1 Nyilalɛ totohyia ɛha bɛdabɛ mɔɔ bɛnyia ɛtanefakyɛ la! Anyelielɛ kpole ɛha bɛdabɛ mɔɔ bɛkyikyi bɛ ɛtane bɔkɔɔ la! 2 Nyilalɛ ɛha bɛdabɛ mɔɔ Nana Nyamenle ɛva bɛ ɛtane ɛhyɛ bɛ, na bɛhwe bɛ nwo bɛvi ɛtaneyɛlɛ nwo bɔkɔɔ la.

3 Mekɛ mɔɔ ɛnee metɛdale me ɛtane ali la, me ngoane zo dele yɛle ekyii bie. 4 Ɛnee wɔ ndeanlɛ ne wɔ me nwo zo, O Awulae, alehyenlɛ nee aledwolɛ muala. Na me nɔhalɛ mɔɔ menli la vale me hɔle ngyegyelɛ nu, na alɔbɔlɛ kpole hunle me. 5 Akee menganle me ɛtane mengilele wɔ; na meanva me ɛtane meanvea bieko. Menzele kɛ, "Meka me ɛtane kpokpoti meahile Awulae." Na wɔmɔ wɔva me ɛtane wɔhyɛ me amgba; wɔnrinzi me ɛtane kpokpoti.

6 Ɛhye ati a bɛdabɛ mɔɔ bɛdie wɔ bɛdi la, ɔwɔ kɛ bodo sɛlɛ wɔ wɔ anwongyelelɛ mekɛ nu la: nɔhalɛ nu, saa azukpole bɔbɔ yi a, ɔnrɛhola yɛ fa.

7 Wɔmɔ a ɛle me feabelɛ a; ɛbɔ me nwo bane ɛfi munzule nu. Memaa me ne zo meyeyɛ wɔ, ɔluakɛ wɔmɔ a ɛdie me ngoane a. 8 "Mebahilehile wɔ," Awulae a se a, "Na meamaa wɔanwu adenle mɔɔ ɔwɔ kɛ ɛfa zo la; mebava me nye meabɔ ɛ nwo mgbɔlɛka. 9 Bɛmmamaa bɛyɛ kɛ mgbɔnwɔ anzɛɛ nlankɛ mɔɔ bɛnze nrɛlɛbɛ, mɔɔ wɔando adabɛlaka nee ɔ nwo nyɛma bɛ kɔme nu a ɛtwe bɛ a bɛngɔ la."

10 Alɔbɔlɛ somaa ne ala ku amumuyɛvoma; na emomu Nana Nyamenle fa ye anwunvɔnezelɛ ne bɔ bɛdabɛ mɔɔ bɛfa bɛ rɛle bɛwula ye nu la anwo bane. 11 Bɛli fɛlɛko wɔ Awulae nu, na bɛmaa bɛ nye ɛlie, O bɛmɛ tenlenema. Ɔlua mɔɔ Nana Nyamenle ɛyɛ la ati, bɛva anyelielɛ bɛdeɛdea nu, O bese mɔɔ bɛ ahonle nu te a!