1 O Awulae, wɔmɔ yɛɛ mefa me ahonle kpokpoti meyɛ wɔ mo a; meto ayɛlɛyelɛ edwɛne memaa wɔ wɔ awozonle ne mɔ anyunlu. 2 Mebɔ me ti aze mekile wɔ Tɛnlabelɛ Nwuanzanwuanza ne, na mefa moyɛlɛ memaa wɔ duma ne, wɔ wɔ ɛhulolɛ kpundii ɔ nee wɔ nɔhalɛlilɛ ne ati; ɔluakɛ wɔmɔ wɔkpogya wɔ duma ne, ɔ nee wɔ edwɛkɛ ne zo wɔ ninyɛne muala anwo zo. 3 Mekɛ mɔɔ menzunle menvɛlɛle wɔ la, wɔmɔ ɛdiele me; ɔlua wɔ anwosesebɛ ne azo, ɛmaanle medame noko me nwo yɛle se.

4 O Nana Nyamenle, aleɛabo arelemgbunli kpokpoti bahanvo wɔ, ɔluakɛ bɛde edwɛkɛ ne bɛvi ɛ nloa anu. 5 Bɛbado wɔ nyɛleɛ ne anwo edwɛne, ɔluakɛ wɔmɔ Nana Nyamenle, wɔ anyunlunyia ne le totohyia. 6 Saa kanzɛ wɔmɔ Nana Nyamenle, ɛwɔ anwuma bɔbɔ a, ɛbu bɛdabɛ mɔɔ bɛbutubutu azɛlɛ ye azo la anwo mgbonda, na amemaabɛnwozovoma ne mɔ ɛdeɛ, bɛmɛ ɛnwu bɛ wɔ moamoa nehane. 7 Kanzɛ melua anwubɛnyunlu azɛlɛ ye azo bɔbɔ a, wɔmɔ ɛfa me ngoane ɛsie kpalɛ. Ɛtende ɛ sa wɔ me kpɔvolɛma mɔɔ bɛhele la anwo zo, na ɛfa wɔ tumi ne ɛdie me ngoane. 8 Nana Nyamenle, ɛbamaa wɔ ngyehyɛleɛ kpokpoti ali munli; O Awulae, wɔ ɛhulolɛ kpundii ne le damɛnlangoate. Mmamaa ɛ rɛle fi me, ɔluakɛ wɔmɔ yɛɛ ɛbɔle me a.