1 O Awulae, yɛ Nyamenle, wɔ tumi nee wɔ anyunlunyia kpokpoti da ali wienyi wɔ ewiade amuala! Wɔ nganvolɛ noko dwu anwuma anwuma. 2 Wɔhile ngakula ngyikyi ngyikyi ne mɔ kɛ bɛzi bɛdo wɔ nganvolɛ edwɛne ne la: Maa ɛhye bɔbɔ mɔɔ wɔyɛ la ɛha wɔ kpɔvolɛma aze. Komo bɛdabɛ mɔɔ bɛtendɛ bɛtia wɔ la anwo zo, na maa bɛ nyunlu nyiane ɛgua aze.

3 Saa menea anwomanyunlu, mɔɔ le ɛ sa anloa gyima, ɔ nee amungu nee nwɔlɛra ne mɔ mɔɔ wɔziezie bɛ la a, 4 ɛnee duzu bɔbɔ a le sonla, mɔɔ ɔwɔ kɛ ɛdwenle ɔ nwo a; sonla ala, mɔɔ ɔwɔ kɛ ɛnea ɔ nwo zo a? 5 Noko akee wɔkpogya ye zo ekyi bie ala wɔ anwumabɔvolɛma ne mɔ abo; na wɔdɔ alagye ala wɔhyehyɛ anyunlunyia kyɛlɛ wɔzoa ye, na wɔva enililɛ ngome wɔbɔ ye abotile.

6 Wɔva wɔ abɔdeɛ kpokpoti wɔwula ɔ sa; na wɔmaa ye tumi wɔ debie biala anwo zo; 7 mboane nee nlankɛ, ɔ nee ɛbɔ nu nane nane mɔ noko; 8 nloma ne mɔ nee fɛlɛ, ɔ nee ninyɛne mɔɔ wɔ nyevile kunlu la amuala. 9 O Awulae, yɛ Nyamenle, wɔ tumi nee wɔ anyunlunyia kpokpoti da ali wienyi wɔ ewiade amuala!