1 Ko me ti konle maa me, O Nana Nyamenle; ɛ nee bɛdabɛ mɔɔ nee me di apelepele la ɛli ye ɛnwonle nu. 2 Fa wɔ konle tɛladeɛ ne wula, fa wɔ etu ne ndɛndɛ; na ɛlɔne ɛlɛfa me aze. 3 Gua ndumunli nee etu awolɛ wɔ wɔ etu ne anu, na ko die me. Bɔ me ɛwɔkɛ se me kɛ, ɛle me ngoanedievolɛ. 4 Maa anyiemgba nee nyiane ɛha bɛdabɛ mɔɔ kpondɛ me azɛkye me la; maa bɛdabɛ mɔɔ bɛva me ti akpame la bɛ adwenle ɛyɛ bɛ tindaanwu, na bɛhakyi bɛ adwenle. 5 Maa bɛyɛ kɛ ɛhonle mɔɔ anwoma ɛlɛbɔ bɛ la; na maa Nana Nyamenle anwumabɔvolɛma ɛsɛla bɛ nu. 6 Maa bɛ adenle nu ɛyɛ awozinli kabii, na nuhua noko ɛyɛ teteletetele; maa Nana Nyamenle anwumabɔvolɛ ɛdi bɛ aze. 7 Ɔluakɛ metɛyɛle bɛ ɛtane biala; noko akee bɛzua me gyakɛ abo ɛhane. Bɛpɛ kuma me gyakɛ abo; bɛkpondɛ bɛaha me bɛado nu. 8 Maa bɛnwu bɛ nyunlu kpole kpalɛ; na bɛdabɛ bɛ munzule ɛbɔ bɛ ti zo.

9 Maa menli fɛlɛko wɔ Nana Nyamenle nu; maa menyia anyelielɛ wɔ me ngoanedievolɛ ne nu. 10 Mefa me ahonle nu moyɛlɛ kpalɛ memaa wɔ. Awie biala ɛnle ɛkɛ, O Nana Nyamenle, mɔɔ ɔ nee wɔ dwudwu a ɔkɛhola wɔ a. Wɔmɔ yɛɛ ɛdie mɔɔ ye anwosesebɛ ɛwie la ɛfi anwosesebɛvolɛ asa anu a; wɔmɔ yɛɛ ɛdie ehyianli ɛfi akɛlɛyɛlɛ nu a.

11 Adalɛ nabalabama dwazo me ti zo; na bɛdi dasewia bɛtia me. 12 Meyɛ bɛ kpalɛ a, bɛfa ɛtane bɛtua me kakɛ; ɛhye maa me ɛkɛla di nyane kɔ ewule nu. 13 Na mame ɛdeɛ, saa anwonyane bɔ bɛ a, mekeda ɛzɛne ɛdanlɛ; mekye me nwo ɛhɔne, na mesɛlɛ memaa bɛ. 14 Meyɛ asɔne memaa bɛ kɛ asɛɛ bɛle me gɔnwo mɔ, anzɛɛ me mediema la. Mekye me nwo ɛhɔne meyɛ asɔne, kɛ asɛɛ sonla mɔɔ ɔ nli ɛwu la. 15 Noko akee saa edwɛkɛ to me a, bɛkuohua bɛ nloa ɛleka ko na bɛdi fɛlɛko. Nɔhalɛ nu, anzulo Nyamenlema ne mɔ di ahua; na bɛdwazo me nwo zo bɛsi me amgbu; bɛbo me na bɛyɛ me ayɛkayɛkadeɛ. 16 Adalɛ nabalabama ne mɔ dwazo si me ti zo agole; bɛdi me nane kɛ mgbɔtɛ ɛnyia deɛfunli bie ɛlɛdi la.

17 Ɛbadɛnla ɛkɛ wɔanlea ɛhye dahuu ɔ, O Awulae? Die me fi bɛ deɛzɛkyelɛ ɛsalɛ ne mɔ anu; die me ngoane fi ahodiawu ɛhye mɔ ngane ne mɔ anu; 18 amaa meaye wɔ ayɛlɛ wɔ wɔ diedima anyunlu; na meahanvo wɔ meahile maanle maanle.

19 Mmamaa metɔ aze, na me kpɔvolɛma adalɛ nabalabama di nwolɛ fɛlɛko. Eza noko mmamaa bɛdabɛ mɔɔ bɛkyi me la adenle maa bɛbubu me anyehoanlɛ mgbane mgbane. 20 Ɔluakɛ bɛnli anzondwolɛ nee koyɛlɛ nwo adwelie: Na emomu, bɛdwenle adwenle ɛtane ɛtane bɛtia bɛdabɛ mɔɔ bɛkpondɛ anzondwolɛ, nee koyɛlɛ bo zo la. 21 Bɛtendɛ bɛtia me. Ɛhɛe, bɛtendɛ bɛtia me bɛse kɛ, "Yɛdayɛ yɛnwu ye yɛ nye amu nwiɔ." 22 O Nana Nyamenle, wɔmɔ ɛze ninyɛne muala; mmayɛ ɛ nloa kpulu wɔ ɛhye mɔ anwo. Mmagyakyi me ɛkɔ moa, O Awulae!

23 Kɛha ɛ nwo, O Awulae, na pepɛ die me! Dwazo, na di me ti edwɛkɛ maa me, me Nyamenle nee me Awulae. 24 Bua me ndɛne benle, O Nana Nyamenle me Nyamenle, kɛmɔ wɔ tenlene ne de la; na mmamaa bɛdi me azedɔlɛ nwo fɛlɛko. 25 Mmamaa bɛka ye wɔ bɛ ahonle nu kɛ, "Yɛnyia bie yɛyɛ ye!" Mmamaa bɛse kɛ, "Mɔɔ yɛkpondɛ yɛayɛ ye la a yɛwie ye yɛ la!"

26 Tudu me kpɔvolɛma agye, na maa nyiane ɛhu bɛ; maa anyiemgba ɛha bɛdabɛ mɔɔ bɛmbu me bie la. 27 Maa bɛdabɛ mɔɔ bɛ nye sɔ me tenleneyɛlɛ ne la ɛli fɛlɛko; ɛhɛe, maa bɛha ye dahuu kɛ, "Nyilalɛ ɛha Nana Nyamenle!" Yemɔ mɔɔ ɔ nye sɔ ye akɛlɛ tenlene gyima kpalɛ nwo a. 28 Na akee mebahanvo wɔ tenleneyɛlɛ ne dahuu; mebaye wɔ ayɛlɛ alehyenlɛ nee aledwolɛ muala.