1 O Awulae, wɔmɔ Nana Nyamenle mɔɔ ɛtea dasanli a; da wɔ ɛya ne mɔɔ wɔva la ali! 2 Maa ɛ nwo zo, O aleɛabo ndɛnebuavolɛ; tea mgbanyizonleyɛvoma kɛmɔ ɔfɛta la! 3 Kɔkpula kenle nzu, O Nana Nyamenle, mekɛ ne boni, yɛɛ amumuyɛvoma kɛhɔ zo kɛli fɛlɛko a? 4 Kɔkpula kenle nzu, yɛɛ deɛmunliyɛvoma kɛhɔ zo kɛmemaa bɛ nwo zo, na bɛkɛva bɛ ninyɛmunli ne mɔ bɛkɛdu bɛ nwo a? 5 Bɛtietia wɔ menli ne mɔ anwo zo, O Nana Nyamenle; na bɛteetee bɛdabɛ mɔɔ bɛle wɔ deɛ la. 6 Bɛku ahunlavolɛ ɔ nee nrisa mralɛ, na bɛbɔ nyɛvolɛ mɔɔ wɔ azɛlɛ ne azo la abo zo bɔkɔɔ; 7 na akee bɛka kɛ, "Awulae ɛnnwu ɛhye mɔ; Gyekɔbo Nyamenle ne ɛmbu ɛhye mɔ anwo mgbonda."

8 Bɛnwu ɛhye, O bɛmɛ mɔɔ bɛnlɛ ndelebɛbo a! Ahoasea, kenle nzu yɛɛ bɛkɛnwu nrɛlɛbɛ a? 9 Asoo ahenle ne mɔɔ yɛle ɛnzolɛ la, ɛnlɛ ɛnzolɛ ɔnde edwɛkɛ ɔ? Asoo ahenle ne mɔɔ yɛle ɛnyelɛ la, ɛnlɛ ɛnyelɛ ɔnnwu debie ɔ? 10 Asoo ahenle ne mɔɔ tea maanle maanle la ɛnrɛhola ɛnrɛdea sonla ɔ? Ahenle ne mɔɔ maa menli adwenle, 11 Nana Nyamenle ne, ze sonla biala ye adwenle; na ɔze bɛ kɛ bɛle kɛ ɛnwomenle gyɛne la.

12 Nyilalɛ ɛha sonla ne mɔɔ wɔmɔ ɛtea ye, O Awulae, na ɛdua wɔ mɛla ne azo ɛkakyihakyi ye, 13 amaa wɔamaa ye ɛnwomenlelielɛ wɔ ye ɛmianlɛ mekɛ nu, kɔkpula mekɛ mɔɔ bɛkɛpɛ kuma bɛkɛmaa atisesebɛvoma la. 14 Nana Nyamenle ɛnrɛkpo ye menli; ɔnrɛye bɛdabɛ mɔɔ bɛle ye deɛ la bɛ rɛle ɔnrɛdo bɛ sa nu. 15 Ɔluakɛ pɛpɛlilɛ bazia ara tenlenema anwo zo, na menli mɔɔ bɛ ahonle nu te la bali ɔ nzi. 16 Nwane a dwazo ko tia atisesebɛvoma maa me a? Nwane a ko me ti tia ɛtanevolɛma a? 17 Saa Nana Nyamenle anyɛ me boavolɛ a, anrɛɛ me ɛkɛla ɛhɔ mɔwuamra ewiade ne anu dɛbadɛba. 18 Melɛ mɔɔ menzele kɛ, "Melɛtele" la, wɔ ɛhulolɛ kpundii ne zɔle me nu gyinlanle, O Nana Nyamenle. 19 Saa me ahonle nu adwenledwenle ne so a, wɔ arɛlekyekyelɛ ne a maa me anyelielɛ a.

20 Asoo arelemgbunli atisesebɛvoma kɛhola kɛva bɛ nwo kɛbeta ɛ nwo ɔ? Bɛmɛ mɔɔ bɛhyehyɛ ngunzi mɛla la. 21 Bɛkye bɛ nwo file, na bɛko bɛtia tenlenema ngoane, na bɛbua menli mɔɔ ɛnze nwolɛ bie la ndɛne fɔle bɛkɔ ewule nu. 22 Noko akee Nana Nyamenle bɔ me nwo bane; yɛɛ me Nyamenle, mɔɔ le me feabelɛ la sinza me. 23 Ɔbadea bɛ wɔ bɛ ninyɛndane ne mɔ anwo, na yeaminli bɛ bo zo wɔ bɛ amumuyɛ nyɛleɛ ne mɔ ati. Yɛ Awulae Nyamenle ne baminliminli bɛ bo zo bɔkɔɔ.