22 पर पवित्र आत्मा रा फल प्यार, खुशी, शान्ति, सब्र, कृपा, पलाई, विश्वासो जोगा, 23 नम्रता और संयम ए। एड़े-एड़े कामो रे बिरोदो रे कोई बिधान निए।

11 कऊँकि परमेशरो री कृपा प्रकट ऊई री, जो सबी माणूंआ रा उद्धार करी सकोई। 12 एसा कृपा रे जरिए परमेशर आसा खे चेतावणी देओआ कि आसे अभक्ति और दुनिया री बुरी इच्छा ते मन फेरी की एस जुगो रे आपू पाँदे काबू राखी की, तर्म और भक्तिया साथे जिन्दगी बिताऊँ। 13 यीशु मसीह वापस आऊणे वाल़ा ए और आसे तेस नौखे दिनो रा इन्तजार करने लगी रे और एई आसा री उम्मीद बी ए इजी खे आसे तिजी रे मुताबिक बर्ताव करिए। सेई आसा रा महान् परमेशर और उद्धारकर्ता ए जो आपणी महिमा साथे एसा तरतिया पाँदे आऊणे वाल़ा ए।

7 परमेशर आसा खे डरपोक नि बणांदा। बल्कि तेसरा आत्मा आसा खे मजबूत बणाओआ, से आसा खे ओरी साथे प्यार करने और सब्र राखणे रे मताद करोआ।

5 कऊँकि तुसे ईश्वरीय सबाओ रे शामिल ओ इजी खे सिर्फ तुसे मसीह रे विश्वास करने वाल़े ई नि बणो पर अच्छे चाल-चलणो ते बी जिओ। तुसे सिर्फ अच्छे चाल-चलणो तेई नि जिओ पर ये बी जाणो कि आसे किंयाँ समजा साथे बर्ताव करिए। 6 तुसे सिर्फ समजा ते बर्ताव करने वाल़े ई नि बणो पर आपू पाँदे काबू राखणे वाल़े बी बणो। तुसे सिर्फ आपू पाँदे काबू राखणे वाल़े ई नि बणो पर दुःखो रे सब्र राखणे वाल़े बी बणो। तुसे सिर्फ दुःखो रे सब्र राखणे वाल़े ई नि बणो पर ईश्वरीय जिन्दगी जिऊणे वाल़े बी बणो। 7 सिर्फ ईश्वरीय जिन्दगी जिऊणे वाल़े ई नि बणो पर एकी दूजे री चिन्ता करने वाल़े बी बणो जिंयाँ पाई-बईण एकी दूजे री चिन्ता करोए। सिर्फ एकी दूजे री चिन्ता करने वाल़े ई नि बणो पर सबी लोका ते प्यार बी राखो।

32 देरा ते गुस्सा करना वीरता ए,

ओर आपणे मनो खे वशो रे राखणा शईरो खे जीतणे ते खरा ए।

28 जेस माणूंए री आत्मा आपणे वशो रे नि ए से एड़े शईरो जेड़ा ए जेतेरी दवाल अमला करी की तोड़ी ती री ओ।

11 मूर्ख माणूं गुस्से दे सारे मनो री गल्ल खोली देओआ,

पर अक्लमंद माणूं आपणे मनो खे रोकोआ ओर शान्त रओआ।

19 बऊत गल्ला ऊणे रिया बजा ते पाप बी ओआ,

पर जो आपणे मुंए खे बंद राखोआ, से अक्ला वाल़ा माणूं गिणेया जाओआ।

24 क्या तुसे नि जाणदे कि दौड़ा रे तो सब दौड़ोए, पर ईनाम एक ई लयी जाओआ? तुसे तेड़े ई दौड़ो, ताकि जीती जाओ। 25 हर एक पईलवाण सबी किजी रा संयम करोआ, सेयो तो एक मुरजाणे वाल़े मुकुटो खे पाणे री खातर इतणा सब करोए, पर आसे तो तेस मुकुटो खे करूँए, जो मुरजाणा नि। 26 इजी री खातर आऊँ तेस माणूंए जेड़ा दौड़ुंआ, जेसरे सामणे एक लक्ष्य ए, आऊँ अवा रे मुक्के नि बाँदा। 27 आऊँ आपणे शरीरो खे बाऊँआ और कुटुँआं और वशो रे ल्याऊँआ, एड़ा नि ओ कि ओरी खे प्रचार करी की आऊँ आपू ई केसी रीतिया ते नकम्मा ठईरूँ।

9 पर जे सेयो संयम नि करी सको, तो ब्या करी लो, कऊँकि ब्या करना कामातुर रणे ते ठीक पला ए।

13 तुसे केसी एड़ी परीक्षा रे नि पड़े, जो माणूंआ रे सईणे ते बारे ओ। पर परमेशर विश्वासो जोगा ए और तेस तुसे सामर्था ते बारे परीक्षा रे नि पड़ने देणे, बल्कि परीक्षा साथे-साथे तिजी ते बचणे री बाट बी परमेशरो तुसा खे देणी, ताकि तुसे सईन करी सको।

8 ओशा रे रओ और जागदे रओ, कऊँकि तुसा रा बिरोदी शैतान, गर्जणे वाल़े शेरो जेड़ा, इजी ताका रे रओआ कि केसखे फाड़ी की खाऊँ। 9 विश्वासो रे मजबूत ऊई की तुसे जरूर तेसरा बरोद करो। याद राखो कि तुसा रे विश्वासी पाई जो एते दुनिया रे जेती-केथी बी रओए, ईंयां ई सेयो बी दु:ख पुगतणे लगी रे।

7 सबी गल्ला रा अंत चट ऊणे वाल़ा ए। इजी री खातर ओशा रे रओ और सब्र राखो और प्रार्थना करदे रओ।

1 इजी री खातर जेबे मसीहे आपणे शरीरो रे ऊई की दु:ख उठाया, तो तुसे बी सेई इच्छा राखी की दुःख सईन करने खे त्यार रओ। कऊँकि जे तुसे मसीह खे दुःख सईन करने खे त्यार ओ, तो तुसे पाप करना छाडीता। 2 ताकि आऊणे वाल़े बखतो रे आपणा बाकि शारीरिक जीवन, माणूंआ री बुरी इच्छा रे मुताबिक नि, बल्कि परमेशरो री इच्छा रे मुताबिक बिताओ। 3 तुसे पईले ई आपणा बऊत बखत दूजिया जातिया जेड़ा बुरी इच्छा रे मुताबिक काम करने रे बर्बाद करी ता। सेयो बुरे काम ये ए लुचपणो री बुरी इच्छा, मतवाल़ापण, लीलाक्रीड़ा, शराबी और घृणित मूर्तिपूजा, सेई बऊत ऊआ। 4 इजी री खातर सेयो हैरान ओए कि तुसे एड़े पारी लुचपणो रे तिना रा साथ नि देंदे। तेबेई एबे सेयो लोक तुसा खे बुरा-पला बोलोए। 5 पर तिना लोका खे जिऊँदे और मरे रेया रा न्याय करने वाल़े परमेशरो खे आपणे चाल-चलणो रा लेखा देणा पड़ना।

4 तुसा बीचा ते हर एक माणूं सईन शीलता साथे आपणे शरीरो खे वशो रे करना सीखो और आपणी लाड़िया साथे पवित्रता और आदरो साथे जिओ। 5 ये काम आपणी इच्छा ते नि और ना ई तिना दूजिया जातिया जेड़े करो जो परमेशरो खे नि जाणदी।

22 ओ प्रभुए री सारी सृष्टि,

तेसरे राज्य री सारिया जगा रे प्रभुए खे तन्य बोलो।

ओ मेरे मन, तूँ प्रभुए खे तन्य बोल!

13 तेरा राज्य जुगो-जुगो रा

ओर तेरा राज पीढ़िया ते पीढ़िया तक बणेया रा रणा।

13 मैं राती सुफने दे देखेया, कि माणूंए जेड़ा कुछ ए। से सर्गो रे बादल़ा ते किरेया दा मेरे नेड़े आऊणे लगी रा, ओर से तेस माणूंए गे गया जो सदा जिऊँदा था ओर से तेसरे सामणे ल्याया* 14 तेबे तेसखे एड़ा अक्क, महिमा ओर राज दित्तेया कि देश-देश, जाति-जाति ओर लग-लग पाषा बोलणे वाल़े सारे तेसरे वशो दे ओ; तेसरा राज सदा खे अटल़ ओर कदी बी नाश ना ऊणे वाल़ा ठईरेया।*

2 परमपरदान परमेशरे माखे जो-जो नशाण ओर चमत्कार दखाए, माखे ये अच्छा लगेया कि तिना रा मतलब तुसा खे बताऊँ।* 3 परमेशरे बड़े-बड़े चमत्कार दखाए ओर तेसरे चमत्कारा दे बड़ी शक्ति ओई! परमेशरो रा राज तो सदा रा ओर तेसरा राज पीढ़िया ते पीढ़ी तक बणेया रा रओआ।

6 कऊँकि आसा रिया तँईं एक बाल़क पैदा ऊआ, यहोवे आसा खे एक पाऊ दित्तेया ओर राज्य रा बोज तेसरी कांदा पाँदे ऊणा ओर तेसरा नाओं "अद्भुत काम करने वाल़ा पराक्रमी परमेशर, अनन्तकालो रा बाओ ओर शान्तिया रा राजकुमार राखेया जाणा।" 7 तेसरा राज्य सदा बढ़दा रणा ओर तेसरी शान्तिया रा अन्त नि ऊणा, इजी री खातर तेस से दाऊदो री राजगद्दिया पाँदे, एस बखतो ते लई की सदा खे न्याय ओर तर्मो रे जरीये पक्का करी की सम्बाल़ी की राखणा। सेना रे यहोवे री धुना रे जरीये ये ऊई जाणा।*

13 कऊँकि परमेशरे ई आसे शैतानो रे वशो ते छुड़ाई कि आपणे प्यारे पुत्रो रे राज्य रे प्रवेश करवाया। 14 आसा खे तिदे ई छुटकारा मतलब पापो री माफी मिलोई।

20 जिने मसीह मरे रेया बीचा ते जिऊँदा कित्तेया और स्वर्गो री जगा रे आपणे दाँणे कनारे बठयाल़ेया। 21 तेती मसीह सारी प्रदानता, अक्क, राज और सामर्था पाँदे राज करोआ। से दुनिया रे सबी प्राणिया पाँदे राज करोआ और आऊणे वाल़ी दुनिया रे बी राज करना।

20 पर म्हारा आपणा देश स्वर्गो रे ए और आसे एक उद्धारकर्ता प्रभु यीशु मसीह रे तेथा ते वापस आऊणे री बाट देखणे लगी रे। 21 से आपणी शक्तिया रे तेस असरो रे मुताबिक जेतेरे जरिए से सारिया चीजा खे आपणे वशो रे करी सकोआ। से म्हारे दीन-हीन शरीरो रा रूप बदली की, आपणी महिमा रे शरीरो रे मुताबिक बणाई देणा।

9 आसे ये जाणूंए कि मसीह मरे रेया बीचा ते जिऊँदा ऊई की फेर मरना नि। तेस पाँदे फेर मौत नि आऊणी।

8 और जो लोक पापमय शारीरिक दशा रे, सेयो परमेशरो खे खुश नि करी सकदे।

9 पर जबकि पवित्र आत्मा तुसा रे बसोआ, तो तुसे पापी शरीरो रे सबाओ री दशा रे निए, बल्कि आत्मिक दशा रे। जे केसी रे पवित्र आत्मा निए, तो से तेसरा जन निया।

22 जिंयाँ आदमो रे सारे मरोए, तिंयाँ ई मसीह रे सारे जिऊँदे करे जाणे। 23 पर हर एकी आपणी-आपणी बारिया ते मरे रेया बीचा ते जिऊँदे ऊणे रा इन्तजार करना। तिना बीचा ते पईला फल मसीह ए। इजी ते बाद सेयो सारे जो मसीह रे आऊणे तक तिना रे बणे रणे। 24 इजी ते बाद अंत ऊणा, तेस बखते तेस सारी प्रदानगिरी, सारा अक्क और सामर्था रा अंत करी की राज्य परमेशर पिते रे आथो रे देई देणा। 25 कऊँकि जदुओ तक परमेशर तेसरे दुश्मणा खे तेसरे वशो रे नि करी देओगा, तदुओ तक तेसरा राज्य करना जरूरी ए।

2 "परमेशर ई राज करोआ, ओर संसारो दे आपणियां तँईं पग्ति पैदा करोआ।

से आपणे सबी ते ऊच्चे स्वर्गो दे शान्ति राखोआ।