1 Tie me nzɛlɛlɛ, O Nana Nyamenle; wɔ wɔ tenleneyɛlɛ nu, tie me modolɛ! Bua me wɔ wɔ nɔhalɛlilɛ ne anu! 2 Mmafa mame, wɔ sonvolɛ, ɛkɔ ndɛnebualɛ nu; ɔluakɛ dasanli biala ɛnle tenlene wɔ ɛ nyunlu.

3 Kpɔvolɛ ne ɛkpo me na yedo me; yetietia me ngoane nwo zo feefee wɔ azeva nu. Yeva me yedo efiade awozinli kisikisi ne anu, na meyɛ kɛ mɔmoane amra ne mɔ mɔɔ wuwule la. 4 Zɔhane ati me sunsum ne anwo ɛgolo ye; me ahonle mɔɔ la me kunlu la anwo mɔra ɛdu bɔkɔɔ. 5 Mekakye mekɛ ne mɔɔ ɛraze ɛhɔ la, na medwenledwenle mɔɔ ɛyɛle ɛmaanle me la anwo, wɔ me ahonle nu koonwu; mesie me adwenle dii na mekakyehakye wɔ nyɛleɛ ne mɔ amuala. 6 Mekpogya me sa zo memaa wɔ wɔ nzɛlɛlɛ nu; kɛmɔ azɛlɛ ngetele anwo dɔ nzule la, zɔhane ala yɛɛ ɛ nwo nzuhɔne ɛlɛku me ɛkɛla ne a. 7 Maa ɛ nwo ɛyɛ ndɛ kɛ ɛkɛbua me, O Nana Nyamenle! Me anyelazo kpokpoti ɛde ɛminli. Mmafa ɛ nyunlu ɛfea me; anrɛɛ yemɔ menwɔyɛ kɛ bɛdabɛ mɔɔ bɛwu bɛhɔ ɛbolɔ Kuma ne anu la. 8 Kakye me nwonlomɔ biala, wɔ wɔ ɛhulolɛ nwanwane ne anwo; ɔluakɛ wɔ nu yɛɛ mefa me rɛle mewula a. Kilehile me adenle mɔɔ ɔwɔ kɛ mefa zo a, ɔluakɛ wɔmɔ ala yɛɛ me nzɛlɛlɛ dwu ɛ nyunlu a. 9 Pepɛ die me fi me kpɔvolɛma asa anu, O Nana Nyamenle! Menriandi mera wɔ ɛkɛ kɛ mebakpondɛ feabelɛ! 10 Kilehile me maa menyɛ wɔ ɛhulolɛdeɛ, ɔluakɛ wɔmɔ yɛɛ ɛle me Nyamenle a! Maa wɔ sunsum kpalɛ ne ɛli me nyunlu dahuu, na ɔva me ɔva adenle mɔɔ munzule biala ɛnle nu la anu!

11 Ɔlua wɔ duma ne ati, fa me ngoane sie kpalɛ, O Nana Nyamenle! Wɔ wɔ tenleneyɛlɛ nu, ye me fi anwongyelelɛ nu! 12 Ɔlua wɔ ɛhulolɛ nwanwane ne mɔɔ ɛlɛ ye ɛmaa me la ati, ku me kpɔvolɛma amuala; na sɛkye bɛdabɛ mɔɔ bɛteetee me la kpokpoti, ɔluakɛ mele wɔ sonvolɛ.