Edwɛndolɛ 110

Edwɛndolɛ mɔɔ fale Devidi Ara Nrenyia ne anwo la

1 Awulae hanle hilele me menle, Ngoanedievolɛ ne kɛ, "Tɛnla me sa fema ye azo, kɔkpula mekɛ mɔɔ menwɔva wɔ kpɔvolɛma menwɔwula ɛ gyakɛ abo la."

2 Nana Nyamenle zoanle ye belemgbunli tumi ne vile Zayɔn. Ɔse, "Sie wɔ kpɔvolɛma ne mɔ." 3 Wɔ kenle ne mɔɔ ɛ nee wɔ kpɔvolɛma baho la, wɔ menli ne mɔ badu bɛ nwo azie ɛkɛ bɛazua ɛ nzi. Wɔ mgbavolɛ mgbavolɛ ne mɔ bara wɔ ɛkɛ wɔ wɔ Boka Nwuanzanwuanza ne azo, kɛ aleɛbahye ɛbɔlɛ mɔɔ tɔ la.

4 Nana Nyamenle ɛbɔ ɛwɔkɛ, na ɔnrɛhakyi ye amonle ne mɔɔ yeli la: kɛ, "Wɔmɔ ɛle sɛlɛvolɛ wɔ mekɛ mɔɔ ɔnlɛ awieleɛ mɔɔ di Mɛlekezidɛke anzi a."

5 Awulae wɔ ɛ sa fema zo; na ɔbabɔ arelemgbunli asande wɔ ye ɛyavalɛ kenle ne anu. 6 Ɔbabua maanle maanle ndɛne fɔlɛ, na yeamaa bɛ avunli ayi bɛ azɛlɛ ne mɔ tɔ; ɔbaha adile dɔɔnwo yeagua wɔ aleɛabo ɛleka biala. 7 Na ɔdaye mumua ne ɔbanlo nzule yeavi azundenle mɔɔ wɔ ye adenle nloa la, na akee ɔnyia anwosesebɛ a, ɔbadwazo yeagyinla wɔ konimlilɛ nu.