Esperar no Senhor

3 Ndə məbìʼ chɔ, tʉʉtə-ʉʼʉ nɔ tʉʼ bʉ̀ʉ mu ŋgʉəʼ-yʉʼʉ ndə bʉʼʉ tʉʼ nyíɛ bʉʼka bʉʼʉ nɔ kínə mbɔ ŋ̃gʉəʼ nɔ chìi wo lyʉ̀ʉtə́nə. 4 Məlyʉ̀ʉtə́nə kə́ chìi nuʼ-yʉʼʉ tə́nə shʉ́əshʉ́ə, nuʼ-yʉʼʉ kə́ chìi bʉʼʉ ndə məyʉ́əʼnə ndəŋ ŋkwaaNyii.

11 Baʼa nɔ tʉʼ gháaNyii ghɔ mbɔ ɔ chìi bii shʉ́ə, nə ghʉəʼkə nchəŋnchəŋ ndə i gwè hə ndəŋ fɔŋ kəghʉəʼ-məgʉə-e mbɔ bii chʉʼ lyʉ̀ʉtə́nə ndə ntɛhə inchəŋ, kə́ yá fyii nə tʉʉjyu,

B̈ii yá fyiihə-ii mu ŋgʉəʼ

7 Bəliŋ-bɔŋ, b̈ii ghʉ́əhə fyiihə-ii tə chîkə dàa ndə Tiekətʉ bu yi gwè. B̈ii kwɔ̀ʼtə ndə wo-mutɔ chyìi mbɔ mutɔ-ɛ kʉ́ʉnə ntɔŋ-jyujyu-mə, ɔ yá fyii-i kə chyìi fəŋ wyuu ghɔŋbə ndyiʼtə-wyuu-kə ndə məfyíi. 8 Mbəŋ-yii ghɔ, nɔ kie ndə məyá fyiihə-ii, tə́nə shʉ́əshʉ́ə, bʉʼka məgwè Tiekətʉ nɔʼ kə́ŋhə.

11 B̈ii kə́ kínə mbɔ bʉʼʉ nɔ kínə mbɔ bʉə ndə bɔ̂ŋ lyʉ̀ʉtə́nə nɔ bɛ bʉə-kətʉjyu. Bii nɔʼ kə yʉ́ ndə Jub kə lyʉ̀ʉtə́nə, bɔŋleʼ nyíɛ nukə ndə Tiekətʉ kə fɔ̀ʼ tʉ ɔŋ, ntɛ ndə Nyii kə kie tʉvyiikə ndəŋ ɔŋ bɔŋleʼ dʉ̀ʼ tʉvyii-yɔ́ŋyɔ́ŋ-kə tʉ ɔŋ.

22 Nduɔ ndə bii nɔʼ búu ŋwɔŋ-yii ndə i gwè hə ndəŋ məyʉ́ ŋgie-shʉəŋ-kə, kə́ tə́nə chɔ, ndə ĩ gwè nə ŋkɛŋ ŋkʉ̂ʉ tʉ bəbɛʼbʉə ndə bɔ̂ŋ nɔʼ bɛ́ŋ Nyii nɔ, b̈ii kʉ̀ʉ ŋwɔŋtə-ii nduɔ jyujyu nə fyiihə-ii inchəŋ.

23 Bʉʼka bə nɔʼ bʉ̀nə bìʼ bí bii təmə bɛ ndəŋ ŋgwie ndə ĩ kwú fɛ, bɔŋ bɛ ndəŋ ŋgwie ndə i mə nə kwú fɛ, tíŋ hə bɔ̌ŋ ŋgieNyiikə ndə i kie məchímbi təmə liʼ-i ghɔ fɛ.

24 Bʉʼka ŋwɔʼnə-Nyii nɔ gìe mbɔ,

"Mbɔʼ-mbʉə-hə nchəŋnchəŋ-ɛŋ nɔ bɛ nə ŋkɔ,

məgʉə-yʉə inchəŋ kə́ bɛ nə yii-ŋkɔ-bə.

M̃bʉ ŋkɔ nɔ yúɔnə,

yii-ŋkɔ-bə kə́ chóʼtə gwùtə sê,

25 bɔŋ ŋgie-Tiekətʉ-kə bu káa gɛ̀gɛ̀ təmə liʼ-i nə bɛ ghɔ fɛ." *

Ŋgiekə-ɔ̄ŋ nɔ bɛ mbʉ ntəŋjyujyu ndə bə kə lɔ̀ʼ tʉ bii.

9 Tiekətʉ chʉʼ tùu ndə məfɔ̀ʼ nukə ndə ɔ nɔʼ kə kɔ̀ʼnə, ndə bəbɛʼbʉə tʉʼ kwɔ̀ʼtə fɛ. Bɔŋ nɔ, ɔ nɔ tʉʼ yá fyii-i bə bʉʼka bii, bʉʼka ɔ kʉ̀ʉ mbɔ mbyu wo kwú bɛ́ fɛ, bɔŋ ɔ nɔ kʉ̀ʉ mbɔ b̈ʉə bənchəŋ shìe liɛŋ ndəŋ bʉ̂ʼtə-ʉə.

Chəŋkə te vâabəke wuŋ ndə bɔ̂ŋ gòʼ təmə kínə bələŋ fɛ

1 "Bəkɔ bə fʉ̀ʼ Sɔ́ʼ Fɔŋ Yuo ndə vâabəke wuŋ ndə bɔ̂ŋ gòʼ təmə nɔʼ nə kínə bələŋ fɛ ndə bɔ̂ŋ lʉ̀ bəlaŋ-bʉə gɛ̀ ndə məbìatə wo ndə ɔ tʉʼ chìi lɔŋ. 2 Bətaa hə mu bɔŋ nɔ kə bɛ bʉə kətʉ chíenə, bəbɛʼbə bətaa kə́ bɛ bʉə ndə bɔ̂ŋ kie mukətʉ súunə. 3 Mbʉ bətaa ndə bɔ̂ŋ kə bɛ bənɔ̌ʼɔ le, lʉ̀ bəlaŋ-bʉə təmə lʉ̀ kalashi * fɛ. 4 Bɔŋ bīŋbə ndə bɔ̂ŋ kie mukətʉ súunə le, bɔ̂ŋ lʉ̀ bəbutʉtə ilə́ŋnə nə kalashi ghɔŋbə bəlaŋ-bʉə. 5 Mbʉ wo chìi lɔŋ tùu ndə məgwè, bɔ̂ŋ chʉ́ʉhə ndə məjyùu kə́ bɔŋleʼ bɛ́ŋ mbɛŋhə. 6 Kʉ̂ʉ bɛ ndʉʉkwɔnəmbi, bə chʉ́ʉhə ndə mətíitə, kə́ ghɔ̀ŋ mbɔ, ‘B̈ii nyíɛ! Mbʉ wo chìi lɔŋ nɔ! B̈ii fyú bìatə ɔŋ.’

7 "Mbʉ vâabəke-ghɔ̄bə lɔ̀ hə sê bənchəŋ kóʼhə bəlaŋ-bʉə. 8 Vâabəke ndə bɔ̂ŋ kə bɛ bənɔ̌ʼɔ ghɔ̀ŋ tʉ bī-ndaa-bə mbɔ, ‘B̈ii kɔ́ baʼa nə vaadyʉʼʉ kalashi-yii bʉʼka bəlaŋ-baʼa tʉʼ shíʼ.’ 9 Bɔŋ mbʉ vâabəke ndaa bə̀ŋhə mbɔ, ‘I mə kʉ̀ʼnə tʉ baʼa leʼnə mbəŋ-yii fɛ, b̈ii gɛ̀ tʉ bʉə vyii gɛ̀ nyúɔ yii-yə.’

10 "Ndə bɔ̂ŋ kə́ gɛ̀ ndə məgɛ̀ nyúɔ, mbʉ wo ndə ɔ tʉʼ chìi lɔŋ gwè, sʉ́ʉ mu njaa ghɔŋbə vâabəke ndə bɔ̂ŋ nɔʼ kə shʉ̀tə ŋwɔŋtə-ʉə ndə məyú lɔŋ, bə fʉ̀əŋ chusii. 11 Kʉʉkə məniʼ, bəbɛʼvâabəke-bīŋ gwè ghɔ kə́ ghɔ̀ŋ mbɔ, ‘Tiekətʉ! Tiekətʉ! Chóʼ chusii tʉ baʼa.’ 12 Bɔŋ ɔ bə̀ŋhə tʉ bɔŋ mbɔ, ‘Nɔʼ m̈ɔ shyíi bii nə shʉəŋ mbɔ mɔ kínə bii fɛ.’

13 "Nɔ, b̈ii láa lɛ, bʉʼka bii kínə chî-ghɔ̄-kə fɛ, təmə bɔŋ kínə mbʉ ŋgwɔʼmbi fɛ.