1 Nana Nyamenle le yɛ nriandifeabelɛ nee yɛ anwosesebɛmaavo, ɔle yɛ ndɛndɛ boavolɛ wɔ yɛ ngyianlɛ nu. 2 Zɔhane ati kanzɛ bɔbɔ azɛlɛ kpusu, awoka wozo wɔ nyevile kunlu, 3 na nyevile kpudwu, eza ɔbu azɛlɛkye mgbole ɔpɛ awubue a, yɛnrɛzulo.

4 Azudenle bie wɔ ɛkɛ ne mɔɔ ɔse ɔpɛ nu wɔ Nyamenle sua zo a. Nyamenle Bedevinli ne ye tɛnlabelɛ nwuanzanwuanza ne. 5 Nyamenle wɔ ye avinli, bɛnrɛhola ɔ bo tu, na Nyamenle baboa ye ndɛndɛ zo. 6 Maanle maanle fa ɛya dwazo, na bɛko bɛgua; ɔbɔ ɔ ne nu a, ɛnee maanle maanle ɛgua dii.

7 Ɛlɔne Nana Nyamenle ne nee yɛ a de a; Gyekɔbo Nyamenle ne yɛɛ ale yɛ nriandifeabelɛ a. 8 Bɛrɛla bɛranlea nwanwane gyima mɔɔ Nana Nyamenle ɛyɛ a; bɛnlea deɛzɛkyelɛ mɔɔ yemaa yera azɛlɛ ye azo a. 9 Ɔmaa konle konle bɔ aze wɔ aleɛabo ɛleka biala; ɔbubu ɛda mbaka nu dwɔkɔdwɔkɔ na ɔbɔ atwɛ asande; na ɔfa senle ɔyela konlendeɛ dwɛɛ. 10 "Bɛzie bɛ nwo nane dii, na bɛnwu ye kɛ mame a le Nyamenle a; bɛkpogya me zo wɔ maanle maanle nyunlu, eza bɛkpogya me zo wɔ ewiade amuala."

11 Ɛlɔne Nyamenle ne nee yɛ a de a; Gyekɔbo Nyamenle ne a le yɛ nriandifeabelɛ a.