1 Me ɛkɛla ɛyɛ koonwu butu Nyamenle anyunlu; ɔ ngomekye ala a me ngoane wɔ ɔ sa nu a. 2 Ɔ ngomekye ala yɛɛ ɔko ɔmaa me na ɔdie me ngoane a. Ɔle me sinzavolɛ, ɔti awie biala ɛnrɛhola ɛnrɛli me nwo zo konim.

3 Fane nyɛ yɛɛ bɛ muala bɛkɛdu bɛkɛgua sonla mɔɔ ɛwu yeha ɔ nye la anwo zo ɛ? 4 Bɛ ngyehyɛleɛ a le kɛ, bɛkɛdu ye bɛkɛvi ye enililɛ tɛnlabelɛ ne bɛkɛdo ye aze. Bɛ nye die adalɛbɔlɛ nwo. Bɛfa bɛ nloa bɛyileyila, na wɔ bɛ ahonle nu ɛdeɛ, yemɔ amowalɛ ngome. 5 Me ɛkɛla ɛyɛ koonwu butu Nyamenle anyunlu; ɔluakɛ me anyelazo muala vi ye lɔ. 6 Ɔ ngomekye ala a ɔko ɔmaa me, na ɔdie me ngoane a. Ɔle me feabelɛ; ɔti awie biala ɛnrɛhola ɛnrɛli me nwo zo konim.

7 Me ngoanelielɛ nee me anyunlunyia kpokpoti gyi Nana Nyamenle anwo zo. Me bodane totohyia ɔ nee me feabelɛ, yemɔ a le Nana Nyamenle. 8 Ebiamɔ, bɛva bɛ rɛle bɛwula Nana Nyamenle anu mekɛ biala; bɛva bɛ adesoa muala bɛgua ɔ nwo zo, ɔluakɛ Nyamenle le feabele maa yɛ. 9 Menli kpokpoti le kɛ sonla bonyi nu anwoma; mgbanyinli nee ngakula kpokpoti anwo ɛnlɛ nvasoɛ. Bɛndo ɛhwee wɔ tone nu, bɛle fefɛlafefɛla bɛtɛla bɛ bonyi nu anwoma.

10 Mmafa ɛ rɛle ɛwula basabasayɛlɛ nu; mmamaa ɛ nye da kɛ ɛkɛnyia debie kpalɛ bie ɛkɛvi awuleyɛlɛ nu. Saa bɔbɔ wɔ anwonyia so kɛ duzu ala a, mmafa ɛ nye ɛto zo. 11 Kokye yɛɛ Nana Nyamenle ɛdendɛ a; yɛɛ mɔɔ tia ye nwiɔ mɔɔ mede la ɛne: Kɛ tumi vi Nana Nyamenle lɔ; 12 kɛ wɔ lɔ yɛɛ ɛhulolɛ kpundii ne wɔ a: na wɔmɔ Awulae yɛɛ ɛtua awie biala kakɛ kɛmɔ ɔfɛta ye gyimayɛlɛ la a.