1 Nɔ nyɔ̀ʼ Bɔɔ nyɔ̀ʼ ŋwɔʼnə-ɔ̄ŋ ndə mɔ bɛ lɔntəŋ-Klai Jiso ndə Nyii tə́ŋ mɔ ndə ŋkʉʉnə tʉʉ-i ndə məgɛ̀ shyíi bəbɛʼbʉə nə məchímbi ndə ɔ nɔʼ kɔ̀ʼnə tʉ bɔŋ mu Klai Jiso.

2 Mɔ nɔ tʉʼ nyɔ̀ʼ tʉ Timɔti ndə ɔ bɛ mbʉətə vaa-ɔŋ.

Tə Nyii mbʉ Tie ghɔŋbə Klai Jiso Tiekətʉ-yʉʼʉ dʉ̀ʼ buuŋjyu, tʉvyiikə leʼnə fyiighʉ́ənə tʉ bii.

3 Mɔ nɔ tʉʼ kɔ́ ndɔ tʉ Nyii ndə mɔ tʉʼ fɔ̀ʼ tʉ ɔŋ nə ŋkwɔʼtə tʉ́ʉnə, haʼ ndə bətietie-bɔŋ nə kə́ fɔ̀ʼ. Mɔ nɔ tʉʼ kɔ́ ndɔ ndə mɔ tʉʼ kwɛ́nə aŋ təvɛʼtəvɛʼ mu məghaaNyii-ɔŋ, ndʉʉnəchî ghɔŋbə ndʉʉbətyuʼ. 4 Ndʉʉ ndə mɔ kwɛ́nə shʉmə-a, mɔ kʉ̀ʉ ndə mənyíɛ aŋ mbɔ tʉʉ-ɔ chʉʼ bʉ̀ʉ gɛ̀ kùu.

5 Mɔ nɔ bíe kwɛ́nə məmɔʼfyii-a ndə a kə mɔ̀ʼ nə shʉəŋ ndəŋ Nyii, ntɛ fyii ndə cheche-a Loɛ ghɔŋ naa-aŋ Yuni nə kie, mɔ bɔŋ kínə mbɔ mbəŋ-aŋ nɔ kie nduɔ ghɔ. 6 Bʉʼka yɔ̄ŋ-yə, mɔ nɔ tʉʼ kwɛ́nə tʉ a mbɔ ä dyì kɔ-Nyii-kə ndə ɔ kə kɔ́ tʉ a ï kwii, ndə a kə kie ndʉʉ ndə mɔ kə mɔ̀ʼ ghɔkə-ɔŋ ndəŋ-aŋ gháaNyii tʉ a, 7 bʉʼka Lyʉʉhəkə ndə Nyii kə kɔ́ tʉ bʉʼʉ kaa Lyʉʉhə-kəfaa-kwu-kə fɛ. Bɔŋ L̃yʉʉhəkə-i nɔ kɔ́ ghʉəʼkə, kɔ́ ŋkʉ̂ʉ leʼnə məyá ŋwɔŋ. 8 Nɔ, kə tʉkə-a məvyíi ndə məkwə́ʼ tʉ bʉə te Tiekətʉ-yʉʼʉ fɛ təkɔmə mbəŋ-ɔŋ ndə mɔ bɛ chaŋ yie ɔ fɛ, ä bɔŋ nyíɛ ŋgʉəʼ bʉʼʉ mɔʼɔ bʉʼka ntəŋjyujyu, haʼ ndə Nyii kɔ́ ghʉəʼkə tʉ bii ndə məfɔ̀ʼ.

9 Ɔ nɔ nə kwáa bʉʼʉ, tíi bʉʼʉ ndə məbɛ ŋkʉʉ təmə bɛ bʉʼka fɔ̀ʼ ndə bʉʼʉ kə fɔ̀ʼ fɛ, bɔŋ nɔ nə bɛ bʉʼka yi-yə luu ghɔŋbə buuŋjyu. Ɔ nɔ nə kɔ́ buuŋjyu-ɔ̄ tʉ bʉʼʉ tíŋ hə bɔ̌ŋ Klai Jiso bəshʉbəshʉ mbi buŋ nə chʉ́ʉhə. 10 Bə bɔŋ nɔʼ kɛ̀ʼ nduɔ tʉ bʉʼʉ tíŋ hə bɔ̌ŋ Ŋkwaa-yʉʼʉ Klai Jiso ndə ɔ kə gwè kəwʉʉnəmbi. Ɔ nɔʼ lìʼ ghʉəʼ-kwú-kə bɔŋleʼ tíŋ hə bɔ̌ŋ ntəŋjyujyu-i, ɔ kɛ̀ʼ məchímbi tʉ bʉʼʉ ndə kwú leʼ bɛ chɔ fɛ. 11 Nyii nɔʼ dùʼhə mɔ ndə mə-kə́-lɔ̀ʼ ntəŋjyujyu-i bɔŋleʼ bɛ lɔntəŋ-ɛŋ leʼnə wo dàhə bənu-i.

12 Bɔŋ kə bɛ luu ndə mɔ tʉʼ nyíɛ ŋgʉəʼ ndə nubə-ɔ̄ŋ, təmə tʉkə-ɔŋ bɔŋ kə́ vyíi fɛ bʉʼka mɔ nɔ kínə wo ndə mɔ kə bɛ́ŋ ɔŋ fyii-mɔ, bɔŋ fyii-ɔ nɔ bɛ i tə́nə mbɔ ɔ bu yá fɔkə ndə ɔ nɔʼ kə kɔ́ tʉ mɔ* tʉ́ʼ, tə yɔ̂ŋ-ghɔ̄ nə dàa ndə Jiso bu nə bʉ̀nə gwè.

13 Yá ŋgie-shʉəŋ-bə ndə mɔ kə dàhə a nə yɔŋ, ï bɛ fʉʼkənu tʉ a ndə məlʉ̀ wukə chɔ, lyʉ̀ʉtə́nə ndəŋ məmɔ̀ʼfyii leʼnə ŋkʉ̂ʉ ndə bɛ yʉʼʉ-yə ndʉʉ ndə bʉʼʉbə Klai Jiso tùo bɛ fɔkə imɔʼ. 14 Yá nu-jyujyu-bə ndə bə kə kɔ́ tʉ a tʉ́ʼ, nə ghʉəʼ-kəLyʉʉhəNyii-kə ndə ɔ bɛ mu mbʉə-bʉʼʉ.

15 A le kínə mbɔ bʉə bənchəŋ mu Esia kə shìe liɛŋtə-ʉə tʉ mɔ, Figilu ghɔŋ Hɛmɔjini kə́ bɛ haʼ nuɔ ghɔ. 16 T̈iekətʉ dʉ̀ʼ buuŋjyu tʉ njaa Onisifɔlu bʉʼka ɔ nɔ kə́ yá fyii-ɔ vɛʼ buŋmbi. Tʉkə-i kə vyíi mbɔ mɔ kə bɛ wo-njaa-chaŋ fɛ. 17 Bɔŋ ndʉʉ ndə ɔ kə dàa Luŋ ɔ kɛŋ bíehə kʉ́ʉ mɔ, tə nyíɛ mɔ. 18 Tə Tiekətʉ kie tʉvyiikə tʉ ɔŋ Yɔ̂ŋ-ghɔ̄. A bɔŋleʼ kínə jyujyu te nchəŋnchəŋ təfɔʼ ndə ɔ kə fɔ̀ʼ tʉ mɔ vɛʼ ndə mɔ kə bɛ mu Ɛfɛso.