1 Na mɔɔ bɛbikyele Bethphage nee Bɛtefagye mɔɔ wɔ Gyɛlusalɛm kandiba la, Gyisɛse zoanle ye ɛdoavolɛma ne mɔ anu nwiɔ maanle bɛlumuale, na ɔ nee mɔɔ ɛha la hendɛle Boka Ɔlivi ne azo.

2 Ɔzele nwiɔ ne kɛ, "Bɛhɔ namule ne mɔɔ wɔ lɔ la azo, na bɛbanwu ɛkpɔnwɔ ralɛ mɔɔ bɛhenda ye, na awie biala ɛtɛtɛnlanle zo ɛlɛ la. Bɛzanyi ye na bɛva ye bɛrɛla ɛke. 3 Na saa awie biala biza bɛ nwolɛ edwɛkɛ a, bɛze ye ala kɛ, ‘Yɛ menle ɛhyia ɔ nwo, na ɔnrɛhyɛ biala ɔ nee ye bazia ara.’ "

4,5 Ɛdoavolɛma nwiɔ ne mɔ hɔle la, amgba noko bɛnwunle ɛkpɔnwɔ ne mɔɔ bɛhenda ye la wɔ adenle ne anu wɔ sua bie anzi. Na mɔɔ bɛsanyi ye la, menli mɔɔ gyigyi ɛkɛ ne la bie mɔ bizale bɛ kɛ, "Na duzu a bɛlɛyɛ la? Duzu ati a bɛlɛsanyi ye a?"

6 Ɔti bɛhanle mɔɔ Gyisɛse zele bɛ kɛ bɛha la, na amgba noko bɛmaanle bɛ adenle.

7 Ɔti bɛvale ɛkpɔnwɔ ralɛ ne bɛrɛlɛle Gyisɛse, na ɛdoavolɛma ne mɔ vale bɛ ndɛladeɛ ne mɔ guale ɔ nwo zo maanle ɔdɛnlanle zolɛ. 8 Na menli dɔɔnwo ne anu bie mɔ noko vale bɛ ndanlɛ sesɛle ɔ nyunlu ɛkɛ ne aze wɔ adenle ne anu, na bie mɔ noko vale mrɛlakɛ nee nya guale adenle ne anu maanle ye.

9 Akee bɛdole ɛlɔnwɔne ɔ nyunlu nee ɔ nzi, yɛɛ ɔli bɛ avinli a, na bɛ muala bɛdeɛdeanle nu bɛzele kɛ, "Nyilalɛ ɛha Belemgbunli ne!" "Nyilalɛ ɛha mɔɔ ɔlua Awulae duma nu ɔlɛba la!" 10 "Nyilalɛ ɛha Nyamenle wɔ yɛ ze Devidi belemgbunli maanle ne ye ɛzialɛ nwo." "Nyilalɛ ɛha anwuma anwuma Belemgbunli ne!"

11 Gyisɛse dwule Gyɛlusalɛm na ɔhɔle Asɔne Sua Kpole ne anu. Na ɔgyelele ɔ nye ɔnleanle debie biala mɔɔ wɔ ɛkɛ ne la kpalɛ na akee ɔvile ɛkɛ ɔhɔle-ɔluakɛ ɛnee maanle nu ɛlɛba aramua, ɔti ɔ nee ɛdoavolɛma bulu nee nwiɔ ne hɔle Bɛtani.

12 Nwonlomɔ ne mɔɔ bɛfi Bɛtani la, ɛnee ɛhɔne ɛlɛku ye. 13 Mɔɔ bɛhɔle ekyii la, ɔnwunle dɔma baka bie mɔɔ ɛwula nya fii a, ɔti ɔhɔle ɔ bo kɛ ɔkakpondɛ ye ma ne bie yeali. Na yeannyia ɛhwee, ɔluakɛ, ɛnee ye ɛzolɛ mekɛ ne tɛbɔ amozi.

14 Na Gyisɛse zele baka ne kɛ, "Ɛnrɛzo ma bieko ɛlɛ!" Na ɛdoavolɛma ne mɔ noko dele kɛ ɔlɛka ɛhye.

15 Na mɔɔ bɛziale bɛhɔle Gyɛlusalɛm la, ɔhɔle Asɔne Sua Kpole ne anu bieko na ɔbɔle ɔ bo kɛ ɔfoa guadivolɛma ne mɔ nee bɛ ɛdɔvolɛma ne mɔ na ɔvuandinle bɛdabɛ mɔɔ bɛsenza ezukoa la ɛkponle ne mɔ ɔguale na eza ɔbubule bɛdabɛ mɔɔ bɛtɔne aabule nloma la kpɔda ne mɔ. 16 Na ɔzile menli mɔɔ lɛ ninyɛne adɔne ngakyile mɔɔ bɛ nee bɛ ɛlɛba nu la adenle.

17 Ɔzele bɛ kɛ, "Bɛhɛlɛ ye wɔ Ngɛlɛlera ne anu kɛ, ‘Me Asɔne Sua Kpole ne le nzɛlɛlɛleka maa ewiade amra amuala’, noko akee bɛmɛ bɛva bɛhakyi awulema tɛnlabelɛ."

18 Na mɔɔ azɛlɛvolɛ mgbanyinli ne mɔ nee Dwuuma mgbanyima ne mɔ dele deɛ mɔɔ yeyɛ la, bɛbɔle ɔ bo kɛ bɛsuzu adenle kpalɛ mɔɔ bɛdua nu a ɛnee bɛkɛye ye bɛkɛvi ewiade a. Noko ɛnee bɛsulo kɛ begyebegyeyɛlɛ anzɛɛ nzaka kɛzi, ɔluakɛ, awie biala hulole Gyisɛse ngilehilɛ ne kpalɛ.

19 Ye nɔsolɛ ne, Gyisɛse nee ye ɛdoavolɛma ne mɔ vile sua ne azo kɛmɔ bɛta bɛyɛ la. 20 Na nwonlomɔ ne mɔɔ ɛdoavolɛma ne mɔ dwule ɛleka mɔɔ dɔma baka ne mɔɔ ɔwale ye amonle ne la gyi la, bɛnwunle kɛ yegyengye ɔvi ye ndinli ne abo too ɔkɔkpula ɔ ti zo. 21 Na Pita hakyele mɔɔ Gyisɛse hanle hilele baka ne wɔ kenle ne mɔɔ ɛpɛ nu ɛze la, na ɔdeanle nu kɛ, "Awulae, nea! Dɔma baka ne mɔɔ ɛwale ye amonle la ɛgyengye!"

22,23 Na Gyisɛse bua bɛ la, ɔzele ɛdoavolɛma ne mɔ kɛ, "Saa bɛlɛ diedi wɔ Nana Nyamenle anu a, nɔhalɛ tagyee ne ɛne, bɛbahola bɛaze Boka Ɔlivi ɛhye kɛ, ‘Tu twi wɔ ɛke na kɔgua Nyevile Tandane ne anu lɔ,’ na ɔbayɛ zɔ noko. Deɛ mɔɔ hyia ala la a le kɛ bɛkɛlie bɛkɛli na bɛnrɛzu nwolɛ kpolera! 24 Bɛdie me! Saa bɛlɛ diedi a debie biala mɔɔ bɛkɛzɛlɛ la bɛ sa baha ye! 25 Emomu, saa ɛyɛ asɔne a, dumua fa awie biala mɔɔ ɛ nee ye lɛ edwɛkɛ la ɛtane kyɛ ye, amaa ɛ Ze ne mɔɔ wɔ anwuma la noko ava wɔ ɛtane ɛdeɛ ne ahyɛ wɔ, ɔluakɛ, saa wɔanva ɛtane wɔangyɛ a, ɛ Ze ne mɔɔ wɔ anwuma la noko ɛnrɛva wɔ deɛ ne ɛnrɛhyɛ wɔ ɛlɛ." 26-28 Mekɛ ɛhye anu ɛnee akee bɛdwu Gyɛlusalɛm bieko, na mɔɔ ɔlua Asɔne Sua Kpole ne anu la, azɛlɛvolɛ mgbanyinli ne mɔ nee Dwuuma mgbanyima ne bie mɔ rabizale ye kɛ, "Duzu a ɛlɛkɔ zo wɔ ɛke a? Nwane a maanle wɔ tumi kɛ ɛvoa guadivolɛma ne mɔ a?"

29 Gyisɛse buale bɛ kɛ, "Mebabiza bɛ edwɛkɛ ko, na saa bɛbua me nwolɛ a, medame noko mebabua bɛ! 30 Duzu a bɛka ye wɔ Dwɔn Sɔnevolɛ ne anwo a? Nana Nyamenle a zoanle ye, anzɛɛ? Anzɛɛ nwane a zoanle ye a? Bɛbua me!"

31 Bɛzuzule ɛhye anwo wɔ bɛ avinli dedee la ɛnee akee mɔɔ bɛka ye bɛ kominza abo la a le kɛ, "Saa yɛse kɛ, Nana Nyamenle a zoanle ye a, ɔbaze yɛ kɛ, ‘Wioo, na duzu ati a bɛanlie ye bɛanli a?’ 32 Emomu saa yɛse kɛ, tɛ Nana Nyamenle noko a zoanle ye a, ɛnee yɛnwu amaneɛ wɔ menli dɔɔnwo ɛhye asa anu." Ɔluakɛ, menli ne amuala liele lile ɛsesebɛ ne ala kɛ Dwɔn le kapezonli.

33 Ɔti bɛzele ye kɛ, "Yɛnrɛhola ɛhye bua. Yɛnze." Na Gyisɛse noko buale bɛ kɛ, "Saa ye zɔ ɛdeɛ a ɛnee medame noko menrɛhola bɛ kpuyia deɛ ne anloa ye!"