1 Ahenle mɔɔ twe bikye Awulae Nyamenle kpondɛ feabelɛ, na Nyamenle Bedevinli ne yɛ ɛlawolɛ keda ɔ nwo zo la, 2 yemɔ yɛɛ baze Nana Nyamenle kɛ, "Ɛle me feabelɛ ɔ nee me bodane; ɛle me Nyamenle, wɔmɔ a me rɛle wɔ wɔ nu a." 3 Ɔbalie wɔ yeavi kpɔvolɛma ngane mɔɔ bɛzuozua kɛ bɛfa bɛazɛkye wɔ, ɔ nee ewule ewule mɔɔ fa bɛ kɔ ewule nu la anu. 4 Ɔbava ɔ ndɛba ne mɔ yeaheda ɛ nwo zo; na wɔ ye boɛnleanlɛ bo yɛɛ ɛbanyia wɔ feabelɛ a; ye diedi kpundii ne bayɛ wɔ sinzavolɛ nee wɔ wowadeɛ. 5 Ɔnrɛmaa ɛnrɛzulo debie biala mɔɔ ka ɛzulolɛ wɔ nɔɔzo, anzɛɛ ɛda mbaka mɔɔ bɛtoto ye alehyenlɛ nu, 6 anzɛɛ ewule ngakyile ngakyile mɔɔ ye bɛ nwo ali wɔ awozinli nu, anzɛɛ munzudeɛ biala mɔɔ ku ɛkɛla ne ewia henlema la.

7 Apenle bapɛ afi wɔ wɔ foa ko, na apenle bulu agua ɛ sa fema zo; noko akee ɛhye mɔ ɛnrɛkputi wɔ ahonle bɔbɔ. 8 Ɛ nye ala yɛɛ ɛbava wɔanlea na wɔanwu kɛ ɛtanevolɛma bɛ ndeanlɛ si de la a. 9 Kɛmɔ wɔva Nana Nyamenle wɔyɛ wɔ feabelɛ, na Nyamenle Bedevinli ne mɔɔ wɔ Anwuma la le wɔ sinzavolɛ la ati, 10 munzule biala ɛnrɛra ɛ nwo zo; yɛɛ ewule biala noko ɛnrɛvinde wɔ aako nu. 11 Ɔluakɛ Awulae Nyamenle bamaa ye anwumabɔvolɛma ne mɔ anlea ɛ nwo zo, na bɛawowa wɔ wɔ adenle biala anu. 12 Bɛbadedɛ wɔ anwuma wɔ bɛ sa nu, ammaa ɛ gyakɛ amkpula bolɛ biala. 13 Ɛbatietia awenade ɔ nee nwɔlɛ nwo zo; awenade ngakula ɔ nee nwɔlɛ ayidane nwo zo yɛɛ ɛbava ɛ gyakɛ wɔatietia a.

14 Nana Nyamenle se, "Mebalie bɛdabɛ mɔɔ bɛkulo me la ngoane, na meazinza bɛdabɛ mɔɔ bɛze me kɛ mame a le Awulae la. 15 Saa bɛsu bɛfɛlɛ me a, mebalie bɛ zo; saa bɛkɔ ɛmianlɛ nu a, mebara bɛ afoa. Mebalie bɛ ngoane, na meawula bɛ anyunlunyia. 16 Mebamaa bɛ ngoane tendenle ahyɛlɛdeɛ mɔɔ bɛ kunlu badwo nwo a; mebamaa bɛanwu me ngoanelielɛ tumi ne."