1 Bɛye Nana Nyamenle ayɛlɛ, bɛmɛ anwumabɔvolɛma; bɛwula ye anyunlunyia, na bɛhanvo ye tumi ne. 2 Bɛwula Nana Nyamenle anyunlunyia kɛmɔ ɔfɛta ye duma la; bɛzonle Awulae wɔ ye nwuanzanwuanzaleka ne.

3 Nana Nyamenle ane pɛ nu wɔ azumgbole zo. Anyunlunyia Nyamenle ne tendɛ; na ɔ ne dielie wɔ azumgbole ne mɔ azo. 4 Nana Nyamenle ane dwu ɛleka biala, wɔ ye tumililɛ nee ye belemgbunlililɛ nu. 5 Nana Nyamenle ane bubu ɛhoayelɛ nu mbaka; amgba Awulae ane bubu Lɛbanɔn ɛhoayelɛ nu mbaka gua. 6 Ɔkpusukpusu Lɛbanɔn nee Silɔn awoka kɛ nlankɛ mralɛ; ɔmaa bɛwuluwulu kɛ nlankɛ mralɛ mɔɔ bɛbɔ ɛlane la. 7 Nana Nyamenle dua ɛsɛlɛmanye zo a tendɛ a. 8 Nana Nyamenle ane kpusu ɛsɛlɛ; Awulae kpusu Keedɛhye ɛsɛlɛ ne. 9 Nana Nyamenle ane maa mboane ko ye, na ɔkpa ɛhoayelɛ bo; na wɔ ye Asɔne Sua Kpole ne anu, bɛwula ye anyunlunyia.

10 Nana Nyamenle di belemgbunli wɔ nzuyilɛ zo; amgba, Awulae di belemgbunli dahuu. 11 Nana Nyamenle wula ye menli anwosesebɛ; na ɔfa anzondwolɛ ɔyila ye menli.