1 Dwuda amra ze Nyamenle; yɛɛ ye duma le kpole wɔ Yizilayɛ maanle nu. 2 Ye tɛnlabelɛ wɔ Gyɛlusalɛm; yɛɛ Boka Zayɔn azo a ɔde a. 3 Ɛkɛ ne yɛɛ ɔbubule kpɔvolɛma ɛda mbaka ne mɔ, ɔ nee bɛ konle wowadeɛ ne mɔ, ɔ nee bɛ nrɛlande ne mɔ nee bɛ konlendeɛ muala anu a.

4 Anyunlunyia a le wɔmɔ, O Nana Nyamenle! Wɔ belemgbunlililɛ ne le kpole tɛla awoka ne mɔ ɛleka ne mɔɔ ɛhomonle wɔ kpɔvolɛma anwo zo la. 5 Bɛzale anwosesebɛvoma bɛliele bɛ konle anwonyia; bɛ muala bɛdedale botoo; ɛlɔne ne mɔ kpokpoti anwosesebɛ wiele; bɛangola bɛanyɛ debie biala. 6 O Gyekɔbo Nyamenle, mekɛ mɔɔ ɛbukele ɛ nloa ala la, ɛkpɔnwɔ nee ɔ menle mɔɔ de zolɛ la dele guale, kɛ asɛɛ nrɛlabɔlɛ ɛbobɔ bɛ la. 7 Na wɔmɔ mɔɔ ɛ nwo yɛ ɛzulolɛ zɛhae la, O Awulae! Nwane yɛɛ kɛhola kɛgyinla ɛ nyunlu, wɔ mekɛ mɔɔ wɔ ɛyavalɛ ne ɛdwazo la a? 8 Ɛvi anwuma maanle nu yɛɛ ɛbuale ndɛne a; na ɛzulolɛ hanle azɛlɛ ye azo amra ɔmaanle bɛyɛle dii, 9 Wɔ mekɛ mɔɔ wɔmɔ Nana Nyamenle ɛdwazole kɛ ɛbua ndɛne, kɛ ɛdie bɛdabɛ mɔɔ menli sisi bɛ wɔ azɛlɛ ye azo la ngoane la. 10 Nɔhalɛ nu, saa menli fa ɛya a, yɛɛ bɛye wɔ ayɛlɛ molozo kpalɛ a; na ɛyavalɛ mɔɔ ɛha noko la, ɛbava wɔahye ɛ bo kɛ falɛ la.

11 Bɛbɔ bɛ ɛwɔkɛ ne mɔ bɛmaa bɛ Nana Nyamenle bɛ Nyamenle, na bɛli zo; bɛmaa bɛdabɛ mɔɔ bɛbɔ ɔ nwo mgbɔlɛka bɛyia la ɛva bɛ ahyɛlɛndeɛ ɛrɛlɛ ahenle ne mɔɔ ɔwɔ kɛ bɛsulo ye la. 12 Yemɔ yɛɛ ɔbɛlɛ arelemgbunli mra mɔɔ memaa bɛ nwo zo la aze, na ɔmaa ɛzulolɛ ka arelemgbunli mɔɔ wɔ azɛlɛ ye azo la a.