1 Bɛ muala bɛdie! Aleɛabo amra amuala; bɛyɛ ɛnzolɛ. 2 Mgbanyinli nee ngakula, ehyiavolɛma nee sukoavolɛma, bɛ muala bɛbɔ nu. 3 Mebaha nrɛlɛbɛ edwɛkɛ; bɛbade me ahonle nu nzɛlɛlɛ ne abo.

4 Mebalua mrɛlɛbulɛ nu meadendɛ; na mealua getaebɔlɛ nee edwɛnedolɛ nu meahile ɔ bo. 5 Duzu ati a ɔwɔ kɛ mesulo wɔ anwubɛnyunlu mekɛ nu, wɔ mekɛ mɔɔ me kpɔvolɛma ɛbɔ me ɛyia la ɛ? 6 Menli mɔɔ fa bɛ rɛle wula bɛ anwonyia nu, na bɛfa bɛ agyapandeɛ molozo bɛtu bɛ nwo a? 7 Nɔhalɛ nu, awie biala ɛnle ɛkɛ mɔɔ ɔdaye ɔkɛhola ɔkɛpepɛ ɔkɛlie ɔ nwo, anzɛɛ ɔkɛhola ɔkɛdɔ ye ngoane ɔkɛvi Awulae asa anu a. 8 Ɔluakɛ ye ngoane bolɛ le kpole, na ɔnrɛhola ye tua; 9 amaa yɛahola yɛadɛnla aze wɔ mekɛ mɔɔ ɔnlɛ awieleɛ, mɔɔ ɔnrɛnwu Funli Kuma nu a.

10 Ɛhɛe! Ɔbanwu kɛ nrɛlɛbɛvolɛma wu, yɛɛ ahoasea nee ɛzɛlɛma bɛdabɛ bɛwu; na bɛgyakyi bɛ agyapandeɛ bɛamaa awie mɔ. 11 Bɛ azɛka ne mɔ a le bɛ tɛnlabelɛ mɔɔ ɔnlɛ awieleɛ a, bɛ damɛnlangoate tɛnlabelɛ mekɛ ɛne, saa bɛde aze la bɛlɛ azua ngakyile bɔbɔ a. 12 Sonla ɛnrɛdɛnla ye anwonyia nu dahuu; ɔle kɛ ayɛmoa mɔɔ ɔdaye noko ɔwu la. 13 Ɛhye a le ahoasea diedi, menli mɔɔ anye die bɛdabɛ bɛ nwo la bɛ awieleɛ a.

14 Bɛziezie bɛ bɛmaa amaneɛ mɔɔ ɔnlɛ awieleɛ; ewule bava bɛ ahɔ; ndɛndɛ ne ala, bɛbadwu ewule kuma ne anu; na bɛ sonlabaka ne bakpɔlɔ ndɛndɛ; na amaneɛnwunlɛ ɛleka ne bayɛ bɛ sua nu.

15 Noko akee Nana Nyamenle balie me ɛkɛla ne avi amaneɛnwunlɛ tumi sa nu; ɔluakɛ yemɔ ɔbalie me. 16 Saa awie nyia ɔ nwo a, mmamaa ɛ nye bolo ye; saa ye agyapadeɛ so maa ye anyunlunyia yɛ molozo bɔbɔ a zɔhane ala. 17 Ɔluakɛ saa ɔwu a ɔnrɛhola ɔnrɛva nuhua kotokokye bɔbɔ ɔnrɛhɔ ɛbolɔ; ye anyunlunyia ne bɔbɔ nee ye ɛnrɛhɔ. 18 Bɔbɔ wɔ mekɛ mɔɔ ɔde aze la, ɔfa ɔtu ɔ nwo kɛ, ɔle ahomeka; yɛɛ saa bɔbɔ ɔyɛ ahunlunyele a bɛye ye ayɛlɛ a, 19 ɔbadoa ɔ nlenyia mɔ mɔɔ ɛwu ɛhɔ, na bɛnrɛnwu alehyenlɛ bieko la.

20 Sonla ɛndɛnla ye anwonyia nu dahuu; ɔle kɛ ayɛmoa mɔɔ ɔdaye ɔ bo zo minli la.