1 O Awulae Nana Nyamenle, duzu ati a wɔvuandi yɛ wɔgua wɔvi ɛ nyunlu wɔ melɛ mɔɔ ɔnlɛ awieleɛ a? Duzu ati a wɔ ɛyavalɛ ɛyɛ kpole ɛtia wɔ mboane mɔɔ wɔ wɔ adidileka la a? 2 Kakye wɔ menli mɔɔ ɛvale bɛ ɛyɛle wɔ deɛ mekɛ dɛbadɛba bie mɔɔ ɛraze ɛhɔ, menli mɔɔ ɛlielɛ bɛ ngoane kɛ bɛrayɛ wɔ koliagya mralɛ la! Kakye Boka Zayɔn, ɛleka ne mɔɔ ɛdɛnlanle mekɛ bie la.

3 Tudu agyakɛ kɔ wɔ maanle ne mɔɔ ɛzɛkye la azo; kpɔvolɛma ɛzɛkye debie biala mɔɔ wɔ Asɔne Sua Kpole ne anu la! 4 Wɔ kpɔvolɛma ne mɔ teɛdea nu kpo wowo wowo wɔ ayialeka ne mɔ; bɛfa bɛ sɛkɛlɛneɛ avɛlɛnra bɛsiezie ɛkɛ ne kɛ asɛɛ bɛli konim la. 5 Bɛvale akuma bɛbubule nlenkɛ ne mɔ mɔɔ di kɔ anwuma nehane la; 6 na bɛvale hamenle mɔ nee nrɛlande bɛzɛkyele ngakyelɛ sɛkɛlɛndeɛ mɔɔ wɔ sua ne anu la amuala. 7 Bɛvale senle bɛdole wɔ Asɔne Sua Kpole ne anu bɛyelale ye dwɛɛ; na bɛguale wɔ nwuanzanwuanzaleka ne anwo evinli. 8 Akee bɛhanle ye wɔ bɛ ahonle nu kɛ: "Bɛmaa yɛzɛkye bɛ bɔkɔɔ!" Bɛyelale Nana Nyamenle ayiasua ne mɔ mɔɔ wɔ maanle ne anu la kpokpoti.

9 Yɛnnwu ye sɛkɛleneɛ biala; ngapezoma biala ɛnle ɛkɛ ne bieko; yɛɛ awie biala noko ɛnle yɛ nu mɔɔ ɔze mekɛ mɔɔ ɛhye mɔ kɛwie a. 10 O Nana Nyamenle, wɔ kpɔvolɛma ɛha wɔ ahyi ɛhɔkpula kenle nzu? Bɛbahɔ zo bɛabɔ wɔ duma ne aholoba, wɔ melɛ mɔɔ ɔnlɛ awieleɛ la ɔ? 11 Duzu ati a wɔgyakyi kɛ ɛkɛboa yɛ ɛ? Duzu ati a wɔva ɛ sa fema ne wɔgua ɛ nzi, kɛ asɛɛ ɛnnwu mɔɔ bɛlɛyɛ la ɛ?

12 Noko akee Nana Nyamenle mɔɔ le me Belemgbunli la, vi tete mekɛ zo ɛlɛyɛ ngoanelielɛ gyima ne wɔ ewiade amuala. 13 Wɔmɔ a ɛlua wɔ anwosesebɛ nu ɛkpakyele nyevile nu nwiɔ a; wɔmɔ yɛɛ ɛgelegelele awozonle ne mɔ ati wɔ nzule bo a. 14 Wɔmɔ a ɛgelegelele nyevizonle ti ɛhunle ye, na ɛmaanle ɔyɛle aleɛ ɔmaanle ɛbɔ nu nyɛmoa a. 15 Wɔmɔ yɛɛ ɛkpakyekpakyele azɛlɛ nu ɛmaanle nzule vi nu vindele a; wɔmɔ a ɛmaanle azule mɔɔ se la sesanle a. 16 Alehyenlɛ le wɔ deɛ, yɛɛ aledwolɛ noko le wɔ deɛ. Wɔmɔ a ɛvale sɛnzɛne ne nee ewia ne mɔ ɛhendɛhendanle anwomanyunlu a. 17 Wɔmɔ a ɛze azɛlɛ ti nee ɔ bo a; ɛdawɔ a ɛyɛle fɔsɛlɛ nee bokile a. 18 Kakye ɛhye, O Nana Nyamenle, kɛ wɔ kpɔvolɛma zile zile wɔ amgbu, na menli mɔɔ anwo ɛnde la gua wɔ duma ne anwo evinli la.

19 Mmakpo wɔ menli mɔɔ bɛnlɛ kamaavolɛ la ɛmaa bɛ kpɔvolɛma; mmamaa ɛ rɛle fi wɔ ehyiavolɛma bɛ ngoane wɔ melɛ mɔɔ ɔnlɛ awieleɛ. 20 Kakye wɔ ngyehyɛlɛ ne mɔɔ ɛ nee yɛ yɛle la; ɔluakɛ nzakatovoma ɛva aleɛabo awozileka ne mɔ kpokpoti ɛhakyi bɛ tɛnlabelɛ. 21 Mmamaa anyiemgba ka bɛdabɛ mɔɔ menli sisi bɛ la; emomu maa ehyiavolɛma, ɔ nee bɛdabɛ mɔɔ bɛnlɛ moalɛ biala la, ɛye wɔ duma ayɛlɛ dahuu. 22 Dwazo, O Nana Nyamenle, na ko die wɔ duma! Kakye kɛ menli mɔɔ ɛnle tenlene la si dahuu si wɔ amgbu la. 23 Mmamaa ɛ rɛle fi wɔ kpɔvolɛma ane, bɛdabɛ mɔɔ bɛdwazo bɛtia wɔ dahuu la bɛ alɛrayɛlɛ.