1 Meteɛdea nu mefɛlɛ Nana Nyamenle; meteɛdea nu mefɛlɛ ye, amaa yeadie me. 2 Wɔ me ɛmianlɛ mekɛ nu, mekpondɛ Awulae abo zo; nɔɔzo biala metɛlɛdɛlɛ me sa nu mesɛlɛ Awulae; noko akee me ɛkɛla ɛmmaa adenle ɛmmaa bɛnkyekye ɔ rɛle ɛlɛ. 3 Saa medwenle Awulae anwo a, hoo hoo ala a meyɛ a; saa meyɛ ahonle nu nzɛlɛlɛ a, me ɛkɛla di nyane somaa ne ala. 4 Ngɔsɔkɛ ala a mebɔ aledwolɛ biala a; medi nyane somaa ne ala, ɔlua zo mengola tendɛ.

5 Medwenledwenle mekɛ mɔɔ ɛraze la anwo; mekakyehakye ɛvolɛ bie mɔɔ ɛpɛ nu ɛhɔ dɛbadɛba la. 6 Medwenledwenle nwolɛ wɔ me ahonle nu nɔɔzo biala; mesie me adwenle koonwu na meneɛnlea me ahonle nu. 7 "Asoo Nyamenle bakpo me dahuu ɔ? Asoo ɔnrɛze me anwunvɔne bieko ɔ? 8 Ɛnee ye ɛhulolɛ nwanwane ne mɔɔ ɔnlɛ awieleɛ la ɛbɔ aze anzɛɛ? Anzɛɛ ɛnee ye ɛwɔkɛ ne mɔ anwo ɛnlɛ nvasoɛ bieko ɔ? 9 Anzɛɛ ɛnee Nyamenle arɛle ɛvi kɛ ɔkɛmaa yɛ ɛlolɛ ɔ? Ɔlua ɛyavalɛ nu yedo ye adwenle nu wɔ anwunvɔnezelɛ nu anzɛɛ?" 10 Na akee menganle kɛ, "Ɔlua me nyanelilɛ somaa ne ati, yɛɛ Awulae Nyamenle asa fema ne ɛhakyi a." 11 Mebahakye wɔ nwanwanendeɛ ne mɔ dahuu, O Awulae. Ɛhɛe, mebahakye wɔ nwanwane ninyɛne ne mɔ mɔɔ ɛyɛle bɛ dɛbadɛba ne la. 12 Mebazie me adwenle koonwu wɔ wɔ gyimalilɛ kpokpoti anwo; mebamaa me nye alie wɔ wɔ ninyɛne mgbole mgbole ne mɔ anwo.

13 O Nana Nyamenle, debie biala mɔɔ ɛyɛ la le nwuanzanwuanza. Nyamenle boni a le kpole kɛ yɛ Nyamenle ye a? 14 Wɔmɔ a ɛle Nyamenle mɔɔ ɛyɛ nwanwanendeɛ a; wɔmɔ a wɔla wɔ tumi ali wɔ menli nyunlu a.

15 Wɔmɔ yɛɛ wɔva ɛ sa wɔho wɔlie wɔ menli, Gyekɔbo ɔ nee Dwosefi abo zo amra a. 16 O Nana Nyamenle, mekɛ mɔɔ azule ne mɔ nwunle kɛ wɔmɔ a ɛle Nyamenle ne la, ɛzulolɛ kpole hanle bɛ. Nɔhalɛ nu, azumgbole ne mɔ anwo wozole bɛ. 17 Amungu dɔle nzule; ɛsɛlɛmanye kpakyekpakyele wɔ anwuma; na ɛda mbaka dudule bɔle asande wɔ ɛleka biala. 18 Anwuma deɛdeanle nu; yɛɛ akee ɛsɛlɛmanye ne zɔle senle zandele ewiade; na azɛlɛ wozole na ɔkpusule.

19 Ɛluale azɛlɛkye ne mɔ avinli; ɛpɛle nyevile tandane ne, noko akee bɛannwu ɛ gyakɛ abo zo ɛlɛ. 20 Ɛlile wɔ menli ne mɔ anyunlu kɛ Boaneneavolɛ, na ɛvale bɛ ɛwulale Mosisi ɔ nee ɔ diema Aalɔn asa.