Salmos 61

Wɔ Nana Nyamenle Feabelɛ ne abo

1 Tie me ɛzunlɛ, O Nana Nyamenle; yɛ ɛnzolɛ tie me nzɛlɛlɛ. 2 Mevi moamoa nehane yɛɛ mefɛlɛ wɔ a. Melɛ mɔɔ me nwo kɛgolo me la, fa me kɔ bolɛ totohyia ne mɔɔ tɛla me la ati zo, ɛleka ne mɔɔ le me nriandifeabelɛ la. 3 Wɔmɔ a ɛle me nriandifeabelɛ a; ɛle me esianwu mɔɔ ɛwowa me ɛfi me kpɔvolɛma asa anu a. 4 Maa mendɛnla wɔ aako nu wɔ melɛ mɔɔ ɔnlɛ awieleɛ. Maa menyia anzondwolɛ wɔ ɛ ndɛba abo! 5 Ɔluakɛ wɔmɔ Nana Nyamenle wɔdie me ɛwɔkɛ ne mɔ; na wɔva agyapadeɛ mɔɔ le bɛdabɛ mɔɔ bɛsulo wɔ la ɛdeɛ la wɔmaa me.

6 Maa belemgbunli ne ngoane tendenle; maa ɔ nyi ɔhyɛ! 7 O Nana Nyamenle, maa ɔli belemgbunli dahuu wɔ ɛ nyunlu; fa wɔ ɛhulolɛ nwanwane ne nee wɔ nɔhalɛlilɛ ne bɔ ɔ nwo bane; 8 amaa dahuu meado ayɛlɛyelɛ edwɛne meahanvo wɔ duma, wɔ mekɛ mɔɔ alehyenlɛ biala melɛdi me ɛwɔkɛbɔlɛ ne azo la.