1 Na wɔ Ɛnwomenlelielɛ Kenle ne, kenle ne mɔɔ li dapɛne ne anyunlu aleɛbahye, mɔɔ le Molɛ la, Male mɔɔ vi Magedala la nee Male ɛhendeɛ ne hɔle kɛ bɛkanlea sɛka ne.

2 Na nea, azɛlɛ kpusule kpole kpalɛ; ɔluakɛ Nana Nyamenle ye anwumabɔvolɛ ko vi anwuma dwule aze, na ɔrale ɔrahundole bolɛ ne ɔvile sɛka ne anloa, na ɔdɛnlanle zolɛ. 3 Na ɔ nyunlu dale wienyi kɛ ezule mɔɔ defedevede la, na ye tɛlɛdeɛ le fufule nwohyee kɛ asukɔntweaba. 4 Na ɔ nwo ɛzulole ti, bɛdabɛ mɔɔ bɛlɛsinza sɛka ne la anwo wozole bɛ, na bɛyɛle kɛ mɔwuamra.

5 Na anwumabɔvolɛ ne dendɛle hilele mraalɛ ne mɔ, na ɔzele bɛ kɛ, "Bɛmmasulo! Meze kɛ bɛlɛkpondɛ Gyisɛse, mɔɔ bɛbɔle ye meanubaka nu la, 6 na emomu, ɔnle ɛke! Ɔvi ewule nu yedwazo kɛmɔ ɔhanle ye la. Bɛrɛla sɛka ne anloa na bɛranlea ɛleka mɔɔ bɛdole ye la. 7 Na akee bɛhɔ ndɛndɛ ne ala na bɛhɔha bɛhile ye ɛdoavolɛma ne mɔ kɛ, ɔvi ewule nu yedwazo, na ɔlɛdumua bɛ nyunlu yeahɔ Galeli yeahɔyia bɛ wɔ ɛkɛ ne. Me nrɛlaleɛ mɔɔ melɛ ye mefa memaa bɛ la ɛne."

8 Mraalɛ ne mɔ vile sɛka ne anloa ndɛndɛ ne ala vindele, na bɛvale ɛzulolɛ nee fɛlɛkolilɛ kpole ne ala bɛnriandinle bɛhɔle kɛ bɛkaha bɛahile ye ɛdoavolɛma ne mɔ. 9 Na mɔɔ bɛnriandi la, arɛlevilɛ nu ala bɛnwunle kɛ Gyisɛse gyi bɛ nyunlu ɛkɛ, na ɔzele bɛ kɛ, "Bɛ muala bɛli fɛlɛko." Na bɛ muala bɛrale bɛrasosɔle ɔ gyakɛ, na bɛhotole ye na bɛyeyɛle ye.

10 Na akee Gyisɛse zele bɛ kɛ, "Bɛmmasulo! Bɛhɔ bɛhɔha bɛhile me mediema ne mɔ kɛ, bɛhɔ Galeli ndɛndɛ zo, na ɛkɛ ne a bɛbanwu me a."

11 Mɔɔ mraalɛ ne mɔ lua adenle nu bɛkɔ la, Asɔne Sua Kpole ne anu sinzavolɛma ne anu bie mɔ rale sua ne azo na bɛrahanle ninyɛne mɔɔ zile la amuala bɛhilele azɛlɛvolɛ mgbanyinli ne mɔ. 12,13 Na bɛ nee Dwuuma mgbanyima ne mɔ yiale nu na bɛvale akpame la, bɛmaanle sogyama ne ndoloboa kpole bie, na bɛzele bɛ kɛ, "Bɛha ye kɛ, nɔe mɔɔ yɛlale la ye ɛdoavolɛma ne mɔ rale rawuale ye funli ne.

14 "Na saa Amɛnlado ne te a yɛbali bɛ ti edwɛkɛ yɛamaa bɛ."

15 Ɔti sinzavolɛma ne mɔ liele ndoloboa ne, na bɛhanle mɔɔ bɛzele bɛ kɛ bɛha la bɛhilele Dwuuma ne mɔ. Bɛ adawu ɛhye kpondenle kpole kpalɛ wɔ Dwuuma avinli, na ɛnɛ nee ɛnɛ ala bɛdie bɛdi ye bɔkɔɔ.

16 Akee ɛdoavolɛma bulu nee ko ne zile nu hɔle Galeli, wɔ boka ne mɔɔ Gyisɛse hilele bɛ kɛ bɛbanwu ye wɔ ɛkɛ la azo. 17 Ɛkɛ ne yɛɛ bɛyiale ye na bɛzonlenle ye a, noko akee bɛ nuhua bie mɔ zule nwolɛ kpolera, ɔluakɛ, bɛanlie bɛanli kɛ amgba ɔdaye Gyisɛse ɔ.

18 Na Gyisɛse rale na ɔrazele ye ɛdoavolɛma ne mɔ kɛ, "Bɛva tumi kosooti mɔɔ wɔ anwuma nee aze la bɛwula me sa nu. 19 Ɛhye ati bɛhɔ bɛhɔyɛ maanle kosooti me ɛdoavolɛma na bɛzɔne bɛ wɔ Selɛ ne, nee Ralɛ ne, nee Sunsum Nwuanzanwuanza ne duma nu. 20 Na bɛhilehile ɛdoavolɛma ne mɔ ɛhye: kɛ bɛli mɛla mɔɔ mehyehyɛ la amuala azo; na bɛnlea ɛhye boɛ, me nee bɛ de dahuu dahuu, kɔkpula ewiade awieleɛ ne."