1,2 Mɔɔ Gyisɛse pɛ nu wɔ Gyɛleko la, nrenyia sukoavolɛ bie mɔɔ bɛfɛlɛ ye Zakeɛse, mɔɔ le Wulomu adwulelielɛ gyima ne anwo mgbanyima ne mɔ ko la, 3 pelele kɛ ɔkɛnwu Gyisɛse, noko akee kɛmɔ ɔle sonla adwola la ati, ɛlɔne ne wale ɔ nye. 4 Ɛhye ati ɔnriandinle ɔlile bɛ nyunlu ɔhɔvole egyane bie mɔɔ gyi adehanle ɛkɛ ne la azo, amaa saa Gyisɛse badwu ɛkɛ ne a, yeanwu ye kpalɛ.

5 Amgba noko Gyisɛse radwule ɛkɛ ne la, ɔdole ɔ nye anwuma ɔnleanle Zakeɛse, na ɔbɔle ye duma ɔvɛlɛle ye ɔzele kɛ, "Zakeɛse, ka ɛ nwo dwu aze! Ɔluakɛ wɔ sua nu a ɛnɛ meba mearazokoɛ a!"

6 Zakeɛse dwule aze ndɛndɛ ne ala, na ɔvale Gyisɛse ɔhɔle ye sua nu wɔ fɛlɛkolilɛ nu ala.

7 Menli dodo ne akunlu andwo bɛ nwo wɔ ɛhye anwo. Bɛdendɛle bɛ nzo abo bɛzele kɛ, "Yehɔ yehɔzokoɛ ɛtanevolɛ."

8 Zakeɛse noko gyinlanle Awulae anyunlu ɛkɛ na ɔzele ye kɛ, "Awulae, ɔvi ɛnɛ mɔɔ kɔ la mebava me agyapadeɛ ne anu foa ko meahyɛ ehyiavolɛma; eza noko awie biala mɔɔ mebɔ ye apo meza ye melie ye debie ɛlɛ la, mebabɔnye nwolɛ fane nna meahɔmaa ye!"

9,10 Gyisɛse zele ye kɛ, "Ɛhye kile kɛ amgba ngoanelielɛ ɛra aako ye anu ɛnɛ. Nrenyia ɛhye boka Ebileham abo zo amra ne mɔ mɔɔ minlinle la anwo, na Mame, Anyunlunyia Ra ne noko, mera kɛ mebakpondɛ bɛ, na eza mealie menli mɔɔ le zɛhae la ngoane."

11 Na kɛmɔ nee bɛbikye Gyɛlusalɛm la ati, Gyisɛse bule ɛrɛlɛ ɛhye hilele bɛ kɛ bɛmmadwenle kɛ asɛɛ Nana Nyamenle Belemgbunli maanle ne maleɛ ne ala a ɛnyia ɛdwu zo la.

12 Ɔse: "Nrenyia anyunlunyiavolɛ bie mɔɔ ɛnee de maanzinli bie anu la nyianle nrɛlaleɛ kɛ ɔrɛla suakpole ne azo ɔmaa bɛyɛ ye belemgbunli wɔ ye maanzinli ne anu. 13 Kolaa na ɔbadu ɔ bo la, ɔvɛlɛle ye ngɛkɛlɛ ne mɔ anu bulu na ɔhyɛle pɔne bulu ɔmaanle bɛ ɔzele bɛ kɛ, ‘Bɛva ɛhye bɛli gua, kɔkpula kɛ menwɔzia menwɔra la.’ 14 Na mɔɔ ɔdule ɔ bo ala la, ye ngɛkɛlɛ ne mɔ anu bie vale ɔ nwo akpame. Bɛzoanle awie bɛmaanle ɔvale nrɛlaleɛ ɛhye ɔhɔmaanle ye kɛ, ‘Yɛngulo kɛ nrenyia ɛhye kɛyɛ yɛ belemgbunli.’

15 "Mɔɔ ɔrale, mɔɔ ɛnee bɛyɛ ye belemgbunli la, ɔvɛlɛle bɛdabɛ mɔɔ ɔvale ezukoa ne ɔmaanle bɛ la kɛ bɛrayɛ nwolɛ mgbonda bɛhile ye.

16 "Mɔɔ lumua la rale razele kɛ, ‘Yɛmenle, menyia wɔ pɔne ko ne anwo nvasoɛ pɔne bulu.’

17 "Belemgbunli ne zele ye kɛ, ‘Mo somaa, me akɛlɛ kpalɛ! Kɛmɔ wɔli ekyi ye mɔɔ menvale memaanle wɔ la anwo nɔhalɛ la ati, ɛbazie azua mgbole bulu.’

18 "Mɔɔ tia ye nwiɔ ne noko la rale razele kɛ, ‘Yɛmenle, wɔ pɔne ko ne anwo nvasoɛ ɛyɛ pɔne abulanlu.’

19 "Ɔzele ye kɛ, ‘Mo somaa, ɛdawɔ noko ɛbanlea azua mgbole nnu azo.’

20 "Akee mɔɔ tɔ zo nsa ne la noko rale razele kɛ, ‘Yɛmenle, wɔ pɔne ko ne mɔɔ ɛvale ɛmaanle me la ɛne. Menkyekyele ye wɔ fuazinli nu menvale menziele koonwu, 21 ɔluakɛ meze ye wienyi kɛ wɔmɔ ɛnlua na wɔabu, yɛɛ mɔɔ le awie deɛ bɔbɔ la ɛnee ɛlɛsa ye wɔalie!’ 22 Na belemgbunli ne vale ɛya kpole na ɔzele ye kɛ, ‘Wɔmɔ akɛlɛ atisesebɛvo! Mebalua ɛ nloa edwɛkɛ zo me nee wɔ ali kɛmɔ ɛdawɔ ɛlɛka la. Saa ɛdawɔ ɛse ɛze me nwo edwɛkɛ muala, ɛze kɛ me edwɛkɛ ye se, menlua na meabu, na eza awie mɔ deɛ mɔɔ bɛlɛ la a mesa bɛ medie a, 23 ɛnee akee duzu ati a wɔanva me ezukoa ne wɔangɔndo bange a; amaa saa yeanyɛ boɛ fee bɔbɔ a meanyia nwolɛ nvasoɛ ekyi bɔbɔ a?’

24 "Akee ɔzele menli mɔɔ gyigyi ɛkɛ ne la kɛ, ‘Bɛza ye bɛlie pɔne ko ne ɔ sa nu, na bɛva bɛmaa nrenyia ne mɔɔ lɛ pɔne bulu ne la.’

25 "Bɛzele ye kɛ, ‘Yɛmenle, ɔlɛ pɔne bulu dɛba!’

26 "Na ɔbuale bɛ kɛ, ‘Meka meahile bɛ nɔhalɛ nu kɛ, mɔɔ lɛ bie la yɛɛ banyia bie aboka nwo a; na mɔɔ ɛnlɛ bie la, yemɔ ekyi ne bɔbɔ mɔɔ ɔlɛ ye la, bɛbaza ye bɛalie. 27 Na me kpɔvolɛma noko mɔɔ vale me nwo akpame la, bɛmɛ bɛva bɛ bɛrɛla me nyunlu ɛke bɛrahu bɛ.’ "

28 Ɛhye anzi ye, Gyisɛse zɔle ye Gyɛlusalɛm adendulɛ ne azo, na ɔlumuale ye ɛdoavolɛma ne mɔ anyunlu. 29 Mɔɔ bɛbikyele Bɛtefagye nee Bɛtani, mɔɔ wɔ Boka Ɔlivi ne azo la, ɔzoanle ye ɛdoavolɛma ne mɔ anu nwiɔ ɔmaanle bɛlumuale. 30 Ɔzele bɛ kɛ, "Bɛhɔ sua ko ne mɔɔ wɔ bɛ nyunlu ɛkɛ ne la azo, na bɛbanwu afunlumu ralɛ mɔɔ awie ɛtɛtɛnlanle ɔ nwo zo ɛlɛ la kɛ ɔhenda adehanle ne.

"Bɛzanyi ye na bɛva bɛrɛlɛ me. 31 Saa awie biala biza bɛ kɛ, ‘Duzu ati a bɛlɛsanyi ye a,’ bɛze ye kɛ, ‘Awulae ɛhyia ɔ nwo.’"

32 Amgba noko bɛhɔle na bɛnwunle ye kɛmɔ Gyisɛse zele bɛ ala la pɛ, 33 na mɔɔ bɛsanyi ye la, ɔ menle rale rabizale bɛ kɛ, "Duzu ati a bɛlɛsanyi ye a?"

34 Na ɛdoavolɛma ne mɔ yele ɔ nloa kɛ, "Awulae ɛhyia ɔ nwo!" 35 Na bɛ nee afunlumu ralɛ ne rale la, bɛyele bɛ adɛladeɛ ne bie bɛguale ɔ nwo zo, na bɛmaanle Gyisɛse dɛnlanle zolɛ.

36,37 Akee menli dɔɔnwo ne mɔɔ li ɔ nyunlu la noko vale bɛ ndanlɛ sesɛle aze wɔ adenle ne anu; na mɔɔ bɛtolotolo Boka Ɔlivi ne bɛadwu aze la, menli mɔɔ solo ɛkɛ la amuala bɔle ɔ bo kɛ bɛteɛdea nu bɛaye Nana Nyamenle ayɛlɛ wɔ nwanwanendeɛ mɔɔ Gyisɛse ɛyɛ la amuala anwo.

38 Bɛhanle ye kɛ, "Nyilalɛ ɛha Belemgbunli ne mɔɔ lua Awulae duma nu ɔlɛba la! Anzondwolɛ ɛrɛla anwuma belemgbunli maanle ne anu, na anyunlunyia ɛha Nana Nyamenle wɔ anwuma anwuma!"

39 Na Falasiima ne bie mɔ mɔɔ ɛnee wɔ menli pemgbelamgbe ne anu la zele kɛ, "Awulae, tua wɔ ɛdoavolɛma ne mɔ maa bɛgyakyi mɔɔ bɛlɛkeha la!"

40 Na ɔbuale bɛ kɛ, "Saa bɛmɛ bɛyɛ ngungoonwu bɔbɔ a, awolɛ ne mɔ mɔɔ wɔ ɛke la badeɛdea nu aye me ayɛlɛ!"

41 Akee mɔɔ bɛbikyele Gyɛlusalɛm, na ɔnwunle kɛ azua ne mɔ a gua nehane la, ɔ nye monle gyinlegyinlanle. 42 Ɔzunle na ɔzele kɛ, "Anzondwolɛ mɔɔ ɛmbɔ aze ɛlɛ la bikyele wɔ noko akee wɔannwu ye! Ɔti ɛkpole ye; na kɛkala noko yemɔ yekpa nwolɛ! 43 Wɔ kpɔvolɛma babɔ ɛ nwo mgbɔlɛka ayia; 44 na bɛabubu wɔ bane ne bɛagua ye aze, na bɛazɛkye ɛ mra mɔɔ wɔ wɔ nu la amuala kosooti. Wɔ kpɔvolɛma ne mɔ ɛnrɛgyakyi bolɛ ko bɔbɔ wɔ ɔ gɔnwo anwo zo, ɔluakɛ wɔkpo adenle ne mɔɔ Nana Nyamenle bukele maanle wɔ la."

45 Akee ɔhɔwolole Asɔne Sua Kpole ne anu, na ɔbɔle ɔ bo kɛ ɔfoa guadivoma ne mɔ yeavi bɛ ninyɛne mɔɔ bɛziezie la anwo. 46 Na ɔzele kɛ, "Nana Nyamenle Edwɛkɛ ne ka ye wienyi se kɛ, ‘Me Asɔne Sua ne le nzɛlɛlɛ ɛleka. Noko akee bɛmɛ bɛva bɛhakyi nwule feabelɛ.’"

47 Ɛhye anzi ye, dahuu biala ɔhilehilele debie wɔ Asɔne Sua Kpole ne anu, noko akee azɛlɛvolɛ mgbanyinli ne mɔ, nee asɔne mgbanyima ne mɔ, nee menli mgbole mgbole ne mɔ anye bolole adenle mɔɔ bɛpe zo bɛaminli ɔ bo zo la anwo. 48 Noko bɛangola ɛhwee biala yɛ ɔboalekɛ ɛnee ɔ nwo hyia menli ne kpole kpalɛ, ɔ nwo yɛ ɛzulolɛ, na eza bɛhulole kɛ dahuu bɛkɛde ye edwɛkɛ ne.