1 O Awulae Nyamenle, fa wɔ pɛpɛlilɛ ne maa wɔ Belemgbunli ne; fa wɔ tenleneyɛlɛ ne maa belemgbunli ara ne! 2 Maa ɔva pepɛlilɛ ɔbua wɔ menli ndɛne, na ɔva tenleneyɛlɛ ɔmaa menli mɔɔ wɔ ngyianlɛ nu la. 3 Maa awoka ne mɔ amuala ɛzo anzondwolɛ ma ɛmaa maanle ne anu amra; maa tenleneyɛlɛ noko ɛrɛla! 4 Maa ɔho ɔlie ehyiavolɛma, na akee ɔpepɛ ɔlie menli mɔɔ wɔ ngyianlɛ nu la, na ɔbɔ amumuyɛvo ne abo zo bɔkɔɔ. 5 Maa ɔdɛnla ngoane nu, wɔ mekɛ ala mɔɔ sɛnzɛne nee siane tɛbɔ anwomanyunlu la wɔ ɛlɔnwɔne kpokpoti mɔɔ bara la anu.

6 Maa ɔyɛ kɛ fɔsɛlɛ ezule mɔɔ tɔ gua azɛlɛ zo, ɔ nee nyenyensuo mɔɔ tɔ gua azɛlɛ mɔɔ ɛhete la azo la. 7 Wɔ ye belemgbunlililɛ mekɛ nu, maa tenleneyɛlɛ ɛrɛla azɛlɛ ye azo; na anzondwolɛ ɛbu zo kɔkpula kɛ siane ɛnrɛda bieko a! 8 Maa ye belemgbunli maanle ne ɛdɛlɛ ɛhɔ maanle ti nee maanle bo; maa ɔvi Azule ne anu, ɔva ewiade ye amuala kpokpoti. 9 Maa bɛdabɛ mɔɔ bɛde ɛsɛlɛ ne azo la ɛbɔ bɛ ti aze ɛmaa ye; na maa bɛdabɛ mɔɔ bɛkyi ye la ɛtafetafe azeva ne! 10 Maa arelemgbunli mɔɔ vi Tahyehye, ɔ nee bɛdabɛ mɔɔ gua bɔra ne azo la ɛzonle ye; yɛɛ arelemgbunli noko mɔɔ vi Sheba ɔ nee Seba la ɛva bɛ ahyɛlɛndeɛ ɛrɛlɛ ye. 11 Maa arelemgbunli kpokpoti ɛbɔ bɛ ti aze ɛmaa ye; maanle maanle muala ɛzonle ye!

12 Ɔluakɛ ɔpepɛ ɔdie bɛdabɛ mɔɔ bɛsu bɛfɛlɛ ye wɔ bɛ anwongyelelɛ nu la, ɔ nee ehyiavolɛma nee bɛdabɛ mɔɔ bɛnlɛ boavolɛma la. 13 Ɔse bɛdabɛ mɔɔ bɛnlɛ anwosesebɛ la ɔ nee ehyiavolɛma anwunvɔne, na ɔdie ehyiavolɛma ngoane. 14 Ɔpepɛ ɔdie bɛdabɛ mɔɔ menli ɛnva bɛ ɛnyɛ ɛhwee na bɛtietia bɛ nwo zo la ngoane; na ɛhye mɔ noko a bɛ ngoane sonle bolɛ maa ye a.

15 Maa ɔnyi ɔhyɛ, na bɛva nvutuke bɛvi Sheba bɛrɛle ye! Bɛhɔ zo bɛyɛ nzɛlɛlɛ bɛmaa ye, na bɛzɛlɛ Nana Nyamenle ye nyilalɛ bɛmaa ye dahuu! 16 Maa aleɛ ɛrɛla dɔɔnwo wɔ azɛlɛ ne azo; maa awoka ne mɔ kpokpoti ɛla aleɛ ne ali. Maa azɛlɛ ne ɛye ye mbakama kɛ Lɛbanɔn mbakama la; maa menli dɔɔnwo ɛrɛla azua mgbole ne mɔ azo, na bɛyɛ manyamanya kɛ ɛbɔ nu nvusinra la! 17 Mmamaa menli arɛle fi belemgbunli ne duma ɛlɛ; ye nganeɛ ɛwa azɛlɛ ye azo wɔ mekɛ ala mɔɔ ewia tɛfi la! Maa menli ɛlua ɔ nwo zo ɛnyia nyilalɛ, na maanle maanle kpokpoti ɛvɛlɛ ye ɛha kɛ: "Nyilalɛ ɛha ye!"

18 Nyilalɛ ɛha Awulae, mɔɔ le Yizilayɛ Nyamenle ne, mɔɔ ɔ ngomekye a ɔyɛ nwanwane ninyɛne ɛhye mɔ la! 19 Nyilalɛ ɛha ye anyunlunyia duma ne wɔ mekɛ mɔɔ ɔnlɛ awieleɛ! Ye anyunlunyia ɛyi ewiade amuala tɛkɛɛ! Ɔyɛ ɛkɛ! Na eza Ɔyɛ ɛkɛ!

20 Gyɛsi ara Devidi, ye nzɛlɛlɛ ne awieleɛ ne ɛne.