Mateus 20

1 Adawu bieko mɔɔ kile Anwuma belemgbunli maanle ne anu la ɛne. "Kenle ko nwonlomɔ mangyee bie, aakomenle bie hɔle hɔbɔle gyimayɛvoma ɛkpa kɛ bɛhɔva ye egyinli nu aleɛ bɛmaa ye. 2 Ɔ nee gyimayɛvoma ne mɔ lile ɔ nloa kɛ kenle ko biala ɔbadua bɛ kakɛ pɔne nsuu; ɔ nee bɛ wiele ngyehyɛleɛ ɛhye la, akee ɔzoanle bɛ ɔmaanle bɛhɔle ye egyinli nu lɔ.

3 "Bɛbɔle kɛyɛ dɔne ngɔnla nwonlomɔ ne, na ɔpɛ nu wɔ sua ne mɔɔ bɛbɔ menli ɛkpa wɔ nu la anwo la, ɔnwunle mrenyia bie wɔ ɛkɛ mɔɔ bɛkponde gyima bɛayɛ a, 4 ɛhye ati ɔvale bɛdabɛ noko ɔ nee bɛ hɔle ye egyinli ne anu lɔ, na ɔzele bɛ kɛ ɔbadua bɛ kakɛ biala mɔɔ fɛta la wɔ gyima ne awieleɛ wɔ nɔsolɛ. 5 Ewia ne noko ɔvale gyimayɛvoma ɔhɔle nu, yɛɛ mɔɔ bɛbɔle ewiazo kɛyɛ dɔne nsa la ɔvale gyimayɛvoma bieko noko ɔhɔle ye egyinli ne anu.

6 "Bɛbɔle nɔsolɛ dɔne nnu la eza ɔhɔle sua zo bieko, na ɔnwunle mrenyia dɔɔnwo bie mɔɔ bɛnlɛ debie biala bɛyɛ na bɛgyigyi ye ngoko ngoko nee nwiɔ nwiɔ la na ɔbizale bɛ kɛ, ‘Duzu ati a bɛtɛyɛle gyima biala ɛnɛ a?’

7 "Bɛbuale ye kɛ, ‘Ɔluakɛ awie biala ɛtɛbabɔle yɛ ɛkpa.’ Nrenyia ne zele bɛ kɛ, ‘Ɛnee bɛhɔ na bɛhɔboka menli mɔɔ wɔ me egyinli nu lɔ la.’

8 "Nɔsolɛ ko ne ala ɔzele kakɛtuavo kpanyinli ne kɛ ɔvɛlɛ gyimayɛvoma ne mɔ na ɔdua bɛ kakɛ, ɔbɔ ye menli mɔɔ li amozi la anwo zo ɔhɔkpula alumuama ne anwo zo. 9 Na mɔɔ bɛduale menli mɔɔ bɛbɔle bɛ ɛkpa dɔne nnu la kakɛ bɛwiele la, bɛ nuhua ko biala nyianle pɔne nsuu. 10 Ɔti mɔɔ menli mɔɔ bɛbɔle bɛ ɛkpa alumua kpalɛ ne la rale kɛ bɛbalie bɛ ahatualɛ la, bɛdwenlenle kɛ bɛbanyia dɔɔnwo. Noko akee bɛdabɛ noko bɛduale bɛ pɔne nsuu nsuu.

11,12 "Bɛvale ɛya na bɛdendɛle bɛ nzo abo bɛzele kɛ, ‘Menli ɛhye mɔ yɛle gyima dɔnehwele ko ala, noko akee ahatualɛ ko ne ala mɔɔ ɛvale ɛmaanle yɛdayɛ mɔɔ yɛyɛ gyima dedee yeradwu nɔsolɛ wɔ ewia kpole ɛhye anu la yɛɛ wɔva wɔmaa bɛ a.’

13 "Nrenyia ne buale bɛ nuhua ko kɛ, ‘Agɔnwolɛ, metɛyɛle wɔ ɛtane biala! Wɔanlie wɔando nu kɛ ɛkɛyɛ gyima kenle ko ne amuala ɛkɛlie pɔne nsuu ɔ? 14 Die, na kɔ. Ɔle me ɛhulolɛ kɛ menwɔdua bɛ muala kakɛ ko; 15 anzɛɛ menlɛ adenle kɛ menwɔva me ezukoa mɔɔ medame mekulo la menwɔhyɛ ɔ? Anzɛɛ me atiakunlukɛnlɛma ne yɛ wɔ ɛya ɔ?’ 16 Na kɛ ɔde ala la ɛne, kɛ amozi amra balumua, na alumua amra noko ali amozi."

Ɔhyia kɛ kpanyinli sonle

17 Mɔɔ Gyisɛse kɔ Gyɛlusalɛm la, ɔ nee ye ɛdoavolɛma bulu nee nwiɔ ne mɔ hɔle ahanle, 18 na ɔhanle edwɛkɛ mɔɔ bazi ɔ nwo zo la ɔhilele bɛ zɛ: "Bɛnlea, yɛlɛkɔ Gyɛlusalɛm, na bɛbaye Me bɛamaa azɛlɛvolɛ mgbanyima ne mɔ nee Dwuuma mgbanyima mɔɔ ɛha la, na bɛabua me ewule fɔlɛ. 19 Na bɛbava me bɛamaa Wulomuma Arane ne; bɛbazi me amgbu na bɛabila me empele na akee bɛabɔ me meanubaka nu, na ye kenle nsa ne azo, Mebadwazo meara ngoane nu bieko."

20 Akee Zɛbɛdi amra mrenyia ne mɔ, Gyemise nee Dwɔn, nee bɛ nli mumua ne rale Gyisɛse anwo ɛkɛ bɛrahotole ye, na ɔzɛlɛle debie ɔvile Gyisɛse ɛkɛ.

21 Gyisɛse bizale raalɛ ne kɛ, "Duzu debie a ɛkpondɛ a?" Ɔbuale ye kɛ, "Mekulo kɛ ɛbɔ me ɛwɔkɛ kɛ ɛbamaa me mra mrenyia nwiɔ, ɛhye mɔ adɛnla ɛ sa zo, ko wɔ wɔ fema zo, yɛɛ ko noko wɔ wɔ bɛne zo wɔ wɔ Anwuma belemgbunli maanle ne anu."

22 Gyisɛse buale ye zele kɛ, "Ɛnze deɛ mɔɔ ɛlɛbiza la!" Gyisɛse hakyile ɔ nye nleanle Gyemise nee Dwɔn na akee ɔbizale bɛ kɛ, "Asoo bɛbahola bɛanlo bɔnyema kɔpo ne mɔɔ mebanlo nu la anu ɔ?" Bɛbuale bɛzele kɛ, "Ɛhɛe, yɛbahola!"

23 Gyisɛse zele bɛ kɛ, "Mese bɛ nɔhalɛ nu kɛ, bɛbahola ‘bɛanlo me kɔpo’ ne anu bɔkɔɔ; na me sa fema zo nee me sa bɛne zo ɛdɛnlanlɛ wɔ arelemgbunli mbia ne mɔ azo ɛdeɛ, yemɔ menlɛ nwolɛ tumi biala kɛ menwɔva menwɔbɔ bɛ ɛwɔkɛ, na emomu bɛbava bɛamaa bɛdabɛ mɔɔ me Ze ɛziezie ɛmaa bɛ la."

24 Na mɔɔ ɛdoavolɛma bulu ne mɔ mɔɔ ɛha la dele mɔɔ Gyemise nee Dwɔn ɛbiza la, bɛnyianle ɛya wɔ mediema nwiɔ ne anwo.

25 Gyisɛse vɛlɛle bɛ ɔmaanle bɛ muala bɛrale ɔ nwo ɛkɛ ne, na ɔzele kɛ, "Bɛze kɛ maanle maanle arelemgbunli ne mɔ fa atisesebɛ yɛɛ bu bɛ maanle ne mɔ a, yɛɛ arelemgbunli ngyikyi ne mɔ bɛdabɛ noko bɛmia bɛdabɛ mɔɔ wɔ bɛ bo la. 26 Na wɔ bɛ avinli ɛdeɛ, ngakyile ekyii wɔ nu. Awie biala mɔɔ ɔkpondɛ kpole anzɛɛ bedevinli yeayɛ wɔ bɛ nu la ɔwɔ kɛ yɛ bɛ akɛlɛ. 27 Na awie biala mɔɔ ɔkulo kɛ ɔdi bɛ nyunlu moa wɔ bɛ nu la, ɔbayɛ bɛ akɛlɛ nee bɛ kanranli. 28 Ɔwɔ kɛ bɛkakyi bɛ sa anloa kɛ me deɛ ne la, ɔluakɛ Mame, Ngoanedievolɛ ne, meamba kɛ memaa bɛazonle me, na emomu membazonlenle, na meava me ngoane meabɔ azu meamaa menli."

29 Na mɔɔ Gyisɛse nee ye ɛdoavolɛma ne mɔ vile Gyɛleko sua kpole ne azo bɛkɔ la, menli dɔɔnwo ne ala doale bɛ.

30 Ɛnee mrenyia anyezinliravolɛma nwiɔ bie dede adehanle ne, na mɔɔ bɛdele kɛ Gyisɛse ɛlɛba araze la, bɛdeɛdeanle nu bɛzele kɛ, "Yɛmenle, Devidi Ara, nwu yɛ anwunvɔne!"

31 Na menli dɔɔnwo ne bɔle bɛ nloa kɛ bɛyɛ ngungoonwu; na emomu, akee bɛdeɛdeanle nu kpole ne ala.

32,33 Mɔɔ Gyisɛse radwule ɛleka mɔɔ bɛdede la, ɔgyinlanle adenle ne avinli na ɔvɛlɛle bɛ ɔzele bɛ kɛ, "Duzu a bɛkulo kɛ meyɛ memaa bɛ a?" Bɛzele ye kɛ, "Yɛmenle, yɛkulo kɛ yɛnwu debie!"

34 Gyisɛse akunlu yelɛyelale ye wɔ bɛ nwo, ɔti ɔvale ɔ sa ɔhanle bɛ nye ne mɔ, na ndɛndɛ ne ala bɛnwunle debie, na akee bɛdoale ye.