1 Mekulo Awulae, ɔluakɛ ɔtie me; ɔtie me nzɛlɛlɛ. 2 Ɔgua ɔ nzo aze na ɔtie me; zɔhane ati mekɛ dodo mɔɔ mede ngoane nu la, saa mesu mefɛlɛ ye!

3 Ewule ngane bɔle me nwo mgbɔlɛka yiale; funli kuma nu ninyɛne ɛzulolɛ ɛzulolɛ mundunle me nwo zo; na menwunle me nyunlu, na menlile nyane somaa. 4 Akee menzunle menvɛlɛle Awulae menzele kɛ, "O Nana Nyamenle, mesɛlɛ wɔ, die me ngoane!" 5 Nana Nyamenle le kpalɛ! Ɔle anwunvɔnesevolɛ! Yɛ Nyamenle ne le alɔbɔlɛnwuvolɛ! 6 Nana Nyamenle sinza bɛdabɛ mɔɔ bɛbɛlɛ bɛ nwo aze la; mekɛ mɔɔ membikyele ewule la, ɔliele me ngoane. 7 O me ɛkɛla, sia bɛla wɔ ɛnwomenlelielɛ nu; ɔluakɛ Nana Nyamenle nee wɔ ɛli ye boɛ totohyia. 8 Awulae liele me ngoane vile ewule nu; ɔyele me nye ɔvile monle nu, na ɔyele me gyakɛ ɔvile ɛtelelɛ nu. 9 Ɛhye ati mede ngoane nu wɔ Nana Nyamenle anyunlu, wɔ anyewɔzo amra azɛlɛ ne azo.

10 Me diedi gyinlanle ye kpundii, bɔbɔ wɔ mekɛ mɔɔ menganle kɛ: "Melɛnwu nyane totohyia" la. 11 Menganle ye wɔ me ɛzulolɛ nu kɛ: "Diedi wɔ sonla nu le gyɛne." 12 Duzu a menwɔva menwɔmaa Nana Nyamenle, wɔ ye ahunlunyele mɔɔ wɔ me nwo zo la ɛ? 13 Mebava nwanye ahyɛlɛdeɛ mearɛlɛ Nana Nyamenle, na meayɛ ye mo kɛ yelie me ngoane a. 14 Mebadua me ɛwɔkɛ ne mɔɔ membɔle Nana Nyamenle la meamaa ye, wɔ ye menli ayiaku ne anyunlu. 15 Nea kɛ Nana Nyamenle akunlu yelɛyela ye bie, wɔ mekɛ mɔɔ ye menli ne mɔ anu ko kɛvi nu la ɛ!

16 O Nana Nyamenle, mele wɔ sonvolɛ; mebazonle wɔ, kɛmɔ ɔmɔ zonlenle wɔ ala la; ɔluakɛ wɔmɔ wɔzanyizanyi nyɛma mɔɔ kyekye me la amuala. 17 Mebabɔ moyɛlɛ azu meamaa wɔ, na meava me nzɛlɛlɛ kpokpoti meado ɛ nyunlu. 18,19 Wɔ Gyɛlusalɛm Asɔne Sua Kpole ne ye nwɔhoalilɛleka ne mɔ anu, wɔ wɔ menli ayiaku ne anyunlu, yɛɛ mebava ɛwɔkɛ biala mɔɔ membɔle wɔ la meamaa wɔ a. Bɛye Nana Nyamenle Ayɛlɛ!