1 Bɛye Nana Nyamenle ayɛlɛ! Bɛye Awulae ayɛlɛ bɛvi anwuma maanle ne anu, bɛmɛ mɔɔ bɛde anwuma moamoa nehane la! 2 Bɛye ye ayɛlɛ, bɛmɛ ye anwumabɔvolɛma; bɛye ye ayɛlɛ, bɛmɛ anwumaneamra mɔɔ bɛko bɛmaa ye a! 3 Bɛye ye ayɛlɛ, sɛnzɛne ɔ nee siane; bɛye ye ayɛlɛ, bɛmɛ nwɔlɛra mɔɔ ta la! 4 Bɛye ye ayɛlɛ, bɛmɛ anwuma anwuma maanle nu amra, ɔ nee bɛmɛ azule azule mɔɔ bɛwɔ anwuma anwuma ne anye la!

5 Bɛmaa bɛ kpokpoti bɛye Nana Nyamenle ye duma ne ayɛlɛ! Ɔluakɛ ɔbukele ɔ nloa ɔdendɛle, yɛɛ bɛbɔle bɛ muala a. 6 Ɔlua ye tumi ɛdendɛlɛ zo yɛɛ bɛraduoduale bɛ bo zo ne mɔ wɔ anwuma ɛkɛ wɔ mekɛ mɔɔ ɔnlɛ awieleɛ la a; ɛhye ati bɛnrɛhola bɛnrɛha kɛ bɛnrɛli ye mɛla zo.

7 Bɛye Nana Nyamenle ayɛlɛ bɛvi azɛlɛ ye azo, bɛmɛ nyevizonle ɔ nee ninyɛne mɔɔ wɔ nyevile kunlu la kpokpoti; 8 ɛsɛlɛmanye ɔ nee ahumu, asukɔntweaba ɔ nee amungu ɔ nee ahumu mgbole mɔɔ bɛtie ye edwɛkɛ la! 9 Bɛye ye ayɛlɛ, awoka ngyikyi nee awoka mgbole, mbaka mɔɔ so ma, ɔ nee sida mbaka kpokpoti; 10 nyɛmoa muala, sua nu ɔ nee ɛbɔ nu ɛdeɛ, nyɛmoa mɔɔ twenle bɛ kɛnra aze ɔ nee anwomanyunlu nloma muala! 11 Bɛye ye ayɛlɛ, aleɛabo arelemgbunli ɔ nee menli kpokpoti, azafohyenle ɔ nee ewiade tumivolɛma kpokpoti! 12 Mgbavolɛ nee mbɛlɛra, mgbanyinli ɔ nee ngakula bɛdabɛ noko! 13 Bɛmaa bɛ kpokpoti bɛye Nana Nyamenle duma ne ayɛlɛ! Ɔluakɛ ye duma ne yɛ fɛ ɔtɛla anluma kpokpoti; ye anyunlunyia ne bo ewiade nee anwuma maanle ne mɔ anwo zo. 14 Ɔmaanle ye maanle ne anwo yɛle ɛsesebɛ, amaa ye menli kpokpoti aye ye ayɛlɛ, Yizilayɛma mɔɔ ye ahonle wɔ bɛ nwo, na bɛsonle bolɛ bɛmaa ye la.

Bɛye Awulae Ayɛlɛ!