1 O Nana Nyamenle mɔɔ fɛta me nganvolɛ a, mmaye ɛ nye ɛto ye ɛbɔ nu! 2 Ɔluakɛ amumuyɛvoma nee nzekubɔvoma, ɛdu bɛ nwo ɛgua me nwo zo. Bɛdi ahua na bɛka adalɛ edwɛkɛ wɔ me nwo. 3 Bɛtendɛ bɛtia me, na bɛteta me gyɛne nu ala wɔ melɛ mɔɔ metɛsele bɛ ɛhwee a. 4 Bɛtende bɛ sa wɔ me nwo zo, wɔ me ɛhulolɛ mɔɔ melɛ ye wɔ bɛ nwo, ɔ nee nzɛlɛlɛ mɔɔ mɛsɛlɛ memaa bɛ la ati, 5 Ɛhye ati bɛfa ɛtane bɛtua me kpalɛyɛlɛ kakɛ, na bɛkyi me wɔ me ɛhulolɛ mɔɔ melɛ ye la ati.

6 Tu ndɛnebuavolɛ atisesebɛvo maa ɔbua bɛ ndɛne, na maa kpɔvolɛma ɛva ye ɛrɛla ndɛneleka. 7 Saa bɛdi ye edwɛkɛ a, maa bɛbua ye fɔlɛ; maa bɛva ye nzɛlɛlɛ bɔbɔ kɛ asɛɛ ɛtaneyɛlɛ! 8 Pɛ ye ngoane mekɛ zo; na maa bɛve ɔ nwo ninyɛne. 9 Maa ɔ mra ɛyɛ nrisa mralɛ, na ɔ ye ɛyɛ kunlavolɛ. 10 Maa ɔ mra ne mɔ ɛluolua nu ɛzɛlɛzɛlɛ aleɛ, na maa bɛvoa bɛ bɛvi bɛ aako ne mɔ mɔɔ ɛtotɔ, mgbane la anu. 11 Maa menli mɔɔ ɔtua bɛ kakɛ la ɛva ɔ nwo ninyɛne kpokpoti, na maa nyɛvolɛ ɛve ye egyinli nu aleɛ. 12 Mmamaa awie biala yɛ ye nyele, anzɛɛ mmamaa awie se ye nrisa mralɛ ne mɔ anwunvɔne. 13 Maa ɔ bo zo amra abo zo ɛbɔ bɔkɔɔ, na maa ye duma ɛminli wɔ ɛlɔnwɔne mɔɔ badia ye nwiɔ ne la anu la. 14 Maa bɛhakye ɔ ze mɔ bɛ ɛtane mɔɔ bɛyɛle la wɔ Nana Nyamenle anyunlu, na mmamaa ɔ nli ɛtane mɔɔ ɔyɛle la abo zo minli. 15 Maa Nana Nyamenle ɛhakye bɛ ɛtane ne mɔ dahuu, na maa bɛ rɛle ɛvi bɛ bo zo bɔkɔɔ.

16 Ɔluakɛ yeangakye kɛ ɔkɛze anwunvɔne; emomu ɔdule ehyiavolɛma, ɔ nee bɛdabɛ mɔɔ bɛnlɛ anyelazo biala la ako, na ɔhwenle bɛdabɛ mɔɔ bɛlɛdi nyane la ɔhɔle ewule nu. 17 Ɔhulole amowalɛ; maa amowalɛ ne ɛzia ɛrɛla ɔ nwo zo! Yeangulo nyilalɛ, yemɔti mmamaa ɔnyia nyilalɛ ɛlɛ! 18 Ɔvale amowalɛ ɔbule tɛladeɛ ɔwulale; maa ye amowalɛ ne mɔ ɛloa ye tɔfɔɔ kɛ nzule, na ɔzonyi ɔhɔ ye mbowule ne mɔ anu kɛ nwole la!

19 Maa ɔyɛ kɛ tɛladeɛ mɔɔ yeva yekyekye ɔ nwo la, na ɔhye ɔ bo kɛ akyeso alehyenlɛ biala! 20 Nana Nyamenle, maa ɛhye ɛyɛ me kpɔvolɛma bɛ ahatualɛ, bɛdabɛ mɔɔ bɛtendɛ ɛtane bɛtia me ngoane la!

21 Na emomu, wɔmɔ Nana Nyamenle, me Nyamenle, ko maa me kɛmɔ ɛdawɔ wɔbɔ me ɛwɔkɛ la, na ɔlua wɔ ɛhulolɛ kpundii ne ye kpalɛyɛlɛ zo, die me ngoane.

22 Mele ehyianli, menlɛ anyelazo biala; me ɛkɛla di nyane somaa. 23 Mɛledie adenle meaminli minlimɛnla kɛ nɔsolɛ ɛlawolɛ la; bɛkpɔla me bɛdo kɛ kɛkɛba bie la. 24 Me gyakɛ agbɔkɛ ɛyɛ gugologugolo ɔlua ɛhɔnehyelɛ ti. Menwa meyɛ kamgbaanwo, menzɔho ɛhwee. 25 Saa me kpɔvolɛma nwu me a, bɛsele me ala; na bɛkɔsɔhɔsɔ bɛ ti wɔ amgbuzilɛ nu.

26 O Nana Nyamenle, me Nyamenle, boa me; ɔlua wɔ ɛhulolɛ kpundii ne ati die me ngoane! 27 Maa me kpɔvolɛma ɛnwu ye kɛ, ɛhye le wɔ nyɛleɛ, O Nana Nyamenle; wɔmɔ yɛɛ ɛpepɛ ɛdie me a. 28 Maa bɛwa me amonle, na emomu wɔmɔ yila me. Maa anyiemgba ɛha me kpɔvolɛma, na maa mame, wɔ sonvolɛ ne anye ɛlie.

29 Maa anyiemgba ɛheda me kpɔvolɛma anwo zo; maa anyunluguase ɛwula bɛ tɛladeɛ. 30 Mebava me nloa babonle ne meayɛ Nana Nyamenle mo totohyia; mebaye ye ayɛlɛ wɔ menli ayiaku ne anu, 31 ɔluakɛ ɔpepɛ ɔdie ehyiavolɛma mɔɔ bɛnlɛ anyelazo biala la, na ɔdie bɛ ngoane ɔfi bɛdabɛ mɔɔ bɛbua bɛ ewule fɔlɛ la asa anu.