1 Mekɛ mɔɔ bɛwɔ Nazalɛte la, Dwɔn Sɔnevolɛ ne bɔle ye Nyamedwɛkɛ ɛhanlɛ ne abo wɔ Dwudiya fiemgbole ne azo. Ye edwɛkɛ kpɔkɛ mɔɔ ɔgyinlanle zolɛ ɛsesebɛ la a le kɛ, 2 "Bɛhwe bɛ nwo bɛvi bɛ ɛtane ne mɔ anu, bɛnlu bɛ nwo, na bɛkpondɛ Nyamenle abo zo, ɔluakɛ Anwuma belemgbunli maanle ne ɛnrɛhyɛ biala na ara."

3 Ayezaya kapezonli ne hanle Dwɔn Sɔnevolɛ ne Nyamenle gyimayɛlɛ ne anwo edwɛkɛ wɔ ɛvolɛ pemgbenlamgbe mɔɔ ɛze ɛhɔ la anu. Ɔhɛlɛle kɛ, "Mete ɛdeanlɛ bie vi fiemgbole ne azo kɛ, ‘Bɛziezie Awulae adenle ne anu na bɛdenrɛdenrɛ ndenle ne mɔ mɔɔ ɔbalua nu la.’ "

4 Dwɔn tɛladeɛ ne mɔɔ ɔwula la bɛvale ɛkpɔnwɔ nwo enrinli a bɛnwonle a, yɛɛ nwoma bɛlɛte noko a hye ɔ nze a; ye aleɛ a le aabɛ nee ɛhoayelɛ nu wolɛ ala. 5 Menli vi Gyɛlusalɛm nee Dwɔdan Awoka ne azo amuala rale, na nɔhalɛ nu, bɛvi Dwudiya ɛleka biala na bɛrale ɛsɛlɛ ne azo kɛ bɛbadie Nyamenle edwɛkɛ ngilehilenu ne, 6 na mɔɔ bɛhanle bɛ ɛtane ne mɔ la ɔzɔnenle bɛ wɔ Azule Dwɔdan ne anu.

7 Na melɛ mɔɔ ɔnwunle kɛ Falasiima nee Sadusiima dɔɔnwo ɛlɛba bɛamaa yeazɔne bɛ la, ɔkpole bɛ. Ɔdeanle bɛ ɔzele kɛ, "Bɛmɛ nwɔlɛ amra! Nwane a zele bɛ kɛ bɛnriandi bɛvi Nana Nyamenle ɛyavalɛ kpole ne mɔɔ ɛlɛba la anu a?"

8 "Bɛhile kɛ amgba noko bɛhwe bɛ nwo bɛvi ɛtane nu, na akee bɛlɛbɔ ɛbɛla kpalɛ kolaa na bɛazɔne bɛ. 9 Mmamaa bɛ adwenle yɛ bɛ kɛ, ‘Yɛmɛ yɛle Dwuuma, yɛle Ebileham abo zo amra, yemɔti bɛdi munli.’ Ɛhye ɛngile ɛhwee. Ɔluakɛ Nana Nyamenle kola kakyi awolɛ ɛhye mɔ yɛ bɛ Dwuuma!

10 "Na kɛkala bɔbɔ, Nana Nyamenle ɛyɛ anwomoalɛ ɛwie. Ye akuma ne la baka ne abo, na baka biala mɔɔ anzo ma la Ɔbabu ye. Bɛbapepɛ bɛ na bɛayela bɛ.

11 "Mefa nzule mgbane a mesɔne menli mɔɔ kɛnlu bɛ nwo wɔ bɛ ɛtane nwo la a; na awie bie ɛlɛba, mɔɔ ɔlɛ tumi kpole ɔtɛla me a, na ɔlua ye kpole ti, ye mgbɔlaboa ne bɔbɔ memfɛta ye ɛzoalɛ! Na yemɔ ɔbava Sunsum Nwuanzanwuanza ne nee senle a yeazɔne bɛ a. 12 Ɔbakpogya ma ne yeavi abonle ne anwo, na yeayela bɛ wɔ ɔnlɛ-awieleɛ senle ne mɔɔ ɛlɛsɔ la anu, na akee yeava ma kpalɛ ne yeagua ye bonwole ne azo."

13 Gyisɛse vi Galeli maanzinli nu rale Azule Dwɔdan ne anloa wɔ Dwɔn anwo ɛkɛ ne kɛ ɔzɔne ye. 14 Na Dwɔn hanle kɛ "Menfɛta kɛ menwɔzɔne wɔ. Wɔmɔ a ɔwɔ kɛ ɛsɔne me a, na duzu ati a wɔra kɛ menzɔne wɔ ɛ?" 15 Gyisɛse buale kɛ, "Maa ɔyɛ zɔhane kɛkala. Ɔluakɛ ɔle kpalɛ kɛ yɛfa zɛhae adenle zo yɛyɛ mɔɔ Nyamenle kpondɛ kɛ yɛyɛ la." Zɔhane ati Dwɔn kponlenle zolɛ na ɔzɔnenle ye. 16 Mɔɔ bɛzɔnenle Gyisɛse bɛwiele la, ɔvi azule ne anu ɔvole file zo ndɛndɛ ne ala. Anwuma bukele na ɔnwunle kɛ Nyamenle Sunsum ne ɛlɛdwu kɛ abubule la na ɔrazinzele ɔ nwo zo. 17 Na ɛnelɛ bie vi anwuma zele kɛ, "Ɛhye a le me Ra mɔɔ mekulo ye la, Me nye die ɔ nwo kpole."