1 Amozi ye ɔ nee ye ɛdoavolɛma ne mɔ ziale rale Nazalɛte ye sua zo. 2,3 Na mɔɔ Ɛnwomenlelielɛ Kenle bieko dwule la, ɔhɔle ayiasua ne anu kɛ ɔkahile debie, na ye nrɛlɛbɛ nee ye nwanwanendeɛ ne mɔ zinle menli ne mɔ anwo, ɔluakɛ, ɔle ɛkulomani kɛ bɛdabɛ ala la.

Ɛhye ati bɛzele kɛ, "Ɔndɛla yɛ wɔ debie biala anu. Ɔle kapentanli ala. Ɔ nli a le Male, yɛɛ ɔ mediema noko a le Gyemise, ɔ nee Dwosefi, Dwudase, yɛɛ Saemɔn. Yɛɛ ɔ mediema mraalɛ ne mɔ noko nee yɛ a de a." Na bɛambu ye bie, ɔluakɛ ɛya hunle bɛ somaa!

4 Na akee Gyisɛse zele bɛ kɛ, "Kapezonli biala lɛ anyunlunyia wɔ ɛleka biala, kyesɛ wɔ ye sua zo nee ye awovolɛma avinli nee ɔdaye mumua ne ye abusua nu." 5 Na ɔlua bɛ diedi mɔɔ bɛnlɛ la ati, yeangola yeanyɛ nwanwanendeɛ ɛzulolɛ biala wɔ bɛ nu, na emomu, wuliravolɛma ekyi bie ala a ɔvale ɔ sa ɔguale bɛ nwo zo ɔmaanle bɛ nwo zale a. 6 Na yeanlie yeanli amgba ala kɛ bɛnrɛnyia diedi wɔ ye nu.

Akee ɔhɔle namunamu ne mɔ anu kɛ ɔkahilehile bɛ debie. 7 Ɔvɛlɛle ye ɛdoavolɛma bulu nee nwiɔ ne mɔ na ɔzoanle bɛ nwiɔ nwiɔ, na ɔmaanle bɛ tumi kɛ bɛva bɛdu awozonle awozonle. 8,9 Ɔzele bɛ kɛ bɛmmafa debie biala, kyesɛ bɛ agbɔma ala. Ɔse, bɛmmafa aleɛ, kodoku, ezukoa, anzɛɛ mgbɔlaboa nee ndɛladeɛ gyɛne biala bɔbɔ bɛboka mɔɔ bɛwula la anwo.

10 Eza ɔzele bɛ kɛ "Sua biala mɔɔ bɛkɛdwu zo la, bɛzokoɛ aako ko ala anu, bɛmmawolowolo azua azua." 11 Ɔvale ɔzɔle zo kɛ: "Sua biala mɔɔ ɛnrɛlie bɛ, anzɛɛ ɛnrɛdie bɛ la, saa bɛkɔ a bɛkpokpo bɛ mgbɔlaboa ne mɔ abo ɛnwea ne bɛgua ɛkɛ kolaa na bɛavi ɛkɛ ne; ɛhye le sɛkɛlɛneɛ kɛ bɛgyakyi ye bɛmaa ɔdaye ye gyinlabelɛ biala mɔɔ ɔwɔ nu la."

12 Ɔti amgba noko ɛdoavolɛma ne mɔ zile nu hɔle, na bɛzele menli biala mɔɔ bɛ nee bɛ yiale la kɛ bɛhwe bɛ nwo bɛvi ɛtane nwo. 13 Yɛɛ eza noko bɛdule awozonle dɔɔnwo, na bɛvale "Ɔlivi" nwole bɛyɛle wuliravolɛma ayile.

14 Na yeangyɛ biala yɛɛ Belemgbunli Hɛlɔdo dele Gyisɛse nganeɛ a, ɔluakɛ, ɛnee ye nwanwanendeɛ ne mɔ anwo edwɛkɛ ɛzande ɛleka biala. Belemgbunli ne dwenlenle kɛ Dwɔn Sɔnevolɛ ne a ɛdwazo ɛra ngoane nu bieko a. Ɛhye ati menli ne zele kɛ, "Ɔnyɛ ɛzulolɛ kɛ ɔkola ɔyɛ nwanwanendeɛ ɛhye mɔ a." 15 Bie mɔ noko dwenlenle kɛ Yilaegya mɔɔ ɔle tete kapezonli ne la a ɛzia ɛra ngoane nu bieko a; yɛɛ bie mɔ noko adwenle a le kɛ kapezonli fofolɛ bie mɔɔ ɔle kɛ dɛba ne mgbanyima ne mɔ la bie ɔ.

16 Na Hɛlɔdo zele kɛ, "Kyɛkyɛ, Dwɔn mɔɔ memaanle bɛpɛle ɔ ti la yemɔ yɛɛ ɛdwazo ɛra ngoane nu a."

17,18 Ɛnee Hɛlɔdo ɛzoa azogya kɛ bɛhɔhye Dwɔn bɛdo ye efiade, ɔluakɛ, yemɔ Dwɔn ɔzele Hɛlɔdo kɛ ɔtia mɛla kɛ ɔkɛgya Hɛlɔdease, mɔɔ ɔle ɔdaye ɔ diema Felepe aye la. 19 Hɛlɔdease hulole kɛ bɛkɛhu Dwɔn, noko wɔ melɛ ala mɔɔ Hɛlɔdo ɛtɛmaanle ye adenle la, ɔnlɛ tumi biala. 20 Na kɛmɔ Hɛlɔdo noko nwunle kɛ Dwɔn le sonlakpalɛ, na eza ɔle nwuanzanwuanzanli la ati, ɔwowale ye dahuu ne ala. Mekɛ biala mɔɔ Hɛlɔdo nee Dwɔn kɛdendɛ la, ye adwenle yɛ ye kesee, noko akee ɛhye mɔ amuala anzi bɔbɔ, ɔhulole kɛ dahuu ɔkɛdie ye.

21 Hɛlɔdease munzule adwenle ne mekɛ dwule wɔ Hɛlɔdo awole kenle pilasilililɛ ne abo. Hɛlɔdo dole ɛkponle kpole bie maanle ye boavolɛma ne mɔ nee ye azogya mgbanyinli, nee bɛdabɛ mɔɔ bɛdi munli wɔ Galeli maanle ne anu la amuala. 22,23 Akee Hɛlɔdease ara raalɛ bie rale ɛkɛ ne razile agole mɔɔ maanle awie biala anye liele a. Ɛhye ati Hɛlɔdo bɔle ye ɛwɔkɛ ɔzele ye kɛ, "Biza me debie biala mɔɔ ɛkulo la, na ɛ sa baha ye; saa me belemgbunli maanle ne foa ko bɔbɔ a mebava meamaa wɔ!"

24 Bɛlɛra ne noko hɔfetele zo hilele ɔ nli, na ɔ nli noko zele ye kɛ, "Kɔbiza na die Dwɔn Sɔnevolɛ ne ati ne bɛla!"

25 Amgba noko ɔvale ɛnriandinlɛ ndɛndɛ ne ala ɔhɔzele belemgbunli ne kɛ, "Mekpondɛ Dwɔn Sɔnevolɛ ne ati kanrɛlɛ ne kɛkala, mɔɔ ɔla apawa zo a!"

26 Ɛhye yɛle belemgbunli ne nyane totohyia, noko akee yeangulo kɛ ɔkɛbulu ye ɛwɔkɛ ne azo wɔ ye menli ne mɔɔ bɛyia ɛkponledolɛ ne abo la anyunlu. 27 Ɛhye ati, ɔzoanle ye sinzavolɛma ne mɔ ko wɔ efiade ne kɛ ɔhɔpɛ Dwɔn ati ne ɔrɛlɛ ye. 28 Amgba noko sogyanli ne hɔhunle Dwɔn wɔ efiade ne, na ɔvale ɔ ti ne ɔdole apawa zo ɔrale, na ɔvale ɔmaanle bɛlɛra ne, na ɔdaye noko ɔvale ɔhɔmaanle ɔ nli.

29 Na mɔɔ Dwɔn ɛdoavolɛma ne mɔ dele mɔɔ ɛzi la, bɛravale ye funli ne na bɛhɔziele ye.

30 Gyisɛse ɛdoavolɛma ne mɔ noko vi bɛ ɛzoanlɛ ne rale, na bɛrahanle mɔɔ bɛyɛle nee mɔɔ bɛhanle la amuala bɛhilele ye.

31 Na Gyisɛse noko zele bɛ kɛ, "Bɛmaa yɛvi menli dɔɔnwo ɛhye anu yɛhɔlie yɛ menle ekyii." Ɔluakɛ, ɔlua menli dɔɔnwo ne mɔɔ ɛnee bɛlɛkɔ na bie mɔ noko ɛlɛba la ati bɛannyia adenle bɛamkpula bɛ sa bɔbɔ. 32 Ɔti bɛvale ɛlɛne bɛhɔle ɛleka mɔɔ ɔle koonwu la. 33 Noko akee menli dɔɔnwo ne ala nwunle bɛ ɛhɔlɛ nu na bɛnriandinle bɛlumuale bɛ nyunlu wɔ ɛnwea ne azo na bɛ muala bɛdwule ɛkɛ ne ko. 34 Ɛhye maanle menli dɔɔnwo ne ala rayiale Gyisɛse bieko; na ɔnwunle bɛ anwunvɔne, ɔluakɛ, ɛnee bɛyɛ kɛ mboane mɔɔ ɛnlɛ bɛ neavolɛ la, na akee ɔhilehilele bɛ ninyɛne dɔɔnwo mɔɔ ɔhyia kɛ bɛnwu ye la.

35,36 Mɔɔ sɛnzɛne ne hɔle bie la, ye ɛdoavolɛma ne mɔ rale ɔ nwo ɛkɛ ne razele ye kɛ, "Ka kile menli ne maa bɛhɔ namunamu nee ɛya ɛya mɔɔ bikye ɛke la azo bɛhɔdɔ debie bɛli, ɔluakɛ, aleɛ biala ɛnle ɛsɛlɛ ye azo ɛke ɛmmaa bɛ, yɛɛ aleɛ ɛlɛdwo noko."

37 Gyisɛse zele bɛ kɛ, "Bɛdabɛ bɛmaa bɛ aleɛ ɛ." Na bɛbizale ye kɛ, "Duzu a yɛva yɛmaa bɛ a? Kyesɛ ezukoa dɔɔnwo na ahola adɔ menli ɛwolaa ɛhye mɔ anwo aleɛ!"

38 Gyisɛse bizale bɛ kɛ, "Duzu aleɛ dodo a yɛlɛ ye kɛkala a? Bɛmaa menwu ye."

Bɛziale bɛrale na bɛhanle bɛhilele ye kɛ, kpanwo dolɔfo nnu ɔ nee fɛlɛ nwiɔ ala a bɛlɛ ye wɔ bɛ nwo a. 39,40 Gyisɛse akee maanle menli dɔɔnwo ne dɛnlanle aze wɔ ndile ne azo ekpunli ekpunli mɔɔ wɔ nu abulanlu abulanlu ɔ nee ɛya ɛya la.

41 Gyisɛse vale kpanwo dolɔfo nnu ne nee fɛlɛ nwiɔ ne, na ɔnleanle anwomanyunlu, na ɔyɛle Nyamenle mo. Akee ɔbubule kpanwo dolɔfo nnu ne nee fɛlɛ nwiɔ ne anu ngyikyi ngyikyi bie, ɔvale kpanwo ne nee fɛlɛ ne bie ɔmaanle ye ɛdoavolɛma ne mɔ ko biala, ɔmaanle bɛvale bɛzieziele menli ne mɔ anyunlu. 42 Na menli dɔɔnwo ne lile maanle bɛ ko yile mɔɔ ɛnee akee bɛngola bieko bɔbɔ di a.

43,44 Ɛnee mrenyia mɔɔ wɔ nu la le kɛyɛ apenle nnu, na nzinlii, bɛsesale mgbokpoleka ne la bɛnyianle ahɛndɛne bulu nee nwiɔ!

45 Bɛwiele ɛhye ala la Gyisɛse maanle ye ɛdoavolɛma ne mɔ dule ɛlɛne lumuale azule tandane ne anzi bɛhɔle Bɛteseeyeda. Yemɔ ɔhale amozi kɛ ɔnea ɔ nee menli ne mɔ ali nrɛlaleɛ na yeanlea yeamaa bɛadwu sua nu kolaa na akee yeadoa bɛ.

46 Ɛhye anzi bɔbɔ, eza ɔhɔle awoka ne azo kɛ ɔkazɛlɛ. 47 Mɔɔ aleɛ dwole la, ɛnee ɛdoavolɛma ne mɔ tɛbɔ azule tandane ne anye avinli, na yemɔ ɔ ngome noko ɔwɔ file zo lɔ. 48 Na ɔnwunle kɛ bɛ nwo ɛhyele bɛ kpalɛ kpalɛ wɔ ahumu nee azɛlɛkye sa nu.

Bɛbɔle kɛyɛ aleɛbahye dɔne nsa la, ɔdiale azule ne anye ɔdoale bɛ ɔyɛle kɛ ɔsea bɛ nwo; 49 na mɔɔ bɛnwunle kɛ debie bie nee bɛ lua la, ɛzulolɛ hanle bɛ maanle bɛdeɛdeanle nu, ɔluakɛ, ɛnee bɛdwenle kɛ nwomenle bie ɔ, 50 ɔluakɛ bɛ muala noko bɛnwunle ye.

Na ndɛndɛ ne ala ɔzele bɛ kɛ, "Bɛmmasulo. Bɛgyinla bɛ nwo nane dii! Medame ɔ!" 51 Akee ɔvole ɛlɛne ne anu, na ahumu ne gyakyile!

Ɔyɛle bɛ muala azibɛnwo. 52 Ɔluakɛ ɛnee bɛtɛnwunle ye sonla holɛ, bɔbɔ wɔ mekɛ mɔɔ ɔyɛle nwanwane ninyɛne ne mɔɔ ɔyɛle ye wɔ kpanwo ne anwo nɔsolɛ zɔhane mɔɔ ɛze ɛhɔ la! Yɛɛ bɛangulo noko kɛ bɛkɛlie bɛkɛli!

53 Mɔɔ bɛdwule Gɛnɛzalɛte wɔ azule tandane ne anzi lɔ la, bɛdole bɛ ɛlɛne ne sɛkɛ, 54 na akee bɛvole file zo.

Menli mɔɔ gyigyi ɛkɛ ne la nwunle Gyisɛse ndɛndɛ ne ala, 55 ɔti bɛnriandinle bɛhɔbɔle ye ɛralɛ ne anwo nolo wɔ ɛkɛ ne ɛleka biala, na bɛzoale wuliravolɛma wɔ ɛkpa zo nee ahomanga nu bɛrale ɔ nyunlu ɛkɛ ne. 56 Ɛleka biala mɔɔ ɔvale la, saa namule nu nee sua zo o, saa ɛbɔ nu o, ɛnee bɛzo wuliravolɛma bɛdoa ye wɔ gua ne mɔ nee awɔlɔne ne mɔ azo na bɛlɛsɛlɛ ye kɛ ɔmaa bɛzɔ ye tɛladeɛ ne anloa anloa mgbane bɔbɔ; na nuhua biala noko mɔɔ zɔle ye nu la dele kpɔkɛ bɔkɔɔ.