2 Timɔti 4

1 Mɔ nɔ tʉʼ kɛŋ kàhə a bəshʉ-Nyii ghɔŋ Klai Jiso, ndə ɔ bu kwɛ̀ sɔ́ʼ bʉə ndə bɔ̂ŋ bíe ŋɛnə ghɔŋbə bʉə ndə bɔ̂ŋ nɔʼ kwútə bɔŋ bʉʼka Jiso tʉʼ leʼ bʉ̀nə gwè, bu sɔ́ʼ nə Fɔŋ, 2 ndə məlɔ̀ʼ mbʉ kəŋgieNyii, kɛŋ lyʉ̀ʉtə́nə ndə məlɔ̀ʼ, ndʉʉ ndə yəŋbə bʉ̀ʉ ghɔŋbə ndʉʉ ndə i bɛ bʉəbʉə, chìi b̈ʉə nyíɛ bʉ̂ʼtə-ʉə, sɔ́ʼ bʉə nə yɔŋ, kwèʼhə bʉə nə yɔŋ, nə ntɛ-məyá-fyii-hə inchəŋ leʼnə mədàhə.

3 Ndʉʉ tʉʼ gwè ndə bʉə kʉʉ kə́ kʉ̀ʉ ndə məyʉ́ ŋgie-shʉəŋ-kə ndə bə tʉʼ dàhə fɛ, bɔŋ bu kə́ kʉ́ʉ bə yʉə-yə nubə ndə i kʉ̀ʼnə tʉ bɔŋ. Bɔ̂ŋ bu chə̀ŋtə bʉə yɔ́ŋyɔ́ŋ ndə mə-kə́-dàhə bɔŋ nə nubə ndə tyunəbə-ʉə tʉʼ yʉ̀ʼ ndə məyʉ́. 4 Bɔ̂ŋ bu shìe liɛŋtə-ʉə ndəŋ məyʉ́ ŋgie-shʉəŋ-kə kə́ kɔ́ tyunəbə-ʉə ndə məyʉ́ chəŋ-mbi-nduɔŋ-bə. 5 Bɔŋ ndə mbəŋ-aŋ, a nɔ kie ndə məyá ŋwɔŋ-aŋ ndə nubə inchəŋ, lyʉ̀ʉtə́nə ndə mənyíɛ ŋgʉəʼ, fɔ̀ʼ ntɛ fɔʼɔ ndə wo ndə ɔ tʉʼ lɔ̀ʼ ntəŋjyujyu kie ndə məfɔ̀ʼ, fɔ̀ʼ fɔʼɔ-a nchəŋnchəŋ-ɛŋ ndə vaafɔ̀ʼ-Nyii.

6 Bʉʼka ndə mbəŋ-ɔŋ, bə nɔ tʉʼ véʼ mɔ ndə bə véʼ ndʉʼ-fɛ̀ʼndɛŋ-mə tʉ Nyii le, ndʉʉ-ɔ ndə məlɔ̀ hə kəwʉʉnəmbi-fɛ̄ŋ nɔʼ kʉ̀ʼnə. 7 Mɔ nɔʼ gwúu yʉʼ byuʼu bɔŋ-nɔʼ-leʼ lìʼ ndʉʉ-ɔ, mɔ nɔʼ mɔ̀ʼfyii-ɔ ndəŋ mbʉ ntəŋjyujyu tə gɛ̀ lìʼ. 8 Bɔŋ nduɔ, ŋgʉʼʉ mətə́nə ndyʉndyʉ nɔ tʉʼ chyìi mɔ ndə Tiekətʉ ndə ɔ bɛ wo ndə ɔ kwɛ̀ nubə ndyʉndyʉ bu kɛ̀ŋ mɔ nə yɔŋ Yɔ̂ŋ-ghɔ̄, kaa haʼ tʉ mɔ tətɛʼ mɔ fɛ, i nɔ bɛ ghɔ tʉ bʉə bənchəŋ ndə bɔ̂ŋ kə kʉ́ʉ mbɔ ɔ bʉ̀nə kɛʼɛ ŋwɔŋ-ɛŋ.

Ndyiʼtə-kwə́ʼ-Bɔɔ-kə

9 Kɔ̀ɔtə ndə mə-chʉʼ-gwègwè nyíɛ mɔ. 10 Bʉʼka Dɛma nɔʼ ké mɔ gɛ̀ nə wi Tɛsalonika bʉʼka ɔ kʉ̀ʉ fɔ-kəwʉʉnəmbi-bə. Klisɛŋ gɛ̀ Galatia, Tatu gɛ̀ Damatia. 11 Nɔ bɛ haʼ baʼa Luk fɛ̄ŋ. Lʉ̀ Mak bii ɔ gwè, bʉʼka ɔ bu kwáa mɔ ndə fɔʼɔ-Nyii. 12 Mɔ nɔʼ tə́ŋ Taikiku Ɛfɛso. 13 Ndʉʉ ndə a tʉʼ gwè, ä gwè nə ndyi fəʼə ndə mɔ kə mɛ̀ʼtə Kabu mu Tɔlɔs le, leʼnə bəŋwɔʼnə, fɔŋ ɛŋ kə́ bɛ bəgwo nyaa ndə mə-kə́-nyɔ̀ʼ fɔbə chɔ.

14 Alɛsaŋnda wo ndə ɔ fɔ̀ʼ nə təŋbə nɔ chìi nu-ŋkwɔŋ-kə nə mɔ. Tiekətʉ bu lɔ̀ʼ ɔ haʼ nə ntɛ fɔʼɔ ndə ɔ nɔʼ fɔ̀ʼ tʉ mɔ. 15 Láa ɔ nə mbəŋ-aŋ, bʉʼka ɔ nɔ kə byùutə ntəŋ-yaʼ shʉ́əshʉ́ə ndə baʼa kə́ lɔ̀ʼ. 16 Wo kə tə́nə bɔ̌ŋ mɔ fəŋ vɛʼ ndə mɔ kə́ túu chu-ɔ fɛ, bɔŋ bɔ̂ŋ nyʉ́ʉ bɔ̌ŋ bənchəŋ. Nyii mə yá bɔŋ bʉʼka yɔ̄ŋ-yə fɛ. 17 Tiekətʉ bɔŋ káa baʼa ɔ mɔʼɔ, kɔ́ ghʉəʼkə tʉ mɔ mbɔ mɔ chʉʼ lɔ̀ʼ mbʉ ntəŋ nchəŋnchəŋ-ɛŋ tʉ bʉə bənchəŋ ndə gòʼ təmə bɛ bʉə-Juu fɛ mbɔ b̈ɔ̂ŋ yʉ́, bə bɔŋleʼ fyúhə mɔ chu bʉʼ. 18 Tiekətʉ bɔŋ bu fyúhə mɔ ndə nu-bʉəbʉə-bə inchəŋ lʉ̀ mɔ buɔbuɔ gɛ̀ nə mɔ yuo kəyəŋ ndə ɔ tʉʼ sɔ́ʼ. M̈əgʉ́ə bɛ yi-yə təmə liʼ-i ghɔ fɛ. Ï bɛ haʼ nɔ.

Ndyiʼtə-nchaʼtə-Bɔɔ-kə

19 Gìe tʉ Bilisika ghɔŋ Akwela, leʼnə nchinjaa Onisifɔlu. 20 Ɛlastu nɔ káa Kɔlɛŋ, mɔ bɔŋ mɛ̀ʼtə Tolofimu ndə ɔ tʉʼ yɔ́ʼyɔ́ʼ Mɛlitu. 21 Kɔ̀ɔtə ndə məgwè shyʉʉ-fəʼə buŋ dàa. Yubulu nɔ tə́ŋ nchaʼtə tʉ a, Budɛŋ ghɔŋbə Lanɔ leʼnə Kladia ghɔŋbə bʉə bənchəŋ ndə bɔ̂ŋ nɔʼ bɛ́ŋ Nyii nɔ tə́ŋ nchaʼtə-yʉə. 22 T̈iekətʉ bɛ bii ɔ mu fyii-a. N̈yii dʉ̀ʼ buuŋjyu-i tʉ bii.