2 Timɔti 2

Yʉʼ wo bəsɔge Klai Jiso

1 Mbəŋ-aŋ, vaa-ɔŋ, kie ghʉəʼkə tíŋ hə bɔ̌ŋ buuŋjyu-Nyii ndə bɛ yʉʼʉ-yə ndʉʉ ndə bʉʼʉ tùo bʉʼʉbə Klai Jiso. 2 Lʉ̀ nubə ndə a yʉ́ mɔ dàhə tʉ bʉə ndə bəkɔ bɔ̂ŋ nú gwù mbɔ i kʉ̀ʼnə leʼ gɛ̀ dàhə tʉ bʉə-kəŋgie-shʉəŋ ndə bəkɔ bɔŋleʼ dàhə ghɔ tʉ bəbɛʼbʉə.

3 Ndə yʉʼ wo bəsɔge Klai Jiso, lʉ̀ ya-yə yʉʉ mu mənyíɛ ŋgʉəʼ bii ɔ. 4 Wo bəsɔge kaa ghɔ ndə ɔ̃ kɔ́ ŋwɔŋ-ɛŋ ndə nu-kəwʉʉnəmbi-bə fɛ, bʉʼka ɔ tʉʼ kʉ́ʉ ndə məchìi tʉʉ tiefɔʼ-ɛ bʉ̀ʉ. 5 Wo nyʉ́ʉ ndʉʉ, mə fùɔ ŋgʉʼʉ fɛ, yaʼkɛŋ mbɔ ɔ nyʉ́ʉ ndəŋ gyʉʉ ndə bə tʉʼ nyʉ́ʉ chɔ. 6 Wo fɔ̀ʼ mutɔ ndə ɔ fɔ̀ʼ shʉ́əshʉ́ə nɔ kie ndə məbɛ fəŋ wo ndə məyú ntɔŋmə. 7 Kwɔ̀ʼtə nubə ndə mɔ tʉʼ gìe tʉ a, bʉʼka Tiekətʉ bu súuhə tʉkə-a ndə məkínə nubə inchəŋ.

8 Kə́ kwɛ́nə Jiso Klai ndə ɔ kə kwú bə bʉ̀nə kóʼhə ɔŋ, bə nɔ kə bí ɔ kəlɔŋ-Fɔŋ-Dɛbi. Nɔ bɛ mbʉ ntəŋjyujyu nɔ ndə mɔ tʉʼ lɔ̀ʼ, 9 ndə mɔ tʉʼ nyíɛ ŋgʉəʼ nduɔ bʉʼka yɔ̄ŋ-yə tə bə kɔ́ʼtə mɔ nə bəchaŋ nə wo-bʉ̂ʼʉ nɔ. Bɔŋ bə chʉʼ kɔ́ʼtə ŋgieNyiikə fɛ. 10 Nɔ, mɔ nɔ lyʉ̀ʉtə́nə ndə nubə nchəŋnchəŋ bʉʼka bʉə ndə Nyii nɔʼ kə séʼ bɔŋ mbɔ mbəŋ-yʉə ghɔ chʉʼ leʼ kie ŋkwaa ndə i gwè tíŋ hə bɔ̌ŋ Klai Jiso ndə i bu gwè nə məgʉ́ə təmə liʼ-i ghɔ fɛ. 11 Nɔ bɛ ŋgie-shʉəŋ-kə nɔ ndə bəkɔ bə mɔ̀ʼfyii chɔ mbɔ,

Kaʼ bʉʼʉ nɔʼ kə kwú bʉ̂ʼʉ bɔŋ mɔʼɔ,

təmə bʉʼʉ bu kie məchímbi ghɔ bʉʼʉ bɔŋ mɔʼɔ.

12 Kaʼ bʉ̂ʼʉ lyʉ̀ʉtə́nə mu ŋgʉəʼ bʉʼʉ bɔŋ mɔʼɔ,

təmə bʉ̂ʼʉ bɔŋ bu sɔ́ʼ mɔʼɔ ghɔ.

Kaʼ bʉʼʉ tɛ́ŋ ɔŋ, ɔ tɛ́ŋ bʉʼʉ ghɔ.

13 Kaʼ bʉʼʉ gòʼ təmə kə́ chí mbi nə shʉəŋ fɛ, ɔ nɔ bɛ wo gìe shʉəŋ bʉʼka ɔ mə tɛ́ŋ ŋwɔŋ-ɛŋ fɛ.

Wo fɔ̀ʼ ndə Nyii bɛ́ŋ ɔŋ

14 Kwɛ́nə nubə-ɔ̄ŋ tʉ bɔŋ, bɔŋleʼ kàhə bɔŋ bəshʉ-Nyii mbɔ bɔ̂ŋ mə-kə́-mɔ̀ʼ chyuutə te ŋgiebə, ndə i mə kwáa nukə fɛ bɔŋ bɛ bə haʼ ndə məbʉ́əhə wo ndə ɔ̈ yʉ́. 15 Kɔ̀ɔtə shʉ́əshʉ́ə ndə məchìi ŋwɔŋ-aŋ Nyii nyíɛ aŋ ndə yʉʼ wofɔ̀ʼ, wo-fɔ̀ʼ ndə ɔ mə kie tʉvyiikə fɛ, wo ndə ɔ tʉʼ dàhə ŋgieNyiikə nə shʉəŋ jyujyu. 16 Kə a mə bɔŋ kɔ́ ŋwɔŋ-aŋ ndə kwə́ʼ kənjuɔnə ndə i gòʼ təmə kə́ kɔ́ kuŋhə tʉ Nyii bʉʼka bʉə ndə bɔ̂ŋ kwə́ʼ le bu bìʼ gɛ̀ nə shʉbə yɔ́ŋyɔ́ŋ ndə ntɛhə ndə i kɔ́ kuŋhə tʉ Nyii fɛ. 17 Ntɛ-bənu-hə-ɔ̄ŋ ndə baʼa ɔ tʉʼ dàhə nɔ, nɔ bu bɛ nə chóʼ ndə i kwó mbɔʼ-mbʉə wo. Bʉə bəbûu ndə bɔ̂ŋ nɔʼ dàhə ntɛ-bənu-hə-ɔ̄ŋ, nɔ bɛ Himənu ghɔŋ Filɛtu. 18 Bɔ̂ŋ nɔʼ mɔ̀ʼ fia shʉəŋ bɛ́ kə́ ghɔ̀ŋ mbɔ bʉə ndə bɔ̂ŋ kə kwú la nɔʼ bʉ̀nə kóʼtə kə́ byùutə bəbɛʼbʉə ndə bɔ̂ŋ nɔʼ mɔ̀ʼfyiihə-ʉə ndəŋ Nyii.

19 Nyii bɔŋ nɔʼ kə mɔ̀ʼ yiesê shʉ́əshʉ́ə ndə fɔkə mə nə ŋɛ̀hə fɛ. Bə nyɔ̀ʼ ŋgiebə-ɔ̄ŋ ndəŋ ghɔ, "Tiekətʉ nɔ kínə bʉə ndə bɛ yi-yə," bɔŋ, "Ẅotəmiyɔŋ ndə ɔ ghɔ̀ŋ mbɔ ɔ bɛ tʉ Tiekətʉ shìe liɛŋ-ɛŋ ndəŋ bʉ̂ʼʉ."

20 Mu njaa wo-kəfʉʼ, bəbaŋ ghɔŋbə kyʉʉtə nɔ bɛ chɔ ntɛntɛhə, bəbɛʼbə chyʉ́ʉ, bəbɛʼbəbaŋ ghɔŋbə kyʉʉtə bə kɔ́ŋ nə tyʉbə, bɔ́ŋ bəbɛʼbə nə ghɔŋkə. Bəbaŋ ghɔŋbə kyʉʉ-kyʉə-tə ndə chuɔŋtə-i chyʉ́ʉ, b̃ə nɔ chìi nubə nə yɔŋ haʼ ndə chîkwɛʼtəŋbə, bəbaŋ ghɔŋbə kyʉʉtə ndə bə kɔ́ŋkɔ́ŋ ghɔŋbə bi ndə bə bɔ́ŋbɔ́ŋ, bə kə́ chìi nubə nə yɔŋ bəchibəchi mu njaa. 21 Nɔ, bʉə ndə bɔ̂ŋ fyúhə ŋwɔŋtə-ʉə ndəŋ nu-bʉəbʉə-ghɔ̄bə inchəŋ, bu bɛ nə bəbaŋ ghɔŋbə kyʉʉ-kyʉə-tə ndə bə chìi nubə nə yɔŋ haʼ ndə chîkwɛʼtəŋbə bʉʼka bɔ̂ŋ nɔʼ kɔ́ ŋwɔŋtə-ʉə tʉ tiefɔʼ-yʉə ndə məfɔ̀ʼ tʉ ɔŋ, kə́ shʉ̀tə ŋwɔŋtə-ʉə ndə məfɔ̀ʼ ntɛ-fɔ̀ʼ-hə təmiyɔŋ ndə i bɛ jyujyu.

22 Nɔ, nyʉ́ʉ ntɔ-vâakəyɔwo-mə, gɛ̀ hə bɔ̌ŋ mə bɛ ndyʉndyʉ, mɔ̀ʼfyii-a ndəŋ Nyii, kie ŋkʉ̂ʉ leʼnə fyiighʉ́ənə biibə bʉə ndə bɔ̂ŋ tʉʼ lə̀ʼtə Tiekətʉ nə fyii tʉ́ʉnə.

23 Fyúhə ŋwɔŋ-aŋ ndə kwə́ʼ bənɔ̌ʼɔ ghɔŋbə bəŋʉʉ ndə i gòʼ təmə kie ndaa fɛ ndə i lìʼ haʼ nə chyuutə. 24 Bɔŋ vaafɔ̀ʼ Tiekətʉ kie ndə mə-kə́-mɔ̀ʼ chyuutə fɛ, ɔ bɔŋ kie ndə məkie buuŋjyu tʉ bʉə bənchəŋ, kie ndə məbɛ wo ndə bəkɔ ɔ dàhə, bɔŋ-kə́-leʼ yá fyii-i ndəŋ bʉə, 25 kə́ tʉ́ʼ bʉə ndə bɔ̂ŋ tʉʼ kʉ́ʉ ɔ nə ntɔŋntɔŋ nə mbuɔnəbə. Ndʉʉbɛʼ Nyii kɔ́ fia tʉ bɔŋ ndə məshìe liɛŋtə-ʉə ndəŋ bʉ̂ʼtə-ʉə kínə shʉəŋ. 26 Ndʉʉmɛ, bɔ̂ŋ bu bʉ̀nə ndə ndaahə-ʉə, nyʉ́ʉ ŋkʉʼ ndə Debulu nɔʼ fʉ̀ə tʉ bɔŋ, ndə ɔ kə yá bɔŋ, chìi bɔ̂ŋ kə́ yʉ́ chu-i.