1 Kenle ko bie Gyisɛse zele ye ɛdoavolɛma ne mɔ kɛ, "Kɛ ɔkɛyɛ biala la, sɔnea bara amaa menli ayɛ ɛtane, na emomu ɛdawɔ mɔɔ ɛkɛmaa sɔnea ne kɛlua ɛ nwo zo kɛra la, ɛnee wɔ gyakɔ. 2,3 Mebɔ bɛ kɔkɔ kɛ, ɛdawɔ mɔɔ ɛkɛmaa ngakula ngyikyi ɛhye mɔ mɔɔ ɛnze nwolɛ bie la anu ko bɔbɔ anwo kɛbu ɛbonle la, saa bɛkyekyele ɛ kɛnra ɛdibolɛ bɛhɔdole wɔ nyevile ne akɔme zo nehane bɔbɔ a, anrɛɛ ɛnee ɔle kpalɛ!

"Ɛhye ti saa ɛ diema yɛ wɔ ɛtane a tea ye, ɔnu ɔ nwo a, fa kyɛ ye. 4 Saa kenle ko bɔbɔ ɔyɛ wɔ ɛtane fane nsuu na eza noko ɔsɛlɛ wɔ fakyɛ fane nsuu wɔ ɛtane ko biala anwo a, fa kyɛ ye."

5 Mekɛ bie ɛdoavolɛma ne mɔ zele Gyisɛse kɛ, "Awulae, wula yɛ diedi kpundii!"

6 Gyisɛse buale bɛ zele kɛ, "Saa bɛlɛ diedi mɔɔ ye kpole le kɛ dubinli ma bɔbɔ la a, anrɛɛ bɛse baka kɛ ɔdudu ɔhɔgua nyevile nu a, saa ɔyɛ zɔ; anrɛɛ bɛka edwɛkɛ biala a ɔnrɛli mgba ɛlɛ. 7-9 Saa akɛlɛ kɔso ɔ menle ɛya anzɛɛ ɔkɔnea ɔ menle mboane, na ɔkpɔne ɔba a, ɛkɛ ne ala ɔngɔndɛnla aze ɔnli aleɛ, emomu ɔdumua ɔto ɔ menle ne aleɛ ɔnea ɔmaa ɔdi ye deɛ ɔwie bɔkɔɔ na ɔdaye mumua ne yeali ye deɛ ne. Noko mo mgbane bɔbɔ bɛnyɛ ye bie, ɔluakɛ ɔle ye gyima mɔɔ ɔwɔ kɛ ɔyɛ a. 10 Zɔhane ala noko, yɛɛ saa bɛdabɛ noko bɛtie me ne na bɛyɛ mɔɔ meka mekile bɛ la a, ɔnle kɛ bɛkpondɛ moyɛlɛ biala a. Ɔluakɛ ɛnee mɔɔ le bɛ gyima ala la yɛɛ bɛyɛ la!"

11 Mɔɔ bɛkɔ Gyɛlusalɛm la, bɛhɔdwule Galeli nee Samɛlea ɛweɛne zo, 12 na mɔɔ ɛnee bɛlɛkɔ bɛahɔvo namule bie azo la, kokobɛvolɛma bulu bie yiale ye adenle; bɛgyinlanle moamoa nehane 13 na bɛdeɛdeanle nu bɛzele kɛ, "Awulae Gyisɛse, nwu yɛ anwunvɔne!"

14 Ɔnleanle bɛ koonwu na ɔzele kɛ, "Bɛhɔva bɛ nwo bɛhile Dwuuma azɛlɛvolɛ ne mɔ!" Na ɔrale ye kɛ, mɔɔ bɛkɔ la bɛnwunle kɛ bɛ nwo ɛza.

15 Bɛ nuhua ko ziale rale Gyisɛse anwo ɛkɛ na ɔvale fɛlɛkolilɛ ɔhanle kɛ, "Nyilalɛ ɛha Nana Nyamenle. Ɔluakɛ me nwo ɛza bɔkɔɔ!" 16 Ɔrabutule Gyisɛse anyunlu ɛkɛ, na ɔyɛle ye mo wɔ mɔɔ yeyɛ yemaa ye la anwo. Nrenyia ɛhye ɛnee le Samɛleanli.

17 Gyisɛse bizale bɛ kɛ, "Anzɛɛ tɛ menli bulu yɛɛ menyɛle bɛ ayile ɔ? Na nuhua ngɔnla ne wɔ nienwu? 18 Yemɔti ɛyɛvolɛ kotokokye ɛhye ala yɛɛ ziale rale kɛ ɔbayɛ Nana Nyamenle mo ɔ?"

19 Akee Gyisɛse zele nrenyia ne kɛ, "Dwazo na kɔ. Wɔ diedi ɛlie wɔ ngoane."

20 Kenle ko bie Falasiima ne mɔ bizale Gyisɛse kɛ, "Kenle nzu a Nana Nyamenle Belemgbunli maanle ne bara a?"

Gyisɛse buale zele kɛ, "Nana Nyamenle Belemgbunli maanle ne ye ɛralɛ ɛnle deɛ mɔɔ bɛnwu ye bɛ nye zo a. 21 Bɛnrɛhola bɛnrɛze kɛ, ‘Yebɔ ɔ bo wɔ ɛke anzɛɛ nehane.’ Ɔboalekɛ Nana Nyamenle Belemgbunli maanle mumua ne de bɛ nu."

22 Nzinlii, ɔhanle ɛhye anwo edwɛkɛ ɔhilele ye ɛdoavolɛma ne mɔ ɔzele bɛ kɛ, "Melɛ bie ɛlɛba mɔɔ bɛ kunlu anu a anrɛɛ bɛbanyia Sonla Ra ne bɛ nee ye adɛnla kenle ko bɔbɔ ala a, noko akee bɛnrɛnyia ye zɔ." 23 Bɛbatete ye huhuhuhu kɛ Sonla Ra ne ɛzia ɛra, na ɔwɔ ɛke anzɛɛ nehane. Noko akee bɛmmadie bɛdi, yɛɛ bɛmmase kɛ bɛkɔ bɛahɔkpondɛ ye. 24 Nɔhalɛ mɔɔ wɔ nu la a le kɛ saa ɔsia ɔba a, ɔbala ali wienyi; tɛ awie yɛɛ abaha ahile wɔ a. Ɔluakɛ Sonla Ra ne maleɛ ne bayɛ kɛ ɛsɛlɛmanye mɔɔ ɛlɛfedevede anwomanyunlu la. 25 Noko akee ɔwɔ kɛ ɔdumua ɔnwu amaneɛ kpole kpalɛ, na ɛlɔnwɔne ɛhye kpokpoti kpo ye.

26 "Kɛmɔ Nowa melɛ zo menli anva Nana Nyamenle edwɛkɛ biala anyɛ ɛhwee la, zɔhane ala a ɔbayɛ wɔ Sonla Ra ne mekɛ ne a. 27 Bɛlile na bɛnlonle, na bɛgyale bɛ nwo; na bɛlɛ ye zɔ dedee hɔkpulale kenle ko demua ne mɔɔ Nowa hɔle ɛlɛne ne anu na azuyilɛ ne razɛkyele bɛ kpokpoti la.

28 "Bieko, kɛmɔ ɛnee ɔde ye wɔ Lɔɔto mekɛ zo la, kɛ ɔbayɛ ye ala ɛne: ɛnee menli ɛlɛdi bɛ gyima mɔɔ hyia bɛ la: bɛlile, bɛnlonle, bɛlile gua, bɛzonle ɛya, na bɛsisile azua, 29 hɔkpulale nwonlomɔ ne mɔɔ Lɔɔto vile Sodɔm yele ɔ nwo na sendɔlɛra vi anwuma rale razɛkyele bɛ kosooti la. 30 Zɔhane ala yɛɛ ɔbayɛ wɔ mekɛ ne mɔɔ bɛbaye Sonla Ra ne bɛahile la a.

31 "Bɛdabɛ mɔɔ zɔhane kenle ne ɛnee bɛhɔ ɛbɔ nu la, mmase kɛ bɛsia bɛara sua zo; yɛɛ bɛdabɛ noko mɔɔ bɛvi sua nu zɔhane kenle ne la mmase kɛ bɛsia bɛ nzi bɛarasesa bɛ ninyɛne. 32 Bɛhakye mɔɔ zile Lɔɔto aye ne anwo zo la! 33 Awie biala mɔɔ kɛpele kɛ ɔdie ye ngoane la, ɔbaminli ye; na emomu awie biala noko mɔɔ kɛhwele ye ngoane la asa baha ye. 34 Zɔhane nɔe ne ɔbara ye kɛ menli nwiɔ mɔɔ la ɛsokpa ko azo la, bɛbava ko na bɛagyakyi ko ne. 35,36 Mraalɛ nwiɔ mɔɔ ɛlɛpe abɛlɛ wɔ agyaade la, bɛbava ko bɛagyakyi ko ne; yɛɛ zɔhane ala noko yɛɛ ɔbayɛ wɔ mrenyia mɔɔ ɛnee ɛlɛyɛ gyima wɔ ɛleka ko la afoa nu a."

37 Akee ɛdoavolɛma ne mɔ bizale ye kɛ, "Awulae, ɛnee nienwu a bɛ nee bɛ bahɔ a?"

Gyisɛse buale bɛ zele kɛ, "Ɛleka mɔɔ debie funli la la, ɛkɛ ne a: mgbɔtɛ ne mɔ noko kuohua bɛ nloa a!"