1 Tie me nzɛlɛlɛ, O Nana Nyamenle, maa me modolɛ ɛdwu ɛ nyunlu! 2 Mmaye ɛ nyunlu ɛfea me wɔ me ɛmianlɛ mekɛ nu, gua ɛ nzo aze maa me, na tie me ndɛndɛ zo wɔ mekɛ biala mɔɔ menwɔvɛlɛ wɔ la.

3 Ɔluakɛ me ngoane mekɛ ɛlɛpɛ nu aze kɛ esike mɔɔ ɛlɛkpu la; me mbowule noko ɛlɛyela kɛ fovolɛ zo senle la. 4 Meyɛ kɛ ndile mɔɔ bɛtietia zolɛ la, na menwoso bɔkɔɔ; me rɛle bɔbɔ ɛvi me nwo kɛ menwɔli debie. 5 Ɔlua me nyanelilɛ ɛkponlenlɛ ne ati, menwa meyɛ kamgbaanwo zɛhae; menzɔho ɛhwee. 6 Meyɛ kɛ ɛkpɔtɛ mɔɔ la fienemgbole zo, kɛ kpadule mɔɔ wɔ suadu zo la. 7 Meda a ɔnla; meyɛ kɛ anloma mɔɔ gyi sua ti avinli mɔɔ ɔ nwo yɛ anwunvɔne la. 8 Alehyenlɛ kpokpoti me kpɔvolɛma si me amgbu; bɛdabɛ mɔɔ anrɛɛ bɛye me ayɛlɛ la, ɛnɛ fa me duma ka ndane wa amonle.

9 Me aleɛ a le ɛva, yɛɛ me nzule mɔɔ meno la a le monle. 10 Ɔlua wɔ ɛyavalɛ totohyia ne ati, wɔye me, wɔvuandi me wɔdo me lɔ bɔkɔɔ. 11 Me ngoane mekɛ le kɛ aledwolɛ ɛlawolɛ; mele kɛ ndile mɔɔ ɛnwoso la.

12 Noko akee wɔmɔ, O Nana Nyamenle, ɛle belemgbunli wɔ mekɛ mɔɔ ɔnlɛ awieleɛ. Ɛlɔnwɔne kpokpoti bahakye wɔ duma ne. 13 Ɛbadwazo na wɔaze Zayɔn anwunvɔne; mekɛ ne ɛdwu mɔɔ ɔwɔ kɛ ɛkile wɔ ahunlunyele a; mekɛ ne mɔɔ ɛhyehyɛle la ɛdwu. 14 Ɔluakɛ awolɛ ne mɔ sonle bolɛ maa wɔ sonvolɛma ne la ati, se ye ɛva ne anwunvɔne.

15 Maanle maanle bazulo Nana Nyamenle duma ne; arelemgbunli mɔɔ wɔ azɛlɛ ye azo la amuala bazulo ye tumi ne. 16 Ɔluakɛ saa Nana Nyamenle kyekye Zayɔn bieko a, ɔbala ye anyunlunyia ne ali. 17 Ɔbadie ye menli mɔɔ bɛye bɛ rɛle bɛdo bɛ sa nu la nzɛlɛlɛ, na ɔnrɛbu ɔ nye ɔnrɛgua bɛ ɛbizalɛndeɛ zo. 18 Maa bɛhɛlɛ ninyɛne ɛhye mɔ mɔɔ ɛzi la bɛdo ɛkɛ bɛmaa ɛlɔnwɔne mɔɔ bara la; amaa bɛdabɛ mɔɔ bɛtɛnyianle bɛtɛwole bɛ la anwu ye, na bɛaye Awulae ayɛlɛ. 19 Nana Nyamenle vi ye nwuanzanwuanzaleka ne dole ɔ nye nleanle aze; ɔdole ɔ nye ɔnleanle aleɛabo ɔvile anwuma maanle nu moamoa lɔ. 20 Ɔdele bɛdabɛ mɔɔ bɛgua efiade la bɛ nyanenwunlɛ, na ɔyele bɛdabɛ mɔɔ bɛbua bɛ mgbɔvodɛne la ɔvile ewule nu. 21 Ɛhye ati menli babɔ Nana Nyamenle duma ne anwo ɛlawule wɔ Zayɔn, na bɛaye ye ayɛlɛ wɔ Gyɛlusalɛm, 22 wɔ mekɛ mɔɔ maanle maanle nee bɛ arelemgbunli kɛyia nu, kɛ bɛsonle Nana Nyamenle la.

23 Awulae ɛmaa me anwosesebɛ ɛwie wɔ mekɛ mɔɔ metɛde kpavolɛ la; yede me ngoane mekɛ zo. 24 O Nana Nyamenle, mɛsɛlɛ wɔ, mmaye me ɛfi ɛkɛ ne wɔ melɛ ala mɔɔ ngoane wɔ ɛkɛ ne maa me la. O Awulae, wɔmɔ wɔ ngoane mekɛ ɛnlɛ ye awieleɛ. 25 Mɔmoane yɛɛ ɛdole azɛlɛ ye abo a, yɛɛ anwuma ninyɛne muala le ɛ sa anloa gyima. 26 Bɛ muala bɛbapɛ nu bɛaze, na wɔmɔ ɛwɔ ɛkɛ ne mekɛ mɔɔ ɔnlɛ awieleɛ. Bɛbatete kɛ ɛdanlɛ la, na wɔmɔ ɛbahakyihakyi bɛ kɛ adɛladeɛ la, na bɛapɛ nu bɛaze hwi kokye. 27 Na wɔmɔ kɛ ɛde ye ala la yɛɛ ɛde a, wɔ ngoane mekɛ ɛnlɛ ye awieleɛ.

28 Wɔ azonvolɛ amra badɛnla ɛkɛ ne dahuu wɔ anzondwolɛ nu wɔ wɔ ɛzinzalɛ bo; na bɛ bo zo amra abo ɛnrɛdu ɛlɛ.