1 Akee Gyisɛse vile Kapɛnayɛm na ɔhɔle Dwudiya nyiakɛ wɔ Dwudiya ɛweɛne ne azo mɔɔ ɔdi ɔkɔ Azule Dwɔdan sɛnzɛnduduleɛ afoa nu la. Na eza menli dɔɔnwo ne rale; na kɛmɔ dahuu ɔyɛ ye ala la, ɔhɔle zo ɔhilele bɛ debie.

2 Na Dwuuma Anwodelɛ Eku ne anzɛɛ Falasiima bie mɔ rabizale ye kɛ, "Ɛmaa ewuolebɔlɛ nwo adenle ɔ?" Nɔhalɛ, ɛnee bɛkpondɛ kɛ bɛsɔ ye bɛnea ala.

3 Gyisɛse bizale bɛ kɛ, "Duzu edwɛkɛ a Mosisi hanle wɔ ewuolebɔlɛ nwo a?"

4 Bɛbuale ye kɛ, "Mosisi zele kɛ bɛmaa nwolɛ adenle. Na emomu mɔɔ hyia mɔɔ ɔwɔ kɛ nrenyia ne yɛ la a le kɛ ɔkɛlɛ kɛlata ɔmaa ɔ ye ne kɛ yebɔ ye ewuole."

5 Gyisɛse bizale kɛ, "Na duzu ati a ɔhanle zɔhane a? Mebaha deɛ mɔɔ ɔti ɔhanle ɛhye la meahile bɛ, na yemɔ a le kɛ, ɔlua bɛ ahonle ɛsesebɛ nee bɛ atisesebɛ ne mɔ ati ɔ. 6,7 Na tɛ ɛhye noko a le Nana Nyamenle adenle fɔɔnwo ne a. Ɔluakɛ, mɔlebɛbo ne ala yɛɛ ɔbɔle nrenyia nee raalɛ kɛ ɔwɔ kɛ bɛbɔ nu wɔ agyalɛ mɔɔ ɛngu ɛlɛ la anu a; ɛhye ati a nrenyia gyakyi ɔ ze nee ɔ nli, 8 na ɔ nee ɔ ye bɛbɔ nu mɔɔ ɛnee bɛnle nwiɔ bieko, na bɛle nwonane ko ala la. 9 Yɛɛ dasanli biala noko ɛnlɛ adenle kɛ ɔkɛkpakye mɔɔ Nana Nyamenle ɔdaye yeha yebɔ nu la anu."

10 Nzinlii, mɔɔ ɔ nee ye ɛdoavolɛma ne mɔ angome hale sua nu la, bɛvale adwenle nzuzulɛ ɛhye bɛrale bieko.

11 Na ɔzele bɛ kɛ, "Saa nrenyia bɔ ɔ ye ewuole na ɔkɔgya raalɛ fofolɛ a, ɛnee yedo agyalɛ mɛla yetia ye. 12 Yɛɛ saa raalɛ noko gyakyi ɔ hu kɔ agyalɛ fofolɛ a, ɔdaye noko ɔto agyalɛ mɛla ne zɔhane ala."

13 Kenle ko bie mrɛladane bie mɔ nee bɛ mra rale kɛ bɛmaa Gyisɛse ayila bɛ, na ye ɛdoavolɛma ne mɔ voanle bɛ, na bɛzele bɛ kɛ bɛmmagyegye ye.

14 Na mɔɔ Gyisɛse nwunle mɔɔ ɛlɛsi la, yeangulo ye ɛdoavolɛma ne mɔ nyɛleɛ zɔhane, ɔti ɔvale bɛ nwo ɛya na ɔzele bɛ kɛ, "Bɛmaa ngakula ne mɔ ɛrɛla, ɔluakɛ, ɛhye mɔ zɛhae a Anwuma belemgbunli maanle ne le bɛ deɛ a. Bɛmmafoa bɛ fee! 15 Akee meka meahile bɛ anyebololɛ nu kɛ awie biala mɔɔ amba Nana Nyamenle ɛkɛ ne kɛ kakula ekyi la bɛnrɛmaa ye adenle wɔ Nyamenle belemgbunli maanle ne anu ɛkɛ ne ɛlɛ."

16 Akee ɔvale ngakula ne mɔ ɔziele avinli na ɔvale ɔ sa ɔguale bɛ ti zo na ɔyilale bɛ.

17 Na mekɛ mɔɔ ɔsiezie ɔ nwo yeadu adenle bie la, nrenyia bie lɛ ɛnriandinlɛ rahotole ye zele kɛ, "Kilehilevolɛ kpalɛ, duzu a ɔwɔ kɛ meyɛ na meanyia Anwuma belemgbunli maanle ne anu meahɔ a?"

18 Na Gyisɛse bizale ye kɛ, "Duzu ati a ɛfɛlɛ me kpalɛ a? Nana Nyamenle angomekye a le kpalɛ bɔkɔɔ a! 19 Na wɔ kpuyia deɛ ne, yemɔ ɛdawɔ ɛze mɛla ne mɔ dɛba: Mmaku sonla; mmasɛkye agyalɛ; mmawua debie: mmadi daselɛ adalɛ; mmasisi awie; di ɛ ze nee ɛ nli eni"

20 Nrenyia ne buale Gyisɛse kɛ, "Kilehilevolɛ, meli ɛhye mɔ amuala azo sumunli me ngakula nu; metɛfonle nyɛleɛ ɛhye mɔ anu ko bɔbɔ."

21 Gyisɛse nleanle ye koonwu, na ɔhulole ye edwɛkɛ totohyia. Na akee ɔzele ye kɛ, "Emomu yeha wɔ debie ko ala; kɔ kɔdɔne mɔɔ ɛlɛ ye biala la amuala na fa ezukoa ne kyɛ ehyiavolɛma na ɛbanyia agyapadeɛ wɔ Anwuma belemgbunli maanle ne anu, na akee sia bɛla na bali me nzi."

22 Akee nrenyia ne anyunlu hakyile, na ɔvale alɔbɔlɛ ɔhɔle, ɔluakɛ, ɛnee ɔle sukoavolɛ bedevinli kpalɛ.

23 Gyisɛse nwunle kɛ ɔlɛkɔ la ɔnleanle ye koonwu, na ɔzele ye ɛdoavolɛma ne mɔ kɛ, "Ɔyɛ se kpalɛ kpalɛ ɔmaa sukoavolɛ biala kɛ ɔkɛhola Anwuma belemgbunli maanle ne anu kɔ a!"

24 Ɛhye zinle bɛ nwo totohyia. Ɔti Gyisɛse zile zo bieko kɛ, "Mediema alɔvolɛ, ɔyɛ se ɔmaa sukoavolɛma mɔɔ arɛle wɔ agyapadeɛ nu la kɛ bɛkɛhɔ Anwuma belemgbunli maanle ne anu a. 25 Ɔnyɛ se ɔmmaa afunlumu kɛ ɔkɛwolo aguyia tokule nu tɛla kɛ sukoavolɛ kɛhɔ Nyamenle belemgbunli maanle ne anu a."

26 Ɛdoavolɛma ne mɔ anlie ɛhye anli! Na bɛbizale kɛ: "Saa tɛ sukoavolɛ a, ɛnee akee nwane bɔbɔ a bɛkola bɛdie ye ngoane wɔ ewiade anu a?"

27 Gyisɛse nleanle bɛ koonwu, na akee ɔzele kɛ, "Ɛhye ɛnza Nana Nyamenle yɛ. Ɔluakɛ, debie biala ɛnye se ɛmmaa Nyamenle."

28 Pita zele kɛ, "Na yɛdayɛ noko mɔɔ yɛkpo debie biala na yɛra kɛ yɛbali ɛ nzi la, duzu a yɛbanyia ye a?"

29 Na Gyisɛse buale kɛ, "Mese bɛ nɔhalɛ nu kɛ awie biala ɛnle ɛke mɔɔ yekpo ninyɛne muala ɛlɛ a, aako aako, mediema mrenyia nee mraalɛ, ninli, selɛ, mralɛ, anzɛɛ agyapadeɛ, wɔ me ɛhulolɛ ti na yeha Edwɛkpa ne yehile awie mɔ, 30 na ɔnrɛnyia ye mɔnwo ɛya ɛya ɔnrɛdɛla aako aako, mediema mrenyia, nee mraalɛ, ninli, mralɛ nee azɛlɛ, nee nwolɛ manzonlehwenlɛ a!

"Ɛhye mɔ amuala bayɛ yɛ deɛ wɔ azɛlɛ ye azo, na wɔ ewiade ne mɔɔ bara la anu, ɔbanyia ngoane mɔɔ ɔnle awieleɛ a. 31 Na emomu menli dɔɔnwo mɔɔ kɛkala bɛdwenle kɛ bɛ nwo hyia somaa somaa la anwo ɛnrɛhyia bieko; yɛɛ dɔɔnwo noko mɔɔ ɛnlɛ anyunlunyia ɛnɛ la, banyia anyunlunyia wɔ ɛkɛ ne."

32 Na mɔɔ bɛzile nu kɛ bɛkɔ Gyɛlusalɛm la, Gyisɛse lumuale bɛ nyunlu; yɛɛ ye ɛdoavolɛma ne mɔ noko lile ɔ nzi; na ɛzulolɛ hanle bɛ kpole. Ɔti Gyisɛse hwenle bɛ hɔle ahanle, na ɔbɔle ɔ bo kɛ ɔka deɛ mɔɔ saa bɛdwu Gyɛlusalɛm a ɔbazi ɔ nwo zo la amuala yeahile bɛ.

33 Ɔzele bɛ kɛ, "Saa yɛdwu ɛkɛ ne a, bɛbahye Mame, Sonla Ra ne, na bɛ nee me ahɔ azɛlɛvolɛ mgbanyinli ne mɔ nee Dwuuma mgbanyima ne mɔ ɛkɛ na bɛmɛ a bɛbabua me mgbɔvodɛne kɛ ɔwɔ kɛ mewu, na bɛaye me bɛamaa Wulomuma ne kɛ bɛhu me a. 34 Bɛbazi me amgbu, bɛatoto nyɛlɛ me nwo, na eza bɛabila me empele na akee bɛahu me; na ye kenle nsa ne azo, eza mebadwazo meara ngoane nu bieko."

35 Akee Gyemise nee Dwɔn, mɔɔ bɛ ze a le Zɛbɛdi la, rale ɔ nwo ɛkɛ ne. Na bɛzele ye bɛtɛɛ kɛ, "Yɛmenle, yɛkpondɛ kɛ ɛyɛ ahunlunyele debie ekyii ɛmaa yɛ."

36 Gyisɛse bizale bɛ kɛ, "Duzu debie ɔ?"

37 Bɛzele ye kɛ, "Yɛkulo kɛ yɛtɛnla ɛ nwo ɛkɛ ne wɔ wɔ belemgbunli maanle ne anu, mɔɔ ko badɛnla ɛ sa fema zo, na ko noko adɛnla wɔ bɛne zo a!"

38 Na Gyisɛse buale bɛ kɛ, "Bɛnze mɔɔ bɛlɛbiza la! Asoo bɛbahola bɛanlo bɔnyema kɔpo ne mɔɔ ɔwɔ kɛ meno nu la anu ɔ? Anzɛɛ nyane ɛzɔnenlɛ ne mɔɔ bɛbava bɛazɔne me la, bɛbahola ɔ nloa gyinla ɔ?"

39 Bɛbuale ye kɛ, "Ɛhɛe, yɛbahola!"

Na Gyisɛse zele kɛ, "Nɔhalɛ nu, bɛbahola bɛanlo bɔnyema kɔpo ne anu na eza bɛazɔne bɛ wɔ nyane adenle ne anu, 40 na emomu menlɛ tumi biala kɛ menwɔva bɛ menwɔzie arelemgbunli mbia mɔɔ tɛla me deɛ ne la azo. Bɛhyehyɛ gyinlabelɛ ɛhye mɔ amuala kosooti dɛbadɛba."

41 Mɔɔ ɛdoavolɛma ne mɔɔ ɛha la dele mɔɔ Gyemise nee Dwɔn ɛbiza la, bɛvale bɛ nwo ɛya totohyia. 42 Ɔti Gyisɛse vɛlɛle bɛ na ɔzele bɛ kɛ, "Kɛmɔ bɛdabɛ mumua ne bɛze ye dɛba la, ewiade anu arelemgbunli nee menli mgbole mgbole ne mɔ tɛnla bɛ ezuavolɛ akɔme zo boo dahuu; 43 na wɔ bɛ afoa nu ɛdeɛ, ngakyile wɔ nuhua. Bɛ nuhua biala mɔɔ kulo kɛ ɔyɛ kpole wɔ bɛ avinli la ɔwɔ kɛ yɛ bɛ sonvolɛ. 44 Yɛɛ mɔɔ kpondɛ kpole kpalɛ ne ayɛ noko la ɔwɔ kɛ yɛ bɛ muala bɛ kanranli. 45 Ɔluakɛ, Mame, Ngoanedievolɛ ne bɔbɔ, menle ɛke kɛ bɛzonle me, na emomu mewɔ ɛke kɛ mesonle menli, na eza noko meava me ngoane meamaa wɔ menli dodo bɛ ɛtane ti."

46 Akee bɛdwule Gyɛleko. Na nzinlii mɔɔ bɛfi sua ne azo la, menli dɔɔnwo ne ala doale bɛ. Na ɔrale ye kɛ ɛnee nrenyia anyezinliravolɛ sɛlɛzɛlɛvolɛ bie mɔɔ bɛfɛlɛ ye Baatemeɛse, mɔɔ ɔ ze a le Temeɛse la, de adehanle ɛkɛ ne.

47 Na mɔɔ Baatemeɛse dele kɛ Gyisɛse mɔɔ vi Nazalɛte la ɛbikye ɛkɛ la, ɔbɔle ɔ bo kɛ ɔteɛdea nu kɛ, "Gyisɛse, Devidi Ara, nwu me anwunvɔne!"

48 Na menli ne bie mɔ deɛdeanle nu guale ɔ nwo zo kɛ, "Mua ɛ nloa!"

Noko ɛnee bɔ zo mɔɔ ɔ nye ɛbolo kpalɛ a: "O Devidi Ara, nwu me anwunvɔne!"

49 Na mɔɔ Gyisɛse dele ɔ ne la, ɔgyinlanle ɛkɛ ne wɔ adenle ne avinli na ɔzele kɛ, "Bɛze ye kɛ ɔrɛla ɛkɛ." Ɔti akee bɛvɛlɛle nrenyia anyezinliravolɛ ne. Bɛzele ye kɛ, "Wɔmɔ mɔɔ ɛ ti ɛyɛ boɛ a, bɛla, ɔlɛfɛlɛ wɔ!" 50 Baatemeɛse kpale ye ɛdanlɛ dɛba ne ɔ nwo ɔguale ye ahanle, na ɔwulule kyela kyela ɔrale Gyisɛse anwo ɛkɛ ne. 51 Na Gyisɛse bizale ye kɛ, "Duzu a ɛkulo kɛ meyɛ memaa wɔ a?"

Na ɔbuale ye kɛ, "O, Kilehilevolɛ, mekpondɛ kɛ menwu debie!"

52 Na Gyisɛse zele ye kɛ, "Wioo, kɔ wɔ ɛleka bie. Wɔ diedi ɛlie wɔ ngoane." Na ɛkɛ ne ala nrenyia anyezinliravolɛ ne nwunle debie, na ɔdoale Gyisɛse wɔ adenle ne anu, na ɔ nee ye hɔle.