1 Bɛmɛ tumivolɛma, asoo amgba ala bɛbua nɔhalɛ ndɛne ɔ? Asoo bɛbua menli ne amuala edwɛkɛ nɔhalɛ nu ɔ? 2 Kyɛkyɛ, wɔ bɛ ahonle nu, ɛtane ala a bɛdwenle nwo a; bɛ sa anloa gyima biala le munzule ngome wɔ azɛlɛ ye azo. 3 Amumuyɛvoma bɛ nyɛleɛ, bɛfa bɛwo bɛ; bɛbɔ ɔ bo bɛvi bɛ awolɛ nu bɛbɔ adalɛ na bɛyɛ ɛtane. 4 Bɛ gye ati yɛ nyane kɛ nwɔlɛ la; yɛɛ bɛduodua bɛ nzo kɛ bɔna la; 5 ammaa bɛande ɛwɔlɛ ngonyiayevoma edwɛne ne nee bɛ ɛdendɛlɛ.

6 O Nana Nyamenle, bubu bɛ gye fi bɛ nloa anu; tudu bɛ gye mgbole ne mɔ mɔɔ le kɛ awenade ɛdeɛ ne la gua, O Awulae! 7 Maa bɛ bo zo ɛminli kɛ sɛlɛkye mɔɔ to gua aze la; maa bɛyela wee kɛ adenle nu ndile mɔɔ bɛtietia zo la. 8 Maa bɛyɛ kɛ nlonkoɛ mɔɔ bɛ nloa nyɛlɛ sa bɛ kpokpa, anzɛɛ kɛ adɔma mɔɔ wu wɔ mogya nu la. 9 Bɛ nye zo katete bɛ la, ɛnee bɛzo bɛ begua kɛ ɛya la, anzɛɛ ɛnee bɛlɛyela bɛ bɔkɔɔ!

10 Tenlenema bali fɛlɛko, wɔ mekɛ mɔɔ bɛkɛnwu kɛ bɛdua ɛtanevolɛma kakɛ la; na bɛbatietia amumuyɛvoma ne mɔ mogya ne anu. 11 Menli baha kɛ, "Amgba tenleneyɛlɛ nwo lɛ nvasoɛ; nɔhalɛ nu, Nyamenle bie wɔ ɛkɛ ne, mɔɔ bua aleɛabo amra ndɛne a."