1 Ɔrale ye kɛ, mekɛ ne anu, bɛhanle bɛhilele ye kɛ, Paelɛte ɛhu Dwuuma bie mɔɔ vi Galeli rale Gyɛlusalɛm Asɔne Sua Kpole ne anu na bɛlɛbɔ azu la.

2 Na ɔbizale bɛ kɛ, "Asoo bɛdie bɛdi kɛ menli zɔhane bɛ ɛtane zonle tɛla Galelima mɔɔ ɛha la ɛdeɛ ne la ati a bɛnwunle zɔhane anwubɛnyunlu ne la ɔ? 3 Tɛ ye zɔ ɔ! Na memaa bɛade kɛ, saa bɛdabɛ noko bɛannu bɛ nwo a, zɔhane ala a bara bɛ nwo zo a.

4 "Na menli bulu nee mɔtwɛ ne noko mɔɔ Saelowam Tawa ne bule guale bɛ nwo zo la ɛ? Asoo bɛ ngomekye a ɛnee bɛyɛ ɛtane mgbole mgbole wɔ Gyɛlusalɛm anzɛɛ? 5 Kyɛkyɛ, tɛ ye zɔ ɔ! Na zɔhane ala yɛɛ saa bɛdabɛ noko bɛannu bɛ nwo a bɛbaminli a."

6 Akee ɔbule bɛ ɛrɛlɛ ɛhye kɛ: "Nrenyia bie luale dɔma baka wɔ ye tola nu; na ɔdoale zo ɔrale fane dɔɔnwo ne ala kɛ ɔbakpondɛ zolɛ ma ne bie, noko yeannyia ɛhwee. 7 Nzinlii, ɔzele ye tola neazovolɛ ne kɛ ɔpɛ ye ɔdo. Ɔse, ‘Ɛvolɛ nsa ye anu mehendɛ dedee noko metɛnyianle ma kokye bɔbɔ wɔ zo. Na mefa ɛhye anwo meayɛ duzu bieko? Ɔlɛsɛkye azɛlɛ ne gyɛne.’

8 "Tola neazovolɛ ne buale ye zele kɛ, ‘Maa yɛnlea ye ekyii wɔ ɛvolɛ bieko, na mengugua ɔ bo ewula, menvede me nye menea ye boɛ. 9 Saa ɛvolɛ bieko kara na yezo a, ɛnee ye kpalɛ nu ɔ; yeamba ye zɔ noko a, ɛnee akee bɔ zo mɔɔ yedwu ye ɛpɛlɛ ɔ.’ "

10 Na wɔ Ɛnwomenlelielɛ Kenle ko bie, mɔɔ ɛnee ɔlɛkilehile wɔ ayiasua ne anu la, 11 ɔnwunle raalɛ bie mɔɔ ewule ɛmaa yekpo zo too ɛvolɛ bulu nee mɔtwɛ a, na ɔtenrɛ ɔ nwo a ɔnyɛ boɛ fee zɛ.

12 Gyisɛse vɛlɛle ye ɔ nwo ɛkɛ ne na ɔzele ye kɛ, "Raalɛ ye, ɛ nwo ɛza!" 13 Akee ɔvale ɔ sa ɔhanle ye, na amgba noko raalɛ ne denrɛle fɔɔnwo ɛkɛ ne ala. Na ɔhanvole Nana Nyamenle, na ɔyɛle ye mo!

14 Na Dwuunli kpanyinli ne mɔɔ nea ɛkɛ ne ayiasua ne azo la vale ɛya totohyia na ɔzele kɛ, "Dapɛne ne anu kenle nsia wɔ ɛkɛ mɔɔ bɛfa bɛyɛ gyima a; ɔti ɛdawɔ biala mɔɔ ɛkpondɛ kɛ bɛyɛ wɔ ayile la, bɛla zɔhane melɛ ne, na tɛ wɔ Ɛnwomenlelielɛ Kenle ne ɔ!"

15 Awulae buale ye zele kɛ, "Adalɛ nabalaba! Asoo Ɛnwomenlelielɛ Kenle ne dwu a ɛnzanyi wɔ ɛkpɔnwɔ ɛmmaa ɔnno nzule ɔ? Na ɛhye ɛnle gyimayɛlɛ ɔ? 16 Na duzu ati yɛɛ Ebileham dehelɛ ye mɔɔ Abɔnsam ɛkyekye ye too ye ɛvolɛ bulu nee mɔtwɛ ɛne la, saa memaa ɔ nwo ɛza a ɛnee ɛsuzu kɛ ɔle ɛtaneyɛlɛ ɛ?"

17 Mɔɔ ɔhanle ɛhye la ye kpɔvolɛma ne anyunlu nyiane guale aze. Na menli dodo ne amuala nyianle ye nwanwane gyima ne mɔɔ ɔlile la anwo ahomeka totohyia.

18 Ɛhye anzi ye, ɔbɔle ɔ bo kɛ ɔkilehile bɛ Nana Nyamenle Belemgbunli maanle ne anwo debie. Ɔbizale bɛ kɛ: "Nana Nyamenle Belemgbunli maanle mumua ne le kɛ duzu debie? Duzu debie a menva mendo nwo memaa bɛde ɔ bo a? 19 Ɔle kɛ dubinli ma mɔɔ bɛlua ye wɔ tola nu la; ɔngyɛ na yeanyi yeayɛ baka buzuu, mɔɔ nloma yɛ bɛ sane wɔ ye ngane ne mɔ anu la. 20,21 Ɔle kɛ mgbɔvonle mɔɔ bɛva bɛfɔtɔ kpanwo la; ɛkanwu ye kokye la, ɛnee yemaa kpanwo ne ɛdu ɛyɛ wuduluu zɛhae."

22 Ɔhɔle azua mgbole mgbole nee ngyikyi ngyikyi ne mɔ azo ɔhilehilele bɛ, na ɛhye mɔ amuala anu, ɛnee Gyɛlusalɛm ɛhɔlɛ ala a wɔ ye adwenle nu ɛsesebɛ a.

23 Na awie bizale ye kɛ, "Anzɛɛ ɛnee menli ekyii bie ala a banyia ngoanelielɛ ɔ?"

Na ɔbuale bɛ ɔzele kɛ, 24,25 "Bɛbɔ mɔdenle kɛ bɛkɛwolo anlenkɛ ekyi ne anu; ɔluakɛ mese bɛ nɔhalɛ nu kɛ, menli dɔɔnwo ne ala bapele kɛ bɛbawolo nu, noko akee bɛnrɛhola. Aakomenle ne badwazo ado ye anlenkɛ ne anu, na awie biala mɔɔ gyi anlenkɛ ne anzi la babɔ nu aze kɛ, ‘Awulae, Awulae, buke yɛ anlenkɛ ne.’ Na ɔbabua yeaze bɛ kɛ, ‘Menze bɛ.’

26 "Akee bɛbabɔ ɔ bo bɛaze kɛ, ‘Yɛ nee wɔ lile, na yɛnlonle na ɛhilehilele yɛ wɔ awɔndenle ne mɔ azo.’

27 "Na ɔbabua bɛ yeaze bɛ bieko kɛ, ‘Mese bɛ nɔhalɛ nu kɛ, menze ɛleka mɔɔ bɛvi a. Bɛvi ɛkɛ ne bɛhɔ, bɛmɛ ɛtanevolɛma.’

28 "Na ɛkɛ ne, akee ɛzunlɛ nee ahwibɛgye bara totohyia, wɔ melɛ mɔɔ bɛ nye dua Ebileham nee Ayezeke nee Gyekɔbo, nee kapezoma ne mɔ amuala wɔ Nana Nyamenle Belemgbunli maanle ne anu la, noko akee bɛmɛ mɔ bɛye bɛ bɛvi nu. 29 Menli vi aleɛabo kpokpoti bara aradɛnla aze ado ɛsalɛ wɔ Nana Nyamenle Anwuma belemgbunli maanle ne anu. 30 Na bɛhakye kɛ: Alumuama bali amozi, yɛɛ amozi amra noko balumua."

31 Na dɔnehwele ko ne ala anu, Falasiima bie rale razele ye kɛ, "Ɛvi ɛke nriandi kɔ, ɔluakɛ Belemgbunli Hɛlɔdo kpondɛ wɔ ahu wɔ!"

32 Gyisɛse buale bɛ zele kɛ, "Bɛhɔze zɔhane ɛzonlɛ ne kɛ, mebahɔ zo meadu awozonle awozonle, na eza meayɛ ayileyɛlɛ nwo nwanwanendeɛ wɔ ɛnɛ nee ɛhyema; na ye kenle nsa ne azo a akee mebadwu ɛleka mɔɔ mekɔ la a. 33 Ɔle nɔhalɛ kɛ, ɔwɔ kɛ mefa ɛnɛ nee ɛhyema nee ye alehyenlɛ metu adenle ne! Ɔluakɛ sua biala ɛnle ɛkɛ boka Gyɛlusalɛm anwo, mɔɔ Nana Nyamenle kapezonli badɔ wɔ ɛkɛ ne a!

34 "Oo, Gyɛlusalɛm, Gyɛlusalɛm! Wɔmɔ mɔɔ ɛku ngapezoma ne mɔ, na ɛsi bɛdabɛ mɔɔ Nana Nyamenle ɛzoa bɛ wɔ ɛ nwo lɔ la awolɛ a! Fane nyɛ yɛɛ mengulole kɛ menwɔhuohua ɛ mra anloa, kɛmɔ akɔlɛ di ɔ mra adane wɔ ɔ ndɛba abo la a; noko akee wɔammaa me adenle! 35 Na kɛkala bɛgyakyi wɔ aako ne bɛmaa ye nee ye gyinlabelɛ biala mɔɔ ɔwɔ nu la. Ɛbadɔ mgbane. Na akee meka meahile bɛ wienyi kɛ, bɛnrɛnwu me bieko ɛlɛ, kɔkpula mekɛ mɔɔ bɛkɛze kɛ, ‘Nyilalɛ ɛha mɔɔ lua Awulae duma nu ɛlɛba la.’ "