1 Kenle mɔɔ Belemgbunli Hɛlɔdo dele Gyisɛse nganeɛ la 2 ɔzele ye menli ne mɔ kɛ, "Ɔzɔho kɛ Dwɔn Sɔnevolɛ ne ɛzia ɛra ngoane nu bieko. Ɛhye ati a ɔkola ɔyɛ nwanwane ninyɛne ɛhye mɔ la." 3,4 Ɔluakɛ, ɔlua Hɛlɔdease, ɔ diema Felepe aye dɛba ne ati ɔmaanle bɛhyele Dwɔn bɛguale ye nwɔnzɔnwɔnzɔ na bɛdole ye efiade, ɔboalekɛ ɛnee Dwɔn ɛha ɛhile Hɛlɔdo kɛ ɔnva mɛla nu kɛ ɔkɛgya ye. 5 Anrɛɛ ɔkɛhu Dwɔn, noko akee ɛnee ɔsulo kɛ basabasa kɛzi, ɔluakɛ menli ne kosooti liele lile kɛ Dwɔn le kapezonli.

6 Na wɔ Hɛlɔdo awolɛ kenle ɛvoyialilɛ ne anu, Hɛlɔdease ara raalɛ ne zile agole maanle ɔzɔle ɔ nye totohyia, 7 ɔti ɔhanle ndane ɔbɔle ɛwɔkɛ kɛ debie biala mɔɔ ɔkpondɛ la ɔbava yeamaa ye. 8 Kakula bɛlɛra ne ɔ nli hyɛle ye maanle ɔbizale ɔzele kɛ: "Mekulo Dwɔn Sɔnevolɛ ne ati mɔɔ bɛpɛ na ɔla ayera apawa zo la."

9 Ɛhye maanle nyane totohyia hanle belemgbunli ne. Na kɛmɔ ɛnee yeha ndane na ɔnrɛhulo kɛ ɔkɛbulu zo wɔ ye nyɛvolɛ ne mɔ anyunlu la ati, ɔzoanle.

10 Ɔmaanle bɛhɔpɛle Dwɔn mɔɔ ɛnee la efiade la ati, 11 na bɛdole ye wɔ apawa zo, na bɛvale bɛrɛlɛle kakula raalɛ ne na ɔdaye noko ɔvale ɔhɔmaanle ɔ nli.

12 Na akee Dwɔn ye ɛdoavolɛma ne mɔ rale ravale ye funli ne na bɛhɔziele ye, na akee bɛhɔbɔle Gyisɛse amanee wɔ mɔɔ ɛzi la anwo.

13 Na mɔɔ Gyisɛse dele adawu ne ɛkɛ ne ala la, ɔvole ɛlɛne nu na ɔ ngomekye ɔhɔle ɛleka fealera bie mɔɔ awie biala ɛnle ɛkɛ ne la. Na mɔɔ menli dɔɔnwo ne dele ɛleka mɔɔ ɔbɔle ɔ ti la bɛvi namunamu dɔɔnwo anu bɛvale aze bɛkpole ye.

14 Na mɔɔ Gyisɛse vindele ɛnweanloa la, ɛnee menli dɔɔnwo kpalɛ de ɔ nzi ɛlɛkendɛ ye, na ɔlile bɛ nwo nyane na ɔyɛle bɛ nuhua ne mɔ mɔɔ bɛnde kpɔkɛ la ayile.

15 Nɔsolɛ ko ne ala, ye ɛdoavolɛma ne mɔ rale ɔ nwo ɛkɛ ne na bɛzele ye kɛ, "Aleɛlilɛ mekɛ ɛkpa nwo, na aleɛ biala noko ɛnle ɛsɛlɛ ye azo ɛmmaa bɛ mɔɔ bɛdi a; maa menli dɔɔnwo ɛhye mɔ ɛhɔ kɛ saa gyengyɛne nu biala bɛkenyia aleɛ wɔ namunamu ne mɔ azo bɛkɛdɔ bɛkɛli a."

16 Na Gyisɛse buale bɛ kɛ, "Ɛhye ɛngyia; bɛmɛ bɛmaa bɛ debie bɛmaa bɛli!"

17 Bɛyele ɔ nloa bɛzele kɛ, "Yɛlɛ kpanwo dolɔfo ngyikyi nnu nee fɛlɛ nwiɔ pɛ ala!"

18 Gyisɛse zele bɛ kɛ, "Bɛva bɛrɛlɛ me."

19 Na akee ɔzele menli ne kɛ bɛdɛnla aze wɔ ndile ne azo; na akee ɔvale kpanwo dolɔfo nnu ne nee fɛlɛ nwiɔ ne, na ɔnleanle anwomanyunlu na ɔzɛlɛle Nana Nyamenle nyilalɛ ɔguale aleɛ ne azo, na akee ɔbubule kpanwo dolɔfo nnu ne anu na ɔvale ɔmaanle ye ɛdoavolɛma ne mɔ kɛ bɛhyɛ bɛmaa menli ne mɔ. 20 Na awie biala lile bie na bɛ ko yiyile tetɛkɛɛ. Na mɔɔ bɛsesale ɔ bo zo mgbokpoleka ne amozii la, bɛnyianle ahɛndɛne tetɛkɛɛ bulu nee nwiɔ. 21 Mrenyia nee mraalɛ nee ngakula mɔɔ lile aleɛ ne zɔhane kenle ne la le kɛyɛ apenle nnu. 22 Ɛhye anzi, Gyisɛse maanle ye ɛdoavolɛma ne mɔ vole bɛ ɛlɛne nu bɛpɛle azule tandane ne bɛhɔle ɔ nzi nehane, na yemɔ ɔhale ɛkɛ ne kɛ ɔnea yeamaa menli ne mɔ ahɔ bɛ azua nu.

23,24 Ɛhye anzi, akee ɔhɔle awoka ne mɔ azo kɛ ɔkazɛlɛ. Aleɛ dwole, na ɛdoavolɛma ne mɔ anwo hyelele bɛ wɔ azule tandane ne anye. Ɔluakɛ anwoma ne dule na bɛyiale azɛlɛkye mgbole.

25 Bɛbɔle aleɛbahye kɛyɛ dɔne nna la, Gyisɛse rale bɛ nwo ɛkɛ, na ɔlua azule ne anye! 26 Bɛdeɛdeanle nu ɛzulolɛ nu ala, ɔluakɛ, bɛdwenlenle kɛ ɔle nwomenle.

27 Na ndɛndɛ ne ala, Gyisɛse dendɛlɛle hilele bɛ, na ɔmaanle bɛ arɛlekyekyelɛ ɔzele bɛ kɛ, "Bɛmmasulo!"

28 Na akee Pita vɛlɛle ye na ɔzele ye kɛ: "Yɛmenle, saa ɛdawɔ amgba ɛdeɛ a ɛnee maa medame noko menlua azule ne anye membɛla ɛ nwo ɛkɛ ne."

29 Awulae kponlenle zo na ɔzele ye kɛ, "Bɛla." Ɔti Pita vale ɛlɛne ne foa ko na ɔtietiale azule ne anye ɔbikyele Gyisɛse. 30 Na mɔɔ ɔnwunle azɛlɛkye mgbole ne mɔ la, ye ahonle dule somaa ne ala na ɔbɔle ɔ bo kɛ ɔnoma. Ɔdeanle nu ɔzele kɛ, "Awulae! Die me!"

31 Na ɛkɛ ne ala Gyisɛse dendenle ɔ sa na ɔzɔle ye nu. Gyisɛse zele kɛ, "O wɔ diedi le ekyi amgba! Duzu ati a ɛnlie me ɛnli a?" 32 Na mɔɔ bɛvole ɛlɛne ne anu la anwoma ne gyakyile ɛdulɛ.

33 Ɔyɛle ɛdoavolɛma ne mɔ mɔɔ ɛha wɔ ɛlɛne ne anu la azibɛnwo, na bɛyeyɛle ye bɛzele kɛ, "Amgba wɔmɔ a ɛle Nyamenle Ra ne a!"

34 Bɛdwule aze wɔ Gɛnɛzalɛte. 35 Na bɛ ɛralɛ ne anwo edwɛkɛ kpondenle sua kpole ne azo ndɛndɛ ne ala, na yeangyɛ biala menli vale ɛnriandinlɛ kpɔsale nu bɔle awie biala amaneɛ kɛ ɔva ye wuliravolɛ ɔhɔ ɔmaa bɛyɛ ye ayile. 36 Wuliravolɛma ne bodole ye kɛ ɔmaa bɛ adenle ɔmaa bɛzɔ ye tɛladeɛ ne anloa mgbane bɔbɔ, na bɛ nwo baza, na amgba menli mɔɔ zɔle nuhua la amuala anwo zale.