1 Tie me nzɛlɛlɛ, O Nana Nyamenle; na yɛ ɛnzolɛ maa me modolɛ. 2 Tie me ɛzunlɛ, O me Nyamenle nee me Belemgbunli! Ɔluakɛ wɔmɔ ala yɛɛ mefa me nzɛlɛlɛ meto ɛ nyunlu a, O Nana Nyamenle. 3 Nwonlomɔ biala ɛte me ne, O Nana Nyamenle. Sɛnzɛne aduduleɛ biala mefa me nzɛlɛlɛ meto ɛ nyunlu, na meyɛ anwomoalɛ mekendɛ wɔ mualɛ.

4 Ɔboalekɛ wɔmɔ ɛnle Nyamenle mɔɔ ɛtaneyɛlɛ sɔ ɛ nye a; ɛmmaa amumuyɛ nyɛleɛ nwo adenle wɔ ɛ nyunlu. 5 Mgbavosɛmdivoma ɛngola ɛ nyunlu gyinla; ɔluakɛ wɔmɔ ɛkyi atisesebɛvoma kɔkɔkɔkɔ. 6 Ɛbɔ adalɛ nabalabama abo zo; ɛkyi mɛlɛbɛlavoma nee ahodiawu bɔkɔɔ.

7 Na mame ɔlua wɔ ɛhulolɛ totohyia ne ati, mebahola meawolo wɔ aako ne anu. Mebahola meazonle wɔ wɔ Asɔne Sua Nwuanzanwuanza ne anu, na meabɔ me ti aze meamaa wɔ wɔ anwunvɔnezelɛ nu ala.

8 Di me nyunlu maa menyɛ wɔ ɛhulolɛdeɛ, O Nana Nyamenle; ɔlua me kpɔvolɛma dɔɔnwo ne ati, kile wɔ nɔhalɛ adenle ne maa menwu ye wienyi. 9 Nɔhalɛ kpɔkɛ ko bɔbɔ, ɛnle me kpɔvolɛma edwɛkɛhanlɛ biala anu; amumuyɛ ngome ɛyi bɛ ahonle ne mɔ tetɛkɛɛ. Bɛ nzuzulɛ kpokpoti le ɛtaneyɛlɛ nee ewule ngome; mɔɔ bɛka ye menlemenle, amaa bɛanyia bɛ ninyɛndane ne bɛayɛ la ala a bɛka a. 10 Sɛkye bɛ, O Nana Nyamenle; na maa bɛdabɛ bɛ munzule akpame mɔɔ bɛva la ɛbɔ bɛ ti zo. Ɔlua bɛ ɛtane dodo ne ati, foa bɛ fi ɛ nyunlu bɔkɔɔ; ɔluakɛ bɛhakyi bɛ nzi bɛzi wɔ.

11 Emomu maa bɛdabɛ mɔɔ bɛfa bɛ rɛle bɛwula wɔ nu la anye ɛlie; maa dahuu bɛdo edwɛne bɛli fɛlɛko. Sinza bɛdabɛ mɔɔ bɛlɛ ɛ nwo ɛhulolɛ la; amaa ɔlua wɔ duma ti bɛanyia anyelielɛ dahuu. 12 Ɔluakɛ wɔmɔ ɛyila tenlenema, O Nana Nyamenle; na wɔ anwunvɔnezelɛ ne wowa bɛ kɛ konle nu sinzadeɛ la.