1 Nana Nyamenle di belemgbunli; bɛmaa maanle maanle muala ɛzulo. Ɔde ye belemgbunli ebia ne azo, ɔde abɔndeɛ kpokpoti mɔɔ lɛ ndɛbalɛ la anwo zo; bɛmaa azɛlɛ ɛkpusu.

2 Nana Nyamenle le bedevinli wɔ Zayɔn; bɛkpogya ye zo wɔ maanle maanle muala anwo zo. 3 Awie biala ɛye ye kpoleyɛlɛ ne ɔ nee ye anyunlunyia duma ne ayɛlɛ! Ɔle Nwuanzanwuanza!

4 Belemgbunli katakyie, wɔmɔ mɔɔ ɛkulo pɛpɛlilɛ a; wɔmaa nɔhalɛlilɛ ɛzɔ ndinli; wɔbua nɔhalɛ ɔ nee tenlene ndɛne wɔ Yizilayɛ maanle nu. 5 Bɛkpogya Nana Nyamenle, yɛ Nyamenle ne zo; bɛbutu ɔ gyakɛ abo bɛzonle ye! Ɔle Nwuanzanwuanza!

6 Mosisi nee Aalɔn anrɛɛ boka ye azɛlɛvolɛ ne mɔ anwo, Samoɛle noko bokale bɛdabɛ mɔɔ ɛnee bɛbɔ ye duma la anwo. Bɛzunle bɛvɛlɛle Nana Nyamenle, na ɔdaye noko ɔdiele bɛ. 7 Ɔluale amungu totohyia ne anu ɔdendɛle ɔhilele bɛ; na bɛlile ye mɛla ne mɔ ɔ nee ye ngyehyɛlɛ ne mɔ mɔɔ ɔvale ɔmaanle bɛ la azo. 8 O Awulae, yɛ Nyamenle, wɔmɔ ɛyɛle ɛnzolɛ ɛmaanle wɔ menli. Bɔbɔ ɛdeanle bɛ wɔ bɛ ɛtane ne mɔ anwo ɛdeɛ, noko akee ɛhilele bɛ kɛ, ɛle Nyamenle mɔɔ ɛfa ɛtane ɛkyɛ a.

9 Bɛkpogya Nana Nyamenle, yɛ Nyamenle ne zo, na bɛzonle ye wɔ ye Boka Nwuanzanwuanza ne azo! Ɔluakɛ Awulae, yɛ Nyamenle ne le Nwuanzanwuanza.