1 Die me ngoane, O Nana Nyamenle! Ɔluakɛ azule ɛlɛyi ava me. 2 Melɛmi meahɔ azia ne abo, ɔluakɛ menlɛ agyinlagyakɛ. Medɔ azukuma nu, na azɛlɛkye ne mɔ ɛlɛfa me ahɔ. 3 Mezu mevɛlɛ moalɛ mevɛ; akee me kominza ɛwe. Me nye ɛla me Nyamenle ade ɛvɛ, kɛ menwɔnyia moalɛ. 4 Bɛdabɛ mɔɔ bɛkpɔ me ɛkpɔlɛ gyɛne la, zonle tɛla me ti zo enrinli bɔbɔ: me kpɔvolɛma mɔɔ kpondɛ kɛ bɛsɛkye me la kɛha me nwo edwɛkɛ ɛtane ɛtane. Mɔɔ metɛwuale bɔbɔ la, ɛnee bɛse mendua ye kakɛ.

5 O me Nyamenle, ɛze ngoaseade mɔɔ meyɛ la; ɛtane mɔɔ meyɛ la ɛnvea wɔ. 6 Mmamaa bɛdabɛ mɔɔ bɛ anyelazo a le wɔ la anyunlu nyiane gua aze, O Awulae ɛlɔne Nyamenle; mmadua me nwo zo ɛmaa anyiemgba ka bɛdabɛ mɔɔ bɛkpondɛ wɔ la, O Yizilayɛ Nyamenle. 7 Ɔlua wɔmɔ ti yɛɛ melɛsɔ anwubɛnyunlu ɛhye, na me nyunlu nyiane ɛgua aze a. 8 Meyɛ ɛyɛvolɛ wɔ me mediema anyunlu; yɛɛ meyɛ sonlagyɛne wɔ me abusua nu. 9 Wɔ asɔne ne anwo mɔdenlebɔlɛ ɛyɛ me adesoa, yɛɛ wɔ ndeanlɛ muala mɔɔ ɔwɔ kɛ ɛdie la amuala ɛhakyi ɛragua me nwo zo. 10 Saa melua ɛhɔnehyelɛ nu mebɛlɛ me nwo aze a, ɛnee menli ɛlɛbɔ me aholoba. 11 Saa mekeda ɛzɛne ɛdanlɛ a, ɛnee bɛlɛsi me amgbu. 12 Bɛkeha me nwo edwɛkɛ ɛtane ɛtane wɔ gua bile ne mɔ azo; yɛɛ nza bo a bɛto edwɛne bɛsa me a. 13 Na mame ɛdeɛ, ɛ sa nu yɛɛ me nzɛlɛlɛ wɔ a, O Nana Nyamenle. Saa mekɛ kpalɛ ne dwu a, O me Nyamenle, dua wɔ ɛhulolɛ kpundii ne azo tie me. 14 Dua wɔ nɔhalɛ moalɛ ne azo ye me fi ɛminlɛ mɔɔ melɛmi wɔ ndɛtɛlɛ ne anu la; maa bɛlie me bɛvi me kpɔvolɛma asa anu, na menvi azukuma ne anu.

15 Mmamaa azule yi fa me, mmamaa mewu wɔ azule bo, anzɛɛ mmamaa bɛkeda me nwo zo wɔ ewule kuma nu. 16 Nana Nyamenle tie me, ɔluakɛ wɔ ɛhulolɛ kpundii ne le kpalɛ; wɔ wɔ anwunvɔnezelɛ kpole ne anu, kakyi ɛ nye nea me. 17 Mmaye ɛ nye ɛfea wɔ akɛlɛ; ɔluakɛ mewɔ ɛmianlɛ nu, na ka ɛ nwo balie me. 18 Twe bikye me na ye me fi munzule nu, pepɛ die me fi me kpɔvolɛma asa anu. 19 Wɔmɔ a ɛze me ahwibɛnyunlu, yɛɛ me anyiemgba nee me anyunluguase a; wɔmɔ ɛze me kpɔvolɛma amuala kpokpoti.

20 Aholobabɔlɛ ɛbubu me ahonle bɔkɔɔ, ɔlua zo nyane ngome ɛyi me tɛkɛɛ. Me nye lale kɛ bɛkɛze me anwunvɔne, noko akee yeamba ye zɔ. Me nye lale kɛ menwɔnwu arɛlekyekyevolɛma, noko akee meannwu bie. 21 Ɛhɔne hunle me, na bɛmaanle me bɔnyema; nzuhɔne hunle me, na bɛmaanle me nza kasokaso. 22 Maa bɛ aleɛ mɔɔ bɛziezie mɔɔ bɛbali la ɛdo bɛ; maa bɛ ɛvoyia azubɔlɛ aleɛ ɛbɔ bɛ nloa nu. 23 Maa bɛ nye ɛyɛ minzinlaminzinla mɔɔ bɛnnwu debie kpalɛ a; maa bɛ nzi mbowule dahuu ɛyɛ gɔhɔlɔɔ. 24 Maa wɔ ɛyavalɛ ne ɛrɛla bɛ nwo zo, na maa wɔ ahwibɛnyunlu kpole ne ɛrɛla bɛ nwo zo. 25 Maa bɛ bo zo tɛnlabelɛ ɛhakyi suadu, na mmamaa sonla ɛdwoba ko bɔbɔ ka bɛ aako nu. 26 Ɔluakɛ bɛ nee mɔɔ wɔmɔ wɔdea ye la di ye ɛnwonlenwonle, na bɛsia bɛkondɔ bɛdabɛ mɔɔ bɛbodɛboda la bɛ nganlɛ ne mɔ bieko. 27 Fa ndeanlɛ sɔ bɛ ndeanlɛ ne mɔ azo; na mmamaa bɛnyia anzondwolɛ biala bɛfi wɔ ngoanelielɛ ne anu. 28 Kyikyi bɛ anluma fi filezo amra anluma buluku ne anu bɔkɔɔ; mmamaa bɛ anluma finde tenlenema anluma buluku ne anu hweledede.

29 Nyane nee alɔbɔlɛ ɛlɛku me; fa wɔ ngoanelielɛ ne, O Nana Nyamenle, ye me fi munzule nu! 30 Mebava edwɛnedolɛ meaye Awulae Nana Nyamenle duma ne ayɛlɛ; mebava moyɛlɛ meahanvo ye duma kpole ne. 31 Ɛhye bazɔ Nana Nyamenle anye adɛla kɛ menwɔva ɛnlankɛ menwɔbɔ azu menwɔmaa ye; anzɛɛ kɛ menwɔva ɛnlankɛ nyinli menwɔbɔ azu menwɔmaa ye. 32 Maa bɛdabɛ mɔɔ bɛsisi bɛ la ɛnwu ɛhye, na bɛ nye ɛlie; maa bɛdabɛ mɔɔ bɛsu bɛfɛlɛ Nana Nyamenle la arɛle ɛkyekye. 33 Ɔluakɛ Awulae tie bɛdabɛ mɔɔ bɛwɔ ɛmianlɛ nu la, na ɔmmaa ɔ rɛle ɛnvi ye menli mɔɔ gua efiade la.

34 Bɛmaa anwuma nee aze kpokpoti ɛye Nyamenle ayɛlɛ, Nyevile ɔ nee debie biala mɔɔ wɔ nuhua la. 35 Ɔluakɛ Nana Nyamenle baho alie Gyɛlusalɛm, na yeazia yeasisi Dwuda azua ne mɔ bieko; na ye menli badɛnla ɛkɛ, na azua ne mɔ ayɛ bɛ deɛ. 36 Ye azonvolɛ abo zo amra bava azɛlɛ ne; na bɛdabɛ mɔɔ bɛkulo ye la badɛnla ɛkɛ ne.