1 Falasiima bie mɔ nee Dwuuma mgbanyima ne mɔ vi Gyɛlusalɛm rabizale Gyisɛse edwɛkɛ.

2 Bɛbizale ye kɛ, "Duzu ati a wɔ ɛdoavolɛma ne mɔ ɛnli Dwuuma tete mɛla ne mɔ azo a? Ɔluakɛ bɛnli mɛla ne mɔɔ hyia kɛ ɔwɔ kɛ bɛwowo bɛ sa anwo kolaa na bɛali debie la azo." 3 Ɔbuale bɛ kɛ, "Na duzu ati a bɛ amaamuo ne mɔ tia Nana Nyamenle ye mɛla ne mɔ a? 4 Ndonwo a le kɛ, Nana Nyamenle mɛla ne se, ‘Maa ɛ nye ɛzɔ ɛ ze nee ɛ nli; awie biala mɔɔ kɛyɛ ɔ ze nee ɔ nli anwo mgbanyizonle la ɔwɔ kɛ ɔwu.’ 5,6 Noko akee bɛmɛ bɛse, ‘Saa ɛ ze nee ɛ nli ɛlɛdi ehyia bɔbɔ a, ɔnva nwo kɛ emomu ɛkɛva ezukoa mɔɔ anrɛɛ ɛkɛva ɛkɛmaa bɛ la ɛkɛmaa asɔne ne.’ Ɛhye ati, ɔlua bɛdabɛ mumua ne bɛ mɛla mɔɔ bɛyɛ la azo, bɛbulu Nana Nyamenle ɔdaye ye mɛla ne mɔɔ se, maa ɛ nye ɛzɔ ɛ ze nee ɛ nli na nea bɛ la azo. 7 Adalɛ nabalabama! Ayezaya nwunle ye ɔhanle bɛ nwo edwɛkɛ bɔkɔɔ. 8 ‘Menli ɛhye mɔ se, bɛdi me eni, noko akee bɛ ahonle ne mɔ wɔ moa hwehwe. 9 Bɛ ɛzonlenlɛ ne le gyɛne, ɔluakɛ bɛkilehile bɛdabɛ bɛ ti anwo mɛla mɔɔ bɛhyehyɛ la, na bɛgyakyi mɔɔ vi Nana Nyamenle ɛkɛ ne la.’"

10 Akee Gyisɛse vɛlɛle menli dɔɔnwo ne na ɔzele bɛ kɛ, "Bɛdie mɔɔ melɛka la na bɛbɔ mɔdenle kɛ bɛkɛde ɔ bo: 11 Tɛ aleɛ mɔɔ anwo ɛnde la yɛɛ bɛdi a ɔgua bɛ nwo evinli a! Na emomu, mɔɔ bɛka nee mɔɔ bɛdwenle nwo la yɛɛ agua bɛ nwo evinli a."

12 Akee ye ɛdoavolɛma ne mɔ rale na bɛzele ye kɛ, "Wɔ edwɛke ne mɔɔ hanle la hwile Falasiima ne mɔ."

13,14 Na Gyisɛse zele bɛ kɛ, "Bɛgyakyi bɛ nzi ɛlilɛ, ɔluakɛ, baka biala mɔɔ tɛ Egya a luale la, bɛbadu ye bɛado. Bɛdabɛ mumua ne bɛ nye ɛzi noko bɛkile menli adenle. Na saa anyezinliravolɛ kile ɔ gɔnwo anyezinliravolɛ adenle noko a bɛ mu nwiɔ bɛbagua kuma nu."

15 Akee Pita zele Gyisɛse kɛ ɔhile mɔɔ ɔhanle kɛ tɛ aleɛ mɔɔ anwo ɛnde la yɛɛ agua sonla nwo evinli a la abo.

16 Na Gyisɛse buale kɛ, "Bɛnde ɛhye abo ɔ? 17 Benze kɛ aleɛ mɔɔ bɛdi la dua ɛkolɛ ne anu dedee na ɔfinde bieko ɔ? 18 Na edwɛkɛ ɛtane mɔɔ vi ahonle ɛtane nu la yɛɛ agua ahenle ne mɔɔ kɛha la anwo evinli a. 19 Ɔluakɛ ahonle ne anu a adwenle ɛtane ɛtane ɛhye mɔ: sonlahunlɛ, awuvolɛvalɛ, huhunli nyɛleɛ, awuleyɛlɛ, adalɛbɔlɛ nee dumazɛkyelɛ vi ba a. 20 Ɛhye mɔ a gua sonla nwo evinli a; na saa wɔanwowo ɛ sa anwo na ɛdi aleɛ a, ɔngua sunsum ne anwo evinli!"

21 Akee Gyisɛse vile ɛkɛ ne ɔhɔle Taya nee Saedɛn maanzinli ne anu.

22 Raalɛ bie mɔɔ vi Keena na ɔde ɛkɛ ne la vale modolɛ rale ye ɛkɛ na ɔzele ye kɛ, "O Awulae, Devidi Ara, nwu me anwunvɔne! Ɔluakɛ bozonle ɛva me ra raalɛ ne na ɔto ye."

23 Gyisɛse andɛne ye zo, yeanga edwɛkɛ kpɔkɛ ko bɔbɔ. Na ye ɛdoavolɛma ne mɔ zele ye kɛ ɔmaa raalɛ ne ɛvi ɛkɛ ne ɛhɔ, ɔluakɛ bɛzele kɛ, "ɔlɛfa ye modolɛ ne yeagyegye ye somaa."

24 Akee ɔzele raalɛ ne kɛ, "Bɛzoanle me kɛ membamboa Dwuuma ne mɔ, Yizilayɛ mboane ne mɔ mɔɔ bɛminli la, na tɛ awie gyɛne biala ɔ."

25 Noko raalɛ ne rale na ɔrazonlenle ye na ɔbodole ye bieko ɔzele kɛ, "Yɛmenle, boa me!"

26 Gyisɛse zele kɛ, "Ɔnva adenle nu kɛ ɛkɛva ngakula aleɛ mɔɔ bɛdi la ɛkɛmaa ahwea a."

27 Raalɛ ne buale ye kɛ, "Ɛhɛe, ɔle nɔhalɛ, Awulae, noko akee ahwea ne mɔ di mgbokpoleka ne mɔ mɔɔ vi bɛ menle mɔ ɛkponle ne mɔ azo kɛgua aze la."

28 Gyisɛse buale ye kɛ, "Ɔmɔ, wɔ diedi le kpole, ɛhye ati wɔ ɛbizalɛdeɛ ne ɛyɛ ɛkɛ." Na ɛkɛ ne ala ɔ ra raalɛ ne anwo zale.

29 Gyisɛse zɔle ye adendulɛ ne azo na ɔpɛle nu wɔ Galeli nyevile ne anloa, na ɔvole ɔhɔdɛnlanle ezukue bie azo wɔ ɛkɛ ne. 30 Na menli dɔɔnwo bie vale bɛ abuburavolɛma, anyezinliravolɛma, kokobɛvolɛma, nee menli mɔɔ ɛngola tendɛ la, ɔ nee mɔɔ bokɛboka nwo la rale Gyisɛse anyunlu, na ɔyɛle bɛ ayile. 31 Na ɛhye yɛle menli ne nwanwane totohyia! Ɔluakɛ menli bɔbɔ mɔɔ ɛnee bɛtɛtendɛle ɛlɛ la dendɛle ahomeka nu, yɛɛ menli mɔɔ bɛ sa nee bɛ gyakɛ ne mɔ le ngoko noko la nyianle fofolɛ; abuburavolɛma diale na bɛwuluwulule ahomeka nu ala, na bɛdabɛ noko mɔɔ ɛnee bɛ nye ɛzi la nwunle debie! Ɔyɛle menli dɔɔnwo ne azibɛnwo, na ɔlua zo bɛyele Yizilayɛ Nyamenle ne ayɛlɛ.

32 Akee Gyisɛse vɛlɛle ye ɛdoavolɛma ne mɔ ɔ nwo ɛkɛ, na ɔzele bɛ kɛ, "Medi menli ɛhye mɔ anwo nyane, ɔluakɛ bɛ nee me ɛdɛnla ɛke kenle nsa kpalɛ, mɔɔ debie biala ɛnle ɛke mɔɔ bɛbali a; mengulo noko kɛ menwɔmaa bɛkɛva ɛhɔne bɛkɛhɔ a, anrɛɛ yemɔ bɛ nye zo babulubulu bɛ wɔ adenle nu."

33 Ɛdoavolɛma ne mɔ bizale ye kɛ, "Na nienwu ɛleka bɔbɔ a yɛbanyia aleɛ wɔ ɛsɛlɛ ye azo ɛke yɛava yɛamaa menli wowiakɛ ɛhye mɔ ali a?"

34 Gyisɛse bizale bɛ kɛ, "Kpanwo dolɔfo nyɛ a bɛlɛ ye a?" Bɛbuale ye kɛ, "Kpanwo dolɔfo nsuu ɔ nee fɛlɛ ekyii."

35 Na akee Gyisɛse zele menli ne amuala kɛ bɛdɛnla aze, 36 na ɔvale kpanwo dolɔfo nsuu ne nee fɛlɛ ne, na ɔyɛle Nana Nyamenle mo, na akee ɔbubule nuhua ngyikyi ngyikyi, na ɔvale ɔmaanle ye ɛdoavolɛma ne mɔ, na bɛdabɛ noko bɛhyɛle bɛmaanle menli ɛwolaa ne. 37,38 Na awie biala lile bie maanle ɔ ko yile. Na bɛlua mrenyia apenle nna yɛɛ mraalɛ nee ngakula dɔɔnwo boka nwo. Nzinlii mɔɔ bɛsesale ɔ bo zo mgbokpoleka ne la, bɛnyianle ahɛndɛne tetɛkɛɛ nsuu!

39 Akee Gyisɛse maanle menli dɔɔnwo ne hɔle bɛ azua nu na yemɔ ɔvole ɛlɛne nu ɔpɛle azule tandane ne ɔhɔle Magadan maanzinli ne anu.