1 O Nana Nyamenle, menli mɔɔ ɛnzonle wɔ la ɛrava wɔ azɛlɛ ne; bɛgua wɔ Asɔne Sua Nwuanzanwuanza ne anwo evinli; na bɛmaa Gyɛlusalɛm ɛdɔ nzonle bɔkɔɔ. 2 Bɛhu wɔ sonvolɛma ne mɔ, na bɛmaa bɛ avunli ne mɔ ɛyɛ aleɛ ɛmaa mgbɔtɛ. Bɛvuandi wɔ anwodelɛma ne mɔ noko bɛ avunli bɛmaa ɛbɔ nu nane nane kɛ bɛli. 3 Bɛhwi wɔ menli ne mɔ mogya bɛgua kɛ nzule la; bɛbɔ Gyɛlusalɛm anwo mgbɔlɛka bɛyia; na awie biala ɛnle ɛkɛ mɔɔ kɛzie avunli ne mɔ a. 4 Yɛyɛ amgbuzilɛ baka yɛmaa menli mɔɔ yɛ nee bɛ de la; menli mɔɔ ɛbɔ ɛyia yɛ la si yɛ amgbu, na bɛyelɛyela yɛ nwo.

5 Ɛbava yɛ nwo ɛya wɔahɔdwu kenle nzu, O Nana Nyamenle? Asoo wɔ nungulehwenlɛ ne bahɔ zo ayela yɛ kɛ senle ɔ? 6 Wola wɔ ɛya ne gua maanle maanle mɔɔ ɛnzonle wɔ la anwo zo; ɔ nee arelemgbunli maanle ne mɔ mɔɔ bɛmbɔ wɔ duma wɔ nu la! 7 Ɔluakɛ bɛhu Gyekɔbo abo zo amra ne mɔ kpokpoti; na bɛmaa bɛ bo zo ɛdɔ nzonle. 8 Mmadua egya mɔ ɛtane ne mɔ mɔɔ bɛyɛle la azo ɛtua yɛ kakɛ; maa wɔ anwunvɔnezelɛ ne ɛrɛla yɛ nwo zo ndɛndɛ; ɔluakɛ bɛbɛlɛ yɛ aze somaa, yɛnlɛ anyelazo biala. 9 Boa yɛ, O Nana Nyamenle, wɔmɔ mɔɔ ɛle yɛ ngoanedievolɛ la; wɔ wɔ duma ne anyunlunyia ne ati, ye yɛ fi munzule nu, na fa yɛ ɛtane kyɛ yɛ. 10 Duzu ati a ɔwɔ kɛ maanle maanle ka kɛ: "Bɛ Nyamenle ne wɔ nienwu a?" Maa kakɛ ne mɔɔ ɛtua menli mɔɔ wolale wɔ sonvolɛma mogya ne guale la ɛla ali wɔ maanle maanle nyunlu! 11 Maa efiadedavolɛma ɛzunlɛ nee bɛ nyanelilɛ ɛdwu ɛ nyunlu. Kɛmɔ wɔ tumi kpole ne de la, fa bɛdabɛ mɔɔ bɛziezie bɛ bɛmaa ewule la sie! 12 O Awulae, sia ɛ nzi fane nsuu bɛla yɛ gɔnwo mɔ mɔɔ yɛ nee bɛ de la avinli, wɔ amgbu mɔɔ bɛsi wɔ la anwo.

13 Na akee yɛdayɛ wɔ menli, wɔ mboane kpolane ne yɛbava moyɛlɛ yɛamaa wɔ wɔ melɛ mɔɔ ɔnlɛ awieleɛ. Ɔvi awolɛndoazo kɔdwu awolɛndoazo, yɛbaye wɔ ayɛlɛ dahuu.