1 Akee Gyisɛse zele menli dɔɔnwo ne nee ye ɛdoavolɛma ne mɔ kɛ, 2 "Dwuuma mgbanyima ɛhye mɔ nee Falasiima ɛhye mɔ a de Mosisi ebia ne azo a! 3 Zɔhane ati bɛli mɔɔ bɛkɛha la biala azo! Ɔle kpalɛ kɛ bɛkɛli debie biala mɔɔ bɛkɛha la azo, na emomu, bɛmmanea bɛ nyɛleɛ ne mɔ azo bɛyɛ bie. Ɔluakɛ bɛnli mɔɔ bɛka bɛkile bɛ kɛ bɛyɛ la azo. 4 Bɛfa adesoa mgbole mgbole bɛsoa bɛ, mɔɔ bɛdabɛ mumua ne bɔbɔ bɛmbɔ mɔdenle kɛ bɛkɛzɔ nu a.

5 "Debie biala mɔɔ bɛyɛ la le ɛnyelɛ zo yekile ala. Bɛfa nzɛbɛ mɔɔ Nyamedwɛkɛ wɔ nu la bɛkendɛhenda bɛ awane ne mɔ azo, bɛyɛ kɛ asɛɛ bɛ nwo te, na bɛyɛ bɛ patakali ne mɔ huhuhaa. 6 Na bɛkulo mgbanyinli tɛnlabelɛ wɔ ɛkponledolɛ bo, ɔ nee mgbanyinli mbia zo ɛdɛnlanlɛ wɔ ayialeka ne! 7 Bɛkulo gua zo ahyebizalɛ, nee kɛ menli kɛzi kɛvɛlɛ bɛ ‘Rabbi’ nee ‘Yɛmenle’ la! 8 Na bɛmɛ, bɛmmamaa awie biala fɛlɛ bɛ zɔhane, ɔluakɛ, Nyamenle angomekye a le bɛ ‘Rabbi’ anzɛɛ bɛ Kilehilevolɛ a, na bɛ muala bɛle mediema. 9 Bɛmmafɛlɛ awie biala wɔ azɛlɛ ye azo ɛke kɛ ‘Egya’, ɔluakɛ Nana Nyamenle mɔɔ wɔ anwuma la angomekye yɛɛ ɔwɔ kɛ bɛfɛlɛ ye zɔhane a. 10 Bɛmmamaa bɛfɛlɛ bɛ ‘Yɛmenle mɔ’, ɔluakɛ, sonla ko ala a le bɛ menle a, na yemɔ a le Ngoanedievolɛ ne.

11 "Wɔ kpoleyɛlɛ ne wɔ kɛsi mɔɔ ɛsonle menli la anu. Saa ɛkulo kɛ ɛyɛ kpole a, ɛnee yɛ ɛ nwo akɛlɛ. 12 Ɔluakɛ awie biala mɔɔ kɛmemaa ɔ nwo zo la bɛkɛbɛlɛ ye aze; yɛɛ biala noko mɔɔ kɛbɛlɛ ɔ nwo aze la bɛkɛmaa ye zo anwuma anwuma.

13,14 "Munzule ɛha bɛdabɛ Falasiima ne mɔ, ɔ nee bɛdabɛ asɔne mgbanyima mɔɔ bɛha la. Adalɛ nabalabama! Bɛnrɛmaa menli mɔɔ ɛha la ɛnrɛhɔ Anwuma belemgbunli maanle ne anu, yɛɛ bɛdabɛ mumua ne noko bɛnrɛhɔ nu bie ɛlɛ. Noko akee bɛyɛ nzɛlɛlɛ ndendenle bagua nu wɔ awɔlɔne ne mɔ azo kɛ asɛɛ bɛ nwo te, wɔ melɛ mɔɔ bɛfoa kunlavolɛma bɛfi bɛ aako ne mɔ anu la. Adalɛ nabalabama! 15 Ɛhɛe, munzule ɛha bɛdabɛ adalɛ nabalabama. Ɔluakɛ bɛfa adenle tendendenlenle bie anu a bɛkakyi ɛtanevolɛ ko a, na akee bɛahakyi ye bɛayɛ ye abɔnsam sua zo ara fane nwiɔ kɛmɔ bɛdabɛ mumua ne bɛde la. 16 Anyezinliravoma adekilevoma! Munzule ɛha bɛ! Ɔluakɛ bɛ ngyehyɛleɛ a le kɛ saa ɛfa ‘Nana Nyamenle Asɔne Sua’ ne ɛka ndane a ɔnyɛ ɛhwee, bɛkola bɛbulu zo, na emomu saa bɛfa ‘nvutuke ne mɔɔ wɔ Asɔne sua’ ne anu la bɛka ndane a yemɔ ɔbadɔ bɛ nwo zo. 17 Anyezinliravolɛma ahoasea! Nvutuke ne nee Asɔne Sua ne boni a hyia kpalɛ a, anzɛɛ Asɔne Sua ne mɔɔ te nvutuke ne anwo la ɔ? 18 Na bɛmɛ bɛse saa ɛfa ‘azukponle ne’ ɛka ndane a, ɛkola ɛbulu zo, na emomu saa ɛfa ‘ahyɛlɛndeɛ ne mɔ mɔɔ gua azukponle ne azo’ la ɛka ndane a, yemɔ ɔtɔ ɛ nwo zo! 19 Anyezinliravolɛma ahoasea! Boni a hyia kpalɛ a, ahyɛlɛndeɛ ne mɔɔ gua azukponle ne azo la, anzɛɛ azukponle ne mɔɔ maa ahyɛlɛndeɛ ne anwo yɛ nwuanzanwuanza la ɔ? 20 Saa ɛfa ‘Azukponle’ ne ɛka ndane a, ɛnee wɔva azukponle ne nee debie biala mɔɔ gua zo la amuala wɔha ndane, 21 yɛɛ saa ɛfa ‘Asɔne Sua’ ne ɛka ndane a, ɛnee wɔva Asɔne Sua ne nee Nana Nyamenle mɔɔ de nu la wɔha ndane ne. 22 Na saa ɛfa ‘anwuma anwuma’ ɛka ndane a, ɛnee wɔva Nana Nyamenle ye Belemgbunli Ebia ne nee Ɔdaye mumua ne wɔha ndane.

23 "Ɛhɛe, munzule ɛha bɛdabɛ Falasiima ne mɔ, ɔ nee bɛdabɛ asɔne mgbanyima ne mɔ, adalɛ nabalabama! Ɔluakɛ debie biala mɔɔ awie biala kɛnyia ye, la bɔbɔ tola nu aleɛ, bɛkyɛ nu bulu na bɛdie bɛ deɛ ko ne, noko akee bɛbu bɛ nye bɛgua ninyɛne mɔɔ hyia mɔɔ le kɛ pɛpɛlilɛ nee anwunvɔnezelɛ nee diedi la azo. Ɛhɛe, ɔwɔ kɛ bɛdie, na emomu, ɔnle kɛ bɛgyakyi ninyɛne ne mɔ mɔɔ hyia la zɔhane ala. 24 Anyezinliravolɛma adekilevoma! Bɛtwe akowule ye mogya ne bɔkɔɔ na akee bɛame afunlumu ye mumua ne.

25 "Munzule ɛha bɛdabɛ Falasiima ne nee bɛdabɛ asɔne mgbanyima ne mɔ, adalɛ nabalabama! Bɛkpuda kanrɛlɛ ne anwo bɔkɔbɔkɔ zɛhae, na akee bɛagyakyi ɔ kunlu ne mɔɔ evinli ne wɔ la bɛazie ye ɛkɛ, ɛkɛ ne yɛɛ mɛlɛbɛlavoma nee adidikpokuvoma ne mɔ veɛvea a. 26 Falasiima anyezinliravolɛma! Anrɛɛ bɛlumua bɛwowo kanrɛlɛ ne akunlu ne kolaa, na kanrɛlɛ mumua ne ɛleka biala bayɛ bɔkɔbɔkɔ zɛhae.

27 "Munzule ɛha bɛdabɛ Falasiima ne mɔ, nee bɛdabɛ asɔne mgbanyima ne mɔ! Bɛle kɛ azɛka mɔɔ bɛhwi nwolɛ ngɛnlɛma na bɛ nuhua a avunli mbowule nee ninyɛne mɔɔ ɛzekye la gua la. 28 Bɛyɛ bɛ nwo kɛ asɛɛ bɛ nwo te la, noko akee wɔ bɛ nu ɛdeɛ, adalɛbɔlɛ nee amumuyɛyɛlɛ kosooti ɛyi bɛ tɔ.

29,30 "Ɛhɛe, munzule ɛha bɛdabɛ Falasiima ne mɔ, nee bɛdabɛ asɔne mgbanyima ne mɔ, adalɛ nabalabama! Ɔluakɛ, bɛsi ngakyelɛdeɛ bɛmaa ngapezoma ne mɔ mɔɔ bɛ ze mɔ hunle bɛ la, na bɛfa felawɔse bɛgua menli mɔɔ sonle Nyamenle mɔɔ bɛ ze mɔ hunle bɛ la azɛka ne mɔ azo, na bɛaze kɛ, ‘Saa yɛ mekɛ zo a anrɛɛ yɛnrɛyɛ mɔɔ yɛ ze mɔ yɛle la bie.’

31 "Ɛhye kile kɛ bɛlɛdi daselɛ kɛ bɛdabɛ mɔɔ bɛhunle kapezoma ne mɔ la amra a le bɛ. 32 Ɔti akee bɛva bɛ gyakɛ, na bɛlɛyɛ bɛ nyɛleɛ ɛtane ne mɔ bie. 33 Nwɔlɛ Bɔna mralɛ! Kɛ bɛkɛyɛ na bɛanli fɔlɛ wɔ ndɛnebualɛ ne anu, na bɛangɔ abɔnsam sua zo ɛ?

34 "Ɛhye ati, bɛnlea, mebazoa ngapezoma nee nrɛlɛbɛvolɛma, nee kɛlɛvolɛma wɔ bɛ ɛkɛ, na bɛbahu bɛ nuhua bie mɔ, na bɛabɔ bɛ meanumbaka nu; bɛbabila bɛ nuhua bie mɔ noko empele wɔ bɛ ayiasua ne mɔ anu, na bɛawula bɛ ateetee bɛavi sua zo bɛahɔ sua zo, 35 amaa mogya tenlene mɔɔ bɛha bɛgua azɛlɛ ye azo amuala la agua bɛ nwo zo, ɔbɔ ye tenlenenli Ebulu mogya zo mɔɔ kɔkpula Bɛlakaya ara Zɛkalaya, mɔɔ bɛhunle ye wɔ Asɔne Sua Kpole ne anu wɔ azukponle ne nee anwoziezielɛleka ne bɛ avinli la mogya ne mɔ anwo zo. 36 Nɔhalɛ, bɛbava ɛvolɛ ɛya ɛhye amuala anu ndɛnebualɛ ne amuala bɛakpolo ɛlɔne ɛhye ati.

37 "O Gyɛlusalɛm, Gyɛlusalɛm, wɔmɔ mɔɔ ɛku ngapezoma ne mɔ, na ɛkpa bɛdabɛ mɔɔ Nana Nyamenle ɛzoa bɛ wɔ ɛ nwo la awolɛ a! Fane nyɛ a mengulole kɛ menwɔboɔboa ɛ mra anloa kɛmɔ akɔlɛ ɛrɛladane kuohua ɔ mra anloa wɔ ɔ ndɛba abo ɔkeda bɛ nwo zo a. Noko akee bɛangulo. Bɛammaa me adenle. 38 Na yemɔ noko a kɛkala bɛ sua ne ɛdɔ mgbane la. 39 Na mese bɛ kɛ, bɛnrɛnwu me bieko ɛlɛ, kɔkpula kɛ bɛkɛyɛ anwomoalɛ kɛ bɛkɛlie ahenle ko ne mɔɔ Nana Nyamenle ɛzoa ye wɔ bɛ lɔ la."