1 Mɔɔ aleɛ hyenle la azɛlɛvolɛ mgbanyima ne mɔ nee Dwuuma mgbanyima ne mɔ yiale nu bieko dwenledwenlenle adenle mɔɔ bɛdua nu a ɛnee bɛkɛli bɛkɛwula Wulomuma Arane ne bɛkɛmaa ɔkɛbua Gyisɛse ewule fɔlɛ la. 2 Akee bɛguale ye nwɔnzɔnwɔnzɔ na bɛvale ye bɛhɔmaanle Paelɛte, mɔɔ le Wulomuma Amɛnlado ne.

3 Mekɛ ko ne ala anu, Dwudase, mɔɔ yele ye maanle la nwunle kɛ bɛbua Gyisɛse ewule fɔlɛ la, ɔhakyile ye adwenle na ɔlile nyane totohyia kpole wɔ mɔɔ yeyɛ la anwo, na ɔziale ɔvale ezukoa ne ɔhɔmaanle azɛlɛvolɛ mgbanyima ne mɔ nee Dwuuma mgbanyima ne mɔ.

4 Na ɔzele kɛ, "Meyɛ ɛtane, ɔluakɛ meye sonla mɔɔ ɛnze nwolɛ bie la memaa." Bɛbuale ye ɛkɛ ne ala bɛzele kɛ, "Ɛhye le wɔ edwɛkɛ ɔ?"

5 Akee ɔvuandinle ezukoa ne ɔguale Asɔne Sua Kpole ne anu azɛlɛ ne anwo na ɔhɔle ɔhɔzɔle ɔ kɔme nyɛma. 6 Azɛlɛvolɛ mgbanyima ne mɔ sesale ezukoa ne, na bɛzele kɛ, "Yɛfa ezukoa ɛhye yɛgua yɛ gya ezukoa ne anu a ɔnyɛ boɛ, kɛmɔ yɛ mɛla tua kɛ yɛkɛlie ezukoa mɔɔ bɛkɛdua ye wɔ sonla ɛhunlɛ nwo la."

7 Bɛdwenlenle nwo na bɛbɔle ye kpɔkɛ na bɛhɔdɔle azɛlɛ ne mɔɔ mbuakɛnwovoma ne te ɛkɛ ne ndɛtɛlɛ nwo bɛ ninyɛne la kɛ bɛfa bɛayɛ azie bɛamaa nyɛvolɛ mɔɔ kɛwu Gyɛlusalɛm la. 8 Ɛhye ati a ɛnɛ nee ɛnɛ ala bɛfɛlɛ azie ne "Mogya Azɛlɛ" la a.

9 Ɛhye maanle Gyɛlɛmaya kapezo edwɛkɛ ne mɔɔ se, "Bɛvale ezukoa fufule mralɛ abulasa ne, bolɛ ne mɔɔ bɛdɔnenle Ye la ɔyɛle wɔ Yizilayɛma anye zo la, 10 na bɛvale bɛhɔdɔle azɛlɛ bɛvile mbuakɛnwovoma ne mɔ ɛkɛ, kɛmɔ Nana Nyamenle zele me la."

11 Mɔɔ Gyisɛse gyi Paelɛte anyunlu ɛkɛ ne la, Paelɛte bizale ye kɛ, "Ɛdawɔ a ɛle Dwuuma Belemgbunli ne la ɔ?" Gyisɛse buale ye kɛ, "Ɛhɛe."

12 Na mɔɔ azɛlɛvolɛ mgbanyima ne mɔ nee Dwuuma mgbanyima ne mɔ lile daselɛ adalɛ dɔɔnwo tiale ye la, Gyisɛse ambua bɛ bɔbɔ; ɔyɛle koonwu.

13 Paelɛte bizale ye kɛ, "Ɛnde mɔɔ bɛlɛkeha la ɔ?"

14 Noko akee Gyisɛse andendɛ ɔ nwo bɔbɔ; na ɛhye zinle Amɛnlando ne anwo totohyia.

15 Wɔ ɛvolɛ biala Akpabɛnwo ɛvoyia ne anu, ɔle Amɛnlado ne amaamuo anzɛɛ Dwuuma mɛla kɛ ɔkɛye Dwuunli ko mɔɔ menli ne mɔ bɛdabɛ bɛkɛze kɛ bɛye ye la, ɔkɛvi efiade ne. 16 Na wɔ ɛvolɛ ɛhye anu noko, ɛnee kodiawu anwo ɛzulolɛ anwo ɛvɛlɛ bie mɔɔ bɛfɛlɛ ye Balabase la, la efiade, 17 ɔti mɔɔ menli dɔɔnwo ne yiale wɔ Paelɛte aako ne anu nwonlomɔ mangyee ne la, ɔbizale bɛ kɛ, "Menli nwiɔ ɛhye anu boni yɛɛ bɛkulo kɛ meye ye memaa bɛ a. Balabase anzɛɛ Gyisɛse, mɔɔ le bɛ Ngoanedievolɛ ne la ɔ?" 18 Ɔluakɛ ɛnee ɔze ye wienyi kɛ, Dwuuma mgbanyima ne mɔ ɛhye Gyisɛse wɔ diedi kpole ne mɔɔ menli ne mɔ ɛnyia ye wɔ ye nu la anwo ɛkpɔlɛ ti.

19 Mɔɔ Paelɛte de ebia nu ɔtie edwɛkɛ ne la, ɔ ye vale nrɛlaleɛ bie rɛlɛle ye mɔɔ se: "Gyakyi nrenyia ɛhye mɔɔ ɛtɛyɛle ɛtane biala la maa ɔhɔ; ɔluakɛ menganle ɛlalɛ ɛzulolɛ bie mɔɔ fale ɔ nwo la anoma nɔe."

20 Akee azɛlɛvolɛ mgbanyima ne mɔ nee Dwuuma mgbanyima ne mɔ lile wulale menli ɛwolaa ne amuala kɛ, bɛbiza Balabase ɛyelɛ, na Gyisɛse, yemɔ bɛhu ye. 21 Ɛhye ati mɔɔ Amɛnlado ne bizale bɛ bieko kɛ, "Menli nwiɔ ɛhye mɔ nuhua ne boni a menye ye memaa bɛ a" la, menli ɛwolaa ne zele kɛ, "Balabase!"

22 Paelɛte bizale bɛ kɛ, "Ɛnee akee duzu debie a menva menyɛ Gyisɛse, mɔɔ le bɛ Ngoanedievolɛ ne la a?" Bɛ muala bɛdeanle nu bɛzele kɛ, "Bɔ ye meanubaka nu!"

23 Paelɛte bizale bɛ kɛ, "Duzu ati ɔ? Duzu ɛtane a yeyɛ a?" Noko akee bɛhɔle zo bɛdeɛdeanle nu bɛzele kɛ; "Bɔ ye meanubaka nu! Bɔ ye meanubaka nu!"

24 Mɔɔ Paelɛte nwunle kɛ somaa ne mɔɔ ɔlɛka la le gyɛne la, na basabasa kpondɛ abɔ ɔ bo la, ɔzoanle ɔmaanle bɛhɔzale nzule kyɛnze nu bɛrɛlɛle ye, na ɔwowole ɔ sa anwo wɔ menli dɔɔnwo ne anyunlu, na ɔzele kɛ, "Menli fɔlɛ wɔ nrenyia ɛhye mɔɔ ɛtɛyɛle ɛtane biala la mogya ne anwo. Ɛzonle ne zo bɛ nee bɛ mra!"

25 Na menli dɔɔnwo ne mɔɔ ɛya ɛyi bɛ tɛkɛɛ la yele ɔ nloa zele kɛ, "Ye mogya ne ɛgua yɛdayɛ nee yɛ mra ati zo!"

26 Akee Paelɛte yele Balabase maanle bɛ. Na mɔɔ ɔbilale Gyisɛse empele ɔwiele la, ɔvale ye ɔmaanle Wulomu sogyama ne mɔ kɛ bɛ nee ye ɛhɔ bɛhɔbɔ ye meanubaka nu. 27 Bɛlumuale bɛvale ye bɛhɔle ɛleka ne mɔɔ bɛfa konlendeɛ ne mɔ bɛsie la na bɛvɛlɛle bɛ sogya ɛlɔne ekpunli ne amuala. 28 Bɛkpolole ye tɛladeɛ ne na bɛvale tɛladeɛ kɔbenle bɛwulale ye, 29 na bɛvale mbowule bɛyɛle abotile bɛkpolole ɔ ti, na bɛvale kpɔma bɛwulale Ɔ sa fema ne anu kɛ belemgbunli sɛkɛlɛneɛ bie la, na bɛhotole ɔ nyunlu ɛkɛ ne bɛzile ye amgbu bɛzele kɛ, "Akoaba, Dwuuma Belemgbunli!" 30 Na akee bɛtotole nyɛlɛ ɔ nyunlu na bɛzale ye bɛliele kpɔma ne na bɛvale bɛbɔle ɔ ti avinli penyi!

31 Bɛzile ye amgbu bɛwiele la bɛyele bɛ tɛladeɛ kɔbenle ɛdeɛ ne, na bɛvale ɔdaye mumua ne ye tɛladeɛ ɛdeɛ ne bɛwulale ye bieko, na bɛvale ye bɛdɔle adenle zo kɛ bɛkabɔ ye meanubaka nu. 32 Na mɔɔ bɛdɔle adenle zo kɛ bɛkɔ ɛhunlɛ ɛleka ne la, bɛyiale nrenyia bie mɔɔ bɛfɛlɛ ye Saemɔn, mɔɔ vi Saelini mɔɔ wɔ Abibile Maanle nu la, na bɛhyele ye bɛmaanle ɔzoale Gyisɛse meanubaka ne. 33 Akee bɛhɔle ɛleka bie mɔɔ bɛfɛlɛ ye Gɔlogɔta, mɔɔ ɔ bo a le "Etile kanrɛlɛ Boka" la. 34 Ɛkɛ ne a sogyama ne mɔ maanle ye nwanye mɔɔ bɔnyema wɔ nu la kɛ ɔnlo a; na mɔɔ ɔhanle ɔ nloa ɔnleanle la yeanno.

35 Mɔɔ bɛbɔle ye meanubaka nu bɛwiele la, sogyama ne mɔ dole ye tɛladeɛ ne anwo nzeleba na bɛhyɛle bɛvale. 36 Akee bɛdɛnlanle aze na bɛnleanle ye wɔ melɛ mɔɔ ɔhenda meanubaka ne azo la. 37 Na bɛvale ngɛlɛlera bie bɛbɔle ye meanubaka ne ati zo mɔɔ se, "Ɛhye a le Gyisɛse, Dwuuma ne bɛ Belemgbunli ne."

38 Bɛbɔle nwule nwiɔ bie noko meanumbaka nu nwonlomɔ zɔhane, ko wɔ ɔ sa fema zo, yɛɛ ko wɔ ɔ sa bɛne zo. 39 Na menli mɔɔ pɛ nu ahɔ la zile ye amgbu, na bɛkpusukpusule bɛ ti bɛzele kɛ, 40 "Wio! Tɛ wɔmɔ a ɛse ɛkola ɛbubu Nyamenle Asɔne Sua Kpole ne na ɛfa kenle nsa ala ɛsi la ɔ? Saa ɔle zɔ ɛdeɛ a ɛnee ɛvi meanubaka ne azo dwu aze na kile kɛ amgba ɛle Nyamenle Ra!"

41-43 Na azɛlɛvolɛ mgbanyima ne mɔ nee Dwuuma mgbanyima ne mɔ noko zile ye amgbu na bɛzele kɛ, "Ɔdie awie mɔ ngoane, noko akee ɔngola ɔnlie ɔdaye mumua ne ye ngoane! Wio! Na tɛ wɔmɔ a ɛse ɛle Yizilayɛma Belemgbunli ne la ɔ? Ɛvi meanubaka ne azo dwu aze na yɛbalie wɔ yɛali! Ɔdie Nana Nyamenle ɔdi, ɔti bɛmaa Nana Nyamenle ɛlie ye na ɔhile kɛ ɔle zɔ amgba. Yeanga kɛ, ‘Ɔle Nyamenle Ra’ ɔ?"

44 Na nwule ne mɔ noko golole ɔ nwo bie.

45 Kenle ko ne ewia ne, awozinli kabii hedale azɛlɛ ye amuala azo dedee dɔnehwele nsa, ɔvi ewiazo bulu nee nwiɔ hɔkpulale ewiazo dɔne nsa.

46 Na mɔɔ bɛbɔle kɛyɛ dɔne nsa la, Gyisɛse deanle nu ɔzele kɛ, "Eli, Eli, lama sabaketani" mɔɔ abo a le kɛ, "Me Nyamenle, Me Nyamenle, duzu ati a wɔkpo me a la?"

47 Menli mɔɔ ɛnee gyigyi ɛkɛ ne la bie mɔ dele ɛhye la bɛ adwenle yɛle bɛ kɛ ɔlɛfɛlɛ Yilaegya. 48 Bɛ nuhua ko vale ɛnriandinlɛ hɔle hɔvale emiane bɔle nwanye ɛnwonle nu na ɔvale ɔduale baka ti na akee ɔvale ɔmaanle ye kɛ ɔnlo. 49 Na menli mɔɔ hale la zele ye kɛ, "Bɛgyakyi ye koonwu. Bɛmaa yɛnlea kɛ saa amgba Yilaegya bara aralie ye a."

50 Na akee Gyisɛse deanle nu bieko, na ye sunsum ne vile ye nu, na ɔwule. 51 Na nea, ɛdanlɛ ne mɔɔ pɛ Anwodelɛ Ɛleka ne anyunlu wɔ Asɔne Sua Kpole ne anu la anu suanle vile anwuma radwule aze; na azɛlɛ kpusule, na awolɛ, nee awoka kpukekpukele, 52 na azɛka bukebukele, na anwodelɛma mrenyia nee mraalɛ mɔɔ bɛwuwu la ziale rale ngoane nu bieko. 53 Nzinlii mɔɔ Gyisɛse vi ewule nu dwazole la, bɛvile azie ne azo na bɛhɔle Gyɛlusalɛm, na bɛyele bɛ nwo bɛhilele menli dɔɔnwo ne ala wɔ ɛkɛ.

54 Sogyama ne mɔ nee bɛ mgbanyima mɔɔ hɔle meanubaka nu ɛbɔlɛ ne, na bɛlɛsinza ye la ahonle dule totohyia wɔ azɛlɛ ɛkpusulɛ ne nee ninyɛne mɔɔ sisile la anwo. Bɛdeɛdeanle nu bɛzele kɛ, "Nɔhalɛ, Nrenyia ɛhye le Nyamenle Ra."

55 Na mraalɛ dɔɔnwo mɔɔ nee Gyisɛse vi Galeli rale kɛ bɛbazonle ye la gyinlanle amozi nleanle ninyɛne mɔɔ zile la bie. 56 Mraalɛ ɛhye mɔ boka mraalɛ mɔɔ rale la anwo: Male mɔɔ vi Magedala la nee Male, mɔɔ ɔ mra a le Gyemise nee Dwosefi la, ɔ nee Gyemise nee Dwɔn mɔɔ bɛ ze a le Zɛbɛdi la bɛ nli ne.

57 Mɔɔ nɔsolɛ dwule la, nrenyia sukoavolɛ bie mɔɔ vi Arelematia, mɔɔ bɛfɛlɛ ye Dwosefi na ɔle Gyisɛse ɛdoavolɛma ne mɔ ko la, 58 hɔle Paelɛte anwo ɛkɛ hɔzɛlɛle Gyisɛse funli ne. Na Paelɛte maanle adenle maanle bɛvale bɛmaanle ye. 59 Dwosefi vale selekye mɔɔ anye le bɔkɔbɔkɔ la bebale funli ne anwo, 60 na ɔhɔziele ye wɔ ɔdaye ye sɛka fofolɛ mɔɔ yepɛ la anu, na ɔhundole bolɛ totohyia bie ɔnyinle sɛka ne anloa na ɔhɔle. 61 Ɛnee Male mɔɔ vi Magedala la nee Male ɛhendeɛ ne amu nwiɔ de sɛka ne anzi ɛkɛ ne bɛlɛsinza ye.

62 Aleɛ hyenle na ye nɔsolɛ nu mɔɔ asɛɛ kenle ne mɔɔ lumua wɔ Akpabɛnwo ɛvoyia ne anu la ɛwie la, azɛlɛvolɛ mgbanyima ne mɔ nee Falasiima ne mɔ hɔle Paelɛte anwo ɛkɛ 63 hɔzele ye kɛ, "Yɛmenle, nrenyia adalɛ ne de aze la, ɔhanle kɛ, ‘Kenle nsa pɛ nu a, mebazia meara ngoane nu bieko.’ 64 Ɛhye ati maa bɛzinza sɛka ne kɔkpula kenle nsa ne, yemɔ anrɛɛ ye ɛdoavolɛma ne mɔ kɛhɔwua ye kɛhɔ na akee bɛkɛze menli kɛ, ɔvi ewule nu yedwazo. Saa ɛhye si a yɛkɛnwu yɛ nyunlu yɛkɛdɛla dɛba ne bɔbɔ."

65 Paelɛte zele bɛ kɛ, "Bɛmaa bɛdabɛ bɛ Asɔne agbolisi ne mɔ ɛzinza. Bɛkola bɛsinza ye bɔkɔɔ."

66 Ɛhye ati bɛhɔle na bɛhɔyɛle sɛka ne nzonlɛ. Bɛzɔle bolɛ ne anloa, na sinzavolɛma ne mɔ noko bokale bɛ nwo bɛmaanle bɛzinzale.