ye nu; ɔti ɔdole ɔ nye wɔ menli dɔɔnwo ne anu, na ɔbizale kɛ, "Nwane a zɔle me tɛladeɛ ne anu a?"

31 Na ye ɛdoavolɛma ne mɔ buale ye zele kɛ, "Ɛdawɔ ɛnea menli dɔɔnwo ɛhye mɔɔ doa wɔ la a, kɛ ɔsi mɔɔ akee ɛbiza kɛ, nwane a zɔle wɔ a?"

32 Gyisɛse noko totole ɔ nye kɛ saa ɔkɛnwu ahenle mɔɔ zɔle ye la wɔ menli ne anu a. 33 Na mɔɔ ɔtoto ɔ nye la, raalɛ ne vale ɛzulolɛ nee ahonledulɛ rahotole ɔ gyakɛ abo ɛkɛ, na ɔhanle mɔɔ yeyɛ la amuala ɔhilele Gyisɛse 34 Na Gyisɛse zele ye kɛ, "Ralɛ raalɛ, wɔ diedi ɛmaa wɔde kpɔkɛ; kɔ anzondwolɛ nu, na ɛ nwo ɛza bɔkɔɔ."

35 Na mɔɔ ɔ nloa wɔ zo ɔtendɛ ɔkile ye la, ezuavolɛ bie vi Gyeeyaelɛse sua nu vale nrɛlaleɛ rale kɛ yekpa nwole, ɔ ra raalɛ ne ɛwu dɛbadɛba, na sɛkɛlɛneɛ biala noko ɛngile kɛ Gyisɛse ɛlɛba kɛkala bɔbɔ. 36 Na Gyisɛse anva bɛ ngehanleɛ ne mɔ anyɛ edwɛkɛ, na ɔzele Gyeeyaelɛse kɛ, "Mmasulo! Wɔmɔ nyia diedi wɔ me nu."

37 Akee Gyisɛse gyinlanle menli dɔɔnwo ne amuala; na ɔhale Pita, Gyemise, nee Dwɔn ala mɔɔ ɔ nee bɛ hɔle Gyeeyaelɛse sua nu a. 38 Mɔɔ bɛdwule sua nu la, Gyisɛse nwule kɛ ɛkɛ ne ɛzoa begyebegye zɛhae ala, na ɛzunlɛ nee awolɛyelɛ noko gyi zo wuluwulu zɛhae. 39 Ɔwolole sua ne anu na ɔdendɛle ɔhilele menli ne mɔ kɛ,

"Na ɛzunlɛ nee awolɛyelɛ nee dede ɛhye mɔ abo a le boni? Kakula ne ɛtɛwule; yela ala!"

40 Menli ne mɔ zelele ye na bɛzile ye amgbu, na yemɔ ɔmaanle awie biala vindele, na ɔ nee kakula ne ɔ ze nee ɔ nli nee ɔdaye ye ɛdoavolema nsa ne mɔ bɛhɔle ekpumgbunli ne mɔɔ kakula ne la nu la anu.

41,42 Ɔzɔle kakula raalɛ ne asa na ɔzele ye kɛ, "Talita Kumi," ye ngilenu a le kɛ, "Kakula raalɛ, dwazo!" Ɛnee yeli ɛvolɛ bulu nee nwiɔ ala. Na ɛkɛ ne ala ɔwulule ɔgyinlanle na ɔdiediale! Na ye awovolɛma ne mɔ angola nwolɛ didi bɔbɔ. 43 Akee Gyisɛse bɔle bɛ kɔkɔ ɛsesebɛ ɛsesebɛ kɛ, bɛmmaka mɔɔ ɛzi la bɛkile awie biala, na nzinlii ɔzele bɛ kɛ bɛmaa kakula raalɛ ne debie bɛmaa ɔli.