1 O Nana Nyamenle, tie me ne wɔ me ngyianlɛ nu; bɔ me ngoane nwo bane fi me kpɔvolɛma asa anu. 2 Ye me fi amumuyɛ akpame mɔɔ me kpɔvolɛma ɛlɛfa ye wɔ me nwo la anu, ɔ nee ngyehyɛleɛ mɔɔ ɛtanevolɛma ɛlɛyɛ la. 3 Bɛsi bɛ nloa kɛ adabɛlaka, na bɛka edwɛkɛ mɔɔ wowɔ kɛ ɛda mbaka la. 4 Bɛtoto ɛda mbaka bɛgua menli mɔɔ ɛnze nwolɛ bie la anwo; bɛtoto bɛ arɛlevilɛ nu ala mɔɔ bɛmbɔ bɛ kɔkɔ biala a. 5 Bɛgyi ye kpundii wɔ bɛ amumuyɛ akpamevalɛ ne anu; bɛdwenle adenle mɔɔ bɛdua zo a bɛkɛzuozua bɛ ngane ne mɔ la, na bɛka kɛ: "Nwane a kɛhola kɛnwu ye a? 6 Nwane a kɛhola kɛnwu ye ninyɛmunli ne mɔ abo zo a? Yɛzua nrɛlɛbɛ ɛhane." Ɔluakɛ sonla ye adwenle nu nee ye ahonle nu ngyehyɛleɛ le awozinli.

7 Nana Nyamenle bado ye ɛda mbaka ne mɔ agua bɛ nwo zo; bɛbabodɛboda wɔ mekɛ mɔɔ bɛ nye ɛnla la. 8 Bɛ nloa edwɛkɛ bava bɛ ahɔ ngyegyelɛ nu; na menli mɔɔ kɛnwu bɛ la bazi bɛ amgbu. 9 Akee menli muala bazulo; bɛbaha nwanwanendeɛ mɔɔ Nyamenle ɛyɛ la; na bɛadwenle nwolɛ wɔ bɛ ahonle nu. 10 Bɛmaa tenlenema anye ɛlie wɔ Nana Nyamenle anu, na bɛnriandi bɛhɔvea ye nu! Bɛmaa menli mɔɔ le fɔɔnwo la ɛnyia anyunlunyia!