Luku 20

1 Na ɔrale ye kɛ, kenle ko bie mɔɔ ɛnee ɔlɛkilehile menli ne mɔ Nyamedwɛkɛ ne wɔ Asɔne Sua Kpole ne anu la, azɛlɛvolɛ mgbanyinli ne mɔ nee kɛlɛhɛlɛvolɛma ne mɔ ɔ nee mgbanyima mɔɔ ɛha la rale ɔ nwo zo. 2 Bɛbizale ye kɛ, "Duzu tumi a ɛlɛ ye, yɛɛ nwane bɔbɔ yɛɛ maanle wɔ zɔhane tumi ne mɔɔ ɔti ɛvale ɛdule guadivolɛma ne mɔ ɛvile Asɔne Sua Kpole ne anu a?"

3 Ɔbuale bɛ ɔzele kɛ, "Bɛye me kpuyia ɛhye anloa kolaa na meabua bɛ edwɛkɛ ne anwo bie. 4 Asoo Dwɔn tumi ne mɔɔ ɔvale ɔzɔnenle la vi Nana Nyamenle ɛkɛ ne anzɛɛ ɔvi sonla dasanli ɛkɛ ne ɔ?"

5 Bɛdwenledwenlenle ɛhye anwo wɔ bɛ nu bɛzele kɛ, "Saa yɛse kɛ ye tumi ne vi anwuma a, yɛbali fɔlɛ, ɔluakɛ ɔbabiza yɛ kɛ, ‘Ɛnee akee duzu ati a bɛanlie ye bɛanli ɛ?’ 6 Emomu saa yɛka kɛ bɛanzoa Dwɔn bɛanvi Nana Nyamenle ɛkɛ noko a, menli ne mɔ bayɛ yɛ ayɛkayɛkadeɛ, ɔluakɛ bɛdie bɛdi kɛ amgba Dwɔn le kapezonli." 7 Ɔti bɛbuale ye sikalɛ bɛzele kɛ, "Yɛnze."

8 Gyisɛse ɔdaye noko ɔzele kɛ, "Ɛnee medame noko menrɛye bɛ kpuyia ɛdeɛ ne anloa."

9 Akee Gyisɛse bule ɛrɛlɛ ɛhye hilele bɛ kɛ: "Nrenyia bie zonle nwanye ɛya; ɔvale ɔbɔle ɛyazonlɛma bie mɔ ɛkpa, na akee ɔzile nu ɔhɔle ɛleka bie moamoa ɔhɔhyɛle kpalɛ. 10 Mɔɔ aleɛbulɛ mekɛ dwule la, ɔzoanle ye menli mɔɔ ɔ nee bɛ yɛ gyima la anu ko wɔ ɛya ne anu kɛ ɔhɔlie ye afoa nu ɛdeɛ wɔ ɛkpavoma ne mɔ ɛkɛ ɔrɛlɛ ye. Ɛkpavoma ne mɔ bolɛ nrenyia ne bɛvoanle ye bɛmaanle ɔvale ɔ sa bulu ɔhɔle sua nu. 11 Nwanye tola ne amenle eza zoanle sonla fofolɛ wɔ ɛya nu lɔ, na ɔdaye noko ɔnwunle ɔ nyunlu zɔhane ala; bɛbole ye kpalɛ na bɛbɔle ye aholoba na bɛvoanle ye. 12 Nwanye tolamenle ne zoanle sonla mɔɔ tɔ zo nsa, na bɛyɛle ɔdaye noko zɔhane ala.

13 "Akee tolamenle ne bizale ɔ nwo kɛ, ‘Duzu bieko a menyɛ a? Mebazoa me ra ne mɔɔ me ahonle wɔ ye nu la. Ɔluakɛ yemɔ wɔannea a bɛbaze ye nyiane ekyii na bɛabu ye bie.’

14 "Mɔɔ ɛkpavoma ne mɔ nwunle nwanye tola ne amenle ara nrenyia ne la, bɛzele kɛ, ‘Yɛ mekɛ kpalɛ a le mekɛ ɛhye! Koliagya ne a ɛlɛba la. Bɛrɛla. Bɛmaa yɛhu ye, na ɛya ne ayɛ yɛ deɛ.’ 15 Ɔti amgba noko bɛhwenle ye bɛvile nwanye tola ne anu na bɛhunle ye kpatalakpa.

"Bɛdabɛ bɛnea a, duzu a tolamenle ne te edwɛkɛ ɛhye a ɔbayɛ a? 16 Mese bɛ nɔhalɛ nu wienyi kɛ, ɔbara yearahu ɛkpavoma ɛhye mɔ noko, na akee yeava nwanye tola ne yeawula menli fofolɛ asa."

Menli mɔɔ ɛnee ɛlɛtie ye edwɛkɛ ne bie la zele kɛ, "Bɛnrɛyɛ ɛhye bɔbɔ fee zɛ."

17 Gyisɛse nleanle bɛ koonwu na ɔzele bɛ kɛ, "Duzu a ɛhye mɔɔ bɛhɛlɛ ye wɔ Ngɛlɛlera ne anu mɔɔ se kɛ: ‘Bolɛ ne mɔɔ suasivolɛma ne mɔ kpole ye la, yemɔ yɛɛ rayɛle ayia zo bolɛ a’, la abo kile a?" 18 Eza ɔvale ɔzɔle zo kɛ, "Awie biala mɔɔ kɛfofo Bolɛ zɔhane azo la ɔbabubu; yɛɛ bɛdabɛ noko mɔɔ ɔkɛbubu ɔkɛgua bɛ nwo zo la ɔbadi bɛ motomotoo kɛ nzonle la."

19 Mɔɔ azɛlɛvolɛ mgbanyinli ne mɔ nee kɛlɛhɛlɛvolɛ mgbanyinli ne mɔ dele ɛrɛlɛ ɛhye mɔɔ ɔbule bɛ la, bɛhulole kɛ bɛ sa kɛha ye bɛkɛhye ye ndɛndɛ ne ala, ɔluakɛ bɛnwunle kɛ ɛrɛlɛ zɔhane tia bɛ; noko akee bɛzulole kɛ saa bɛkye ye a nzakadolɛ kɛra. Ɔti bɛbɔle mɔdenle biala mɔɔ bɛkɛhola la kɛ bɛmaa yeaha edwɛkɛ bie mɔɔ ɔlua zo a ɛnee bɛkɛdoa ye bɛkɛmaa Wulomu amɛnlado ne la.

20 Bɛzinzale ye kpalɛ na bɛzoanle nwondomgbɔma bie feabo bɛmaanle bɛvunvuanle ye edwɛkɛ nu. 21 Menli ɛhye mɔ rale Gyisɛse anwo ɛkɛ razele ye kɛ, "Kilehilevolɛ, yɛze kɛ ɛka na eza ɛkilehile nɔhalɛ ne. Eza ɛnze awie biala nyiane nretee zɛ bɔbɔ wɔ mɔɔ menli dwenle la anwo, na dahuu ɛkilehile Nana Nyamenle ndenle ne mɔ wɔ nɔhalɛ nu. 22 Ka kile yɛ kɛkala. Anzɛɛ ɔfa mɛla nu kɛ yɛkɛdua adwule yɛkɛmaa Siza anzɛɛ Wulomu Arane ne ɔ?"

23 Ɔnwunle bɛ adwenle nzuzulɛ ɛtane ne, ɔti ɔzele bɛ kɛ, 24 "Bɛva ezukoa mralɛ ne bie bɛmaa menea. Nwane nvoninli a wɔ zo a? Yɛɛ nwane duma noko a wɔ zo a?"

Bɛbuale ye kɛ, "Siza, Wulomu amɛnlado ne ɛdeɛ ɔ."

25 Akee ɔzele bɛ kɛ, "Saa zɔhane ɛdeɛ a, ɛnee bɛva debie biala mɔɔ le Siza deɛ la bɛmaa Siza, na bɛva debie biala noko mɔɔ le Nana Nyamenle deɛ la bɛmaa Nana Nyamenle!"

26 Ɛhye ammaa bɛangola bɛando ye agyiba wɔ menli ne mɔ anyunlu; ye nyelebɛnloa ne yɛle bɛ azibɛnwo, ɔti bɛmuanle bɛ nloa kpulu!

27 Na Sadusiima anzɛɛ menli mɔɔ ɛnlie Ewudwazo ne ɛnli la bie mɔ 28 rale Gyisɛse anwo ɛkɛ rabizale ye edwɛkɛ ɛhye kɛ:

"Mosisi mɛla ne mɔ kile kɛ, saa sonla nrenyia mɔɔ ɛnlɛ mralɛ la ka ɛlɛka bie a, ɔwɔ kɛ nrenyia ne adiema nrenyia gya kunlavolɛ raalɛ ne, na bɛ mra ne mɔ bayɛ nrenyia ne mɔɔ ɛwu la amra wɔ mɛla nu. 29 Mediema mrenyia nsuu bie wale ɛkɛ. Nuhua kpanyinli kpalɛ ne gyale raalɛ, na ɔ nee ye anwo, yɛɛ ɔwule a. 30 Ɔ diema nrenyia ko gyale kunlavolɛ raalɛ ne, na ɔdaye noko ɔ nee ye anwo yɛɛ ɔwule a. 31 Ɛhye hɔle zolɛ too kɔkpula kɛ mediema ne mɔ amuala gyale kunlavolɛ raalɛ ne, mɔɔ bɛ nuhua biala nee ye anwo na bɛwule a. 32 Awieleɛ ne, kunlavolɛ raalɛ ne ɔdaye ɔhale ɛleka bie. 33 Akee yɛ kpuyia ne ɛne: Bɛ nuhua boni a raalɛ ne bayɛ ɔ ye wɔ ewudwazo kenle ne a? Ɔluakɛ mediema nsuu ne biala gyale ye bie!"

34,35 Gyisɛse buale bɛ zele kɛ, "Bɛhyehyɛ agyalɛ bɛmaa ewiade amra kosooti, na emomu saa bɛdabɛ mɔɔ bɛ ti kɛyɛ boɛ kɛ bɛkɛdwazo bɛ bɛkɛvi ewule nu la dwu Anwuma belemgbunli maanle ne anu a, bɛnrɛgya agyalɛ bieko. 36 Eza bɛnrɛwu bieko. Saa ɔba ye zɛ a ɛnee ɔkile kɛ bɛle kɛ anwumabɔvolɛma la, na bɛle Nana Nyamenle amra, ɔluakɛ bɛdwazo bɛ wɔ ngoane fofolɛ nu bɛvi ewule nu.

37,38 "Bɛ kpuyia ɛdeɛ ne nyelebɛnloa ɛne: Saa ewudwazo wɔ ɛkɛ anzɛɛ ɔnle ɛkɛ o, yemɔ Mosisi ye ngɛlɛlera ne mɔ bɔbɔ di nwolɛ daselɛ. Ɔluakɛ saa Mosisi ka yeahile kɛ Nana Nyamenle zile yele ɔ nwo hilele ye wɔ kpɔkɛ ne mɔɔ zɔle senle la anu la a, ɔfɛlɛ Nana Nyamenle kɛ ‘Ebileham ye Nyamenle ne, Ayezeke ye Nyamenle ne, ɔ nee Gyekɔbo ye Nyamenle ne.’ Saa bɛka kɛ Awulae Nyamenle ne le awie bie ye Nyamenle a, ɛnee ɔkile kɛ ahenle holɛ ko ne de aze, na emomu ɔtɛwule! Ɛhye ati menli kpokpoti de aze wɔ Nana Nyamenle anye zo.

39 "Kɛlɛhɛlɛvolɛma ne mɔ bie buale zele kɛ, ‘Wioo, Kilehilevolɛ, wɔdendɛ boɛ bɔkɔɔ.’ " 40 Ɛhye anzi, bɛanla bɛanga ɛlalɛ kɛ bɛkɛbiza ye edwɛkɛ bieko.

41 Eza ɔbizale bɛ kpuyia bieko kɛ, "Duzu ati a menli ka ye kɛ Kelaese, Ngoanedievolɛ ne le Belemgbunli Devidi ara a? 42,43 Ɔluakɛ Devidi mumua ne hɛlɛle ye wɔ Edwɛndolɛ Buluku ne anu kɛ: Nana Nyamenle zele me Awulae, Sonla Ra ne kɛ, ‘Tɛnla me sa fema zo, kɔkpula mekɛ mɔɔ ɛkɛli konim wɔ wɔ kpɔvolɛma anwo zo la.’  44 Na kɛ ɔkɛzi ɔkɛyɛ na Sonla Ra ne ahola ayɛ Devidi ara, na eza yeayɛ Devidi ye Nyamenle wɔ melɛ ko ne ala anu ɛ?"

45 Akee mɔɔ menli dɔɔnwo ne dele ɛhye la, ɔzele ye ɛdoavolɛma ne mɔ kɛ, 46 "Bɛnlea boɛ wɔ kɛlɛhɛvolɛma ɛhye mɔ anwo, ɔluakɛ bɛkulo adɛladeɛ mgbole mgbole ɛwulalɛ nee bagua nu nganvolɛ, ɔ nee mgbanyinli mbia zo ɛdɛnlanlɛ wɔ ayiasua ne mɔ anu, ɔ nee ɛkponledolɛ bo! 47 Wɔ ɛhye mɔ amuala anu bɔbɔ, wɔ bɛ bagua nu nzɛlɛlɛ ndendenle ndendenle ɛyɛlɛ ne mɔ anu, ɛnee eza bɛbɔ mɔdenle kɛ bɛkɛsisi ahunlavolɛ na bɛkɛvoa bɛ bɛkɛvi bɛ aako ne mɔ nu. Ɔlua bɛ zɛhae nyɛleɛ ne mɔ ati, Nana Nyamenle ndɛnebualɛ bedevinli ne ɛlɛkendɛ bɛ."