1 Kenle ko bie mɔɔ ɛnee ɔlɛka Edwɛkpa ne wɔ Gɛnɛzalɛte Tandane ne anloa la, menli dɔɔnwo bie pianle bɛ nwo rale kɛ bɛbadie Nyamenle Edwɛkɛ ne. 2 Na ɔnwunle nlɛne nwiɔ bie mɔɔ ɛhwee ɛnle nu na bɛgyigyi tandane ne anloa wɔ mekɛ mɔɔ ɛnee bɛ menle mɔ ɛlɛkpo bɛ avonle ne mɔ a. 3 Gyisɛse vole nlɛne ne mɔ ko mɔɔ le Saemɔn deɛ la anu, na ɔzele ye kɛ ɔzuhu ye ɔhɔ azukunlu ekyii amaa yeahola yeadɛnla ɛlɛne ne anu na yeadendɛ yeahile menli dodo ne.

4 Mɔɔ ɔwiele tendɛ la, akee ɔzele Saemɔn kɛ, "Twe wɔ ɛlɛne ne kɔ azukunlu na akee to avonle ne, na ɛbahye fɛlɛ dɔɔnwo!"

5 Saemɔn buale zele ye kɛ, "Yɛmenle, nɔe amuala yɛyɛ gyima dedee noko yɛangye ɛhwee. Na kɛmɔ ɛdawɔ a wɔha la ati, yɛbado bieko yɛanlea."

6 Na mɔɔ bɛdole la, bɛhyele fɛlɛ somaa ne ala mɔɔ ɛnee akee bɛ avonle ne bɔbɔ kpondɛ atete a! 7 Bɛdeɛdeanle nu bɛvɛlɛle bɛ gɔnwo mɔ mɔɔ wɔ ɛlɛne ko ne anu la kɛ bɛrazɔ bɛ nu bɛhwe, na bɛ fɛlɛ ne yile nlɛne nwiɔ ne mɔ tetɛkɛɛ mɔɔ ɛnee akee bɛkpondɛ bɛanloma bɔbɔ a.

8 Mɔɔ Saemɔn Pita nwunle deɛ mɔɔ zile la, ɔhotole Gyisɛse anyunlu na ɔzele ye kɛ, "Ao! Awulae, ɛvi yɛ nwo ɛke kɔ, ɔluakɛ mele ɛtanevolɛ mɔɔ ɔnle kɛ ɛbikye me a." 9 Fɛlɛ dɔɔnwo ne mɔɔ bɛhyele ye la yɛle ye nee bɛdabɛ mɔɔ ɛnee wɔ ɛkɛ ne la amuala azibɛnwo. 10 Ɛnee Zɛbɛdi amra, Gyemise nee Dwɔn noko boka Pita anwo. Na Gyisɛse zele bɛ kɛ, "Bɛmmasulo! Ɔvi ɛnɛ mɔɔ kɔ la bɛbahwe menli bɛara Awulae ɛkɛ!"

11 Mɔɔ bɛdwule file zo ala la, bɛgyakyile debie biala na bɛdoale ɔ bo zo bɛ nee ye hɔle.

12 Kenle ko bie ɔhɔle namule bie azo la, ɛnee nrenyia bie mɔɔ kokobɛ ɛyɛ ye ɛhyɛ kpalɛ la wɔ ɛkɛ. Nrenyia ne nwunle Gyisɛse la, ɔrabutule ɔ nyunlu ɛkɛ na ɔzɛlɛle ye ɔzele kɛ,

"Yɛmenle, saa ɔyɛ wɔ ɛhulolɛ a, yɛ me ayile."

13 Gyisɛse dendenle ɔ sa ɔzɔle ye nu na ɔzele kɛ, "Mekulo. Te kpɔkɛ!" Na ɛkɛ ne ala kokobɛ ne vile ɔ nwo minlinle minlimɛnla! 14 Ɛhye anzi, Gyisɛse bɔle ye kɔkɔ kɛ ɔmmaka ɔkile awie biala; na emomu ɔha ɔ nwo ɔhɔ ɔhɔva ɔ nwo ɔhile Dwuuma azɛlɛvolɛ ne mɔ ɔmaa bɛnwu kɛ amgba yede kpɔkɛ bɔkɔɔ. Ɔzele ye kɛ, "Kɔ bɔ azu ne mɔɔ Mosisi mɛla ne kile kɛ saa kokobɛvolɛ te kpɔkɛ a ɔwɔ kɛ ɔbɔ la. Ɛhye bamaa awie biala anwu kɛ amgba ɛ nwo ɛza bɔkɔɔ." 15 Akee bɔbɔ ye tumi ne nganeɛ zandele ndɛndɛ mɔɔ ɔlua zo menli dɔɔnwo rale kɛ bɛbadie ye, na eza bɛamaa yeayɛ bɛ ayile a. 16 Noko akee fane dɔɔnwo ne ala, ɔhwenle ɔ nwo ɔhɔle ɛsɛlɛ ne azo kɛ ɔkazɛlɛ.

17 Na ɔrale kɛ, kenle ko bie mɔɔ ɛnee ɔlɛkilehile la, Falasiima ɔ nee Mɛla ne kilehilevolɛma ne mɔ bie noko rale ɛkɛ. Bie mɔ vi Gyɛlusalɛm, yɛɛ bie mɔ noko vi Galeli nee Dwudiya azua ne mɔ azo. Ɛnee Awulae ayileyɛlɛ tumi ne noko ɛradwu ɔ nwo zo kɛ ɔwɔ kɛ ɔyɛ menli ayile.

18,19 Na menli bie vale nrenyia bie mɔɔ ɛbubu la dole ahomanga nu bɛ nee ye rale. Na ɔlua menli dɔɔnwo ne ati bɛangola Gyisɛse anwo ɛkɛ dwu. Ɔti bɛhɔvole sua ne ati zo, na bɛkpogyale ezumule ne zo, na bɛdwulale nrenyia ne ɔ nee ahomanga ne mɔɔ ɔla zo la amuala wɔ Gyisɛse anyunlu ɛkɛ ne.

20 Gyisɛse nwunle bɛ diedi ne la, ɔzele nrenyia ne kɛ, "Adiema, bɛva wɔ ɛtane bɛhyɛ wɔ!"

21 Falasiima ne mɔ nee Mɛla ne kilehilevolɛma ne mɔ mɔɔ wɔ ɛkɛ la zele kɛ, "Na nrenyia ɛhye mumua ne kɛ ɔdwenle ɔ nwo ɛ? Munzule edwɛkɛ a le ɛhye! Nwane bieko a kola fa ɛtane kyɛ kɛ Nana Nyamenle angomekye a?"

22 Gyisɛse nwunle mɔɔ bɛlɛdwenle la, ɔbuale bɛ ɔzele kɛ, "Duzu ati a ɛhye le munzule edwɛkɛ a? 23,24 Mame, Sonla Ra ne, Melɛ tumi wɔ azɛlɛ ye azo kɛ mefa ɛtane mekyɛ. Na bɛ nloa edwɛkɛ le mgbane, awie biala kola ka ɛhye. Ɔti mebayɛ nrenyia ɛhye ayile amaa bɛanwu ye." Ɔhakyile ɔ nye wɔ abuburavolɛ ne anwo, na wɔ tumi nu ala ɔzele ye kɛ, "Dwazo, fa wɔ ɛkpa ne na kɔ sua nu, ɔluakɛ wɔde kpɔkɛ!"

25 Na ndɛndɛ ne ala, mɔɔ ɛnee awie biala anye gyi ɔ nwo la, nrenyia ne wulule gyinlanle; ɔvale ye ɛkpa ne na ɔbɔle ɔ bo ɔyele Nana Nyamenle ayɛlɛ ɔhɔle sua nu. 26 Ɔyɛle awie biala mɔɔ wɔ ɛkɛ ne la azibɛnwo totohyia. Na bɛhanle bɛfunlanle nu kɛ, "Ɛnɛ kenle ko ye yɛnwu nwanwane ninyɛne."

27 Ɛhye anzi ye, mɔɔ Gyisɛse vile sua ne azo la, ɔnwunle adwuledievolɛ bie mɔɔ bɛfɛlɛ ye Livae, kɛ ɔde ye adwulelielɛ kpɔda bo. Gyisɛse zele ye kɛ, "Bɛla bayɛ me ɛdoavolɛma ne mɔ anu ko!" 28 Amgba noko Livae dwazole foa, na ɔhɔdoale ye ɛkɛ ne ala na ɔ nee ye hɔle.

29 Yeangyɛ biala, Livae dole ɛkponle kpole ne ala maanle Gyisɛse. Na Livae agɔnwo mɔ adwuledievolɛma dɔɔnwo nee nyɛvolɛ gyɛne dɔɔnwo rale ɔ bo.

30 Na Falasiima ne mɔ nee Mɛla ne kilehilevolɛma ne mɔ dendɛle ɛtane hilele Gyisɛse ye ɛdoavolɛma ne mɔ zele kɛ, "Duzu ati a bɛ menle nee ɛtanevolɛma nee adwuledievolɛma to ɛsale di aleɛ ko a?"

31 Gyisɛse buale bɛ zele kɛ, "Wuliravolɛma a hyia ninsinli anwo a, na tɛ bɛdabɛ mɔɔ bɛte kpɔkɛ la ɔ. 32 Meambanvɛlɛ tenlenema, emomu ɛtanevolɛma ati a membale a, amaa bɛanlu bɛ nwo."

33 Mɔɔ bɛhanle ye bieko la a le kɛ, "Na duzu ati a Dwɔn Sɔnevolɛ ne ɛdoavolɛma ne mɔ nee Falasiima ne mɔ kye ɛhɔne dahuu, na bɛyɛ asɔne, na Gyisɛse ɛdoavolɛma ɛdeɛ ne mɔ di aleɛ na eza bɛno nza a?"

34 Gyisɛse bizale bɛ kɛ, "Asoo atɔfolɛ bo amra bahola ahye ɛhɔne amaa yeayɛ boɛ, wɔ mekɛ mɔɔ atɔfolɛ kunli ne nee bɛ wɔ ɛkɛ la ɔ? Menli mɔɔ anye die bɛ nwo la kye ɛhɔne ɔ? 35 Na mekɛ ne bara, mɔɔ atɔfolɛ kunli ne bavi bɛ sa a. Na zɔhane mekɛ ne a akee bɛbabua bɛala a."

36 Akee Gyisɛse bule ɛrɛlɛ ɛhye noko hilele bɛ kɛ: "Awie biala ɛnle ɛkɛ ne mɔɔ ɔte ɛdanlɛ fofolɛ ɔfa ɔta fuazinli nu a. Ɔluakɛ saa ɛyɛ ɛhye a ɛdanlɛ fofolɛ ne bade avi dɛba ne anu na akee yeamaa tokule ne ayɛ kpole adɛla dɛba ne! 37 Zɔhane ala noko, yɛɛ awie ɛnva nwanye fofolɛ ɛngua nwoma toba dɛba nu a. Ɔluakɛ saa ɛyɛ ɛhye a nwanye fofolɛ ne anu ɛsesebɛ ne bakpuke nwoma toba dɛba ne yeamaa nza ne agua aze. 38 Nwanye fofolɛ biala ɔwɔ kɛ bɛfa bɛgua nwoma toba fofolɛ nu. 39 Noko akee awie biala ɛnle ɛkɛ, mɔɔ saa ɔno nza dɛba na ɔtɔ ye fɛlɛko nu a, ɔkpondɛ fofolɛ bo zo a; emomu mɔɔ ɔka la a le kɛ, ‘Dɛba ne ala le kpalɛ.’"