1 LyʉʉhəNyiikə nɔ gìe ntaa mbɔ, la kʉ̂ʉ bɛ ndə ndyiʼtə-mbi-kə nɔ, b̈əbɛʼbʉə fyúhə ŋwɔŋtə-ʉə ndəŋ məmɔʼfyiihə-ʉə ndəŋ Nyii, kɔ́ ŋwɔŋtə-ʉə ndə mə-kə́-yʉ́ hə kəghɔ lyʉʉhə-kəlɛɛŋ-bə leʼnə nubə ndə lyʉʉhəbʉəbʉəbə tʉʼ dàhə. 2 Nubə-ɔ̄ŋ nɔ tʉʼ dàhə bʉə-kəlɛɛŋhə ndə ŋkwɔʼtə-yʉə gòʼ təmə kə́ chɔ́ŋhə bɔŋ ndʉʉ ndə bɔ̂ŋ chìi bʉ̂ʼʉ fɛ, ndə məfə́ʼhə bʉə, 3 kə́ chíe bʉə ndə lɔŋ bɔŋleʼ kàhə mbɔ b̈ʉə mə kə́ yú ntɛ-bəfɔbɛʼ-hə fɛ. Bɔŋ nɔ kə chìi Nyii chìi mbʉ bəfɔ mbɔ bʉə ndə bɔ̂ŋ nɔʼ bɛ́ŋ bɔŋleʼ kínə shʉəŋ kə́ yú bɔŋleʼ kɔ́ ndɔ tʉ ɔŋ. 4 Bʉʼka fɔbə inchəŋ ndə Nyii chìi nɔ bʉ̀ʉ, wo kie ndə mətɛ́ŋ fɔkə ndə məyú, kaʼ ɔ nɔʼ kɔ́ ndɔ chɔ tʉ Nyii fɛ. 5 Bʉʼka ŋ̃gieNyiikə leʼnə məgháaNyii, nɔ chìi mbʉ bəfɔ ï bɛ tʉ́ʉnə shʉ-Nyii.

6 Kaʼ a dàhə nubə-ɔ̄ŋ tʉ bʉə ndə bɔ̂ŋ nɔʼ bɛ́ŋ Nyii, a bɛ yʉʼ vaafɔ̀ʼ Klai Jiso. A bɛ wo ndə ɔ nɔʼ yúʼ ŋwɔŋ-ɛŋ nə ŋgiekə ndə bʉə ndə bɔ̂ŋ mɔ̀ʼfyiihə-ʉə ndəŋ Nyii tə́nə chɔ ghɔŋbə yʉʼ-bənu-tə ndə bə nɔʼ dàhə ndə a nɔʼ gɛ̀ hə bɔ̌ŋ ghɔ. 7 Bɔŋ fyúhə ŋwɔŋ-aŋ ndə nduɔŋ-bəchəŋ-hə ndə bətietie-bii kə mɔ̀ʼ ndə i gòʼ təmə kə́ kwə́ʼ te Nyii fɛ, kə́ kwə́ʼ bənɔ̌ʼɔ, kɔ́ ŋwɔŋ-aŋ bə ndəŋ məyétə nubə ndə i bu chìi m̈əchimbi-a kə́ kɔ́ kuŋhə tʉ Nyii.

8 M̃əyɔ̀ʼtə ŋwɔŋ ndə məchìi mbʉə-a i shʉ́ətə nɔ kwáa, bɔŋ m̃əchímbi ndə ntɛ ndə i tʉʼ kɔ́ kuŋhə tʉ Nyii nɔ kwáa daa ndəŋ fia təmiyɔŋ bʉʼka i nɔ kie ŋkɔʼnə ndə i bu kwáa nduɔ ndə mbi-ɔ̄ ndə bʉʼʉ bɛ chɔ nduɔ nɔ, leʼnə mbi ndə i bu yi gwè. 9 Nɔ bɛ ŋgie-shʉəŋ-kə nɔ ndə bə kie ndə məbɛ́ŋ nə fyii inchəŋ. 10 Baʼa nɔ tʉʼ kɔ̀ɔtə bɔŋleʼ fɔ̀ʼ shʉ́əshʉ́ə bʉʼka baʼa nɔ yʉ́əʼnə ndəŋ Nyii ndə ɔ bɛ ghɔ, ndə ɔ bɛ Ŋkwaa-bʉə bənchəŋ, fɔŋ ɛŋ kə́ bɛ bʉə ndə bɔ̂ŋ nɔʼ bɛ́ŋ ɔŋ.

11 Mɔ̀ʼ tʉ̂ʼtə-ɔ̄ŋ bɔŋleʼ dàhə nubə-ɔ̄ŋ tʉ bɔŋ. 12 Kə a mə mɛ̀ʼtə wo dʉ̀ʉhə a mbɔ a bɛ vaambuɔ fɛ, bɔŋ dʉ̀ʼ wukə tʉ bʉə ndə bɔ̂ŋ nɔʼ bɛ́ŋ Nyii ndə ntɛ kwəʼ-a, ndə ntɛ nuʼ-a, ndə ŋkʉ̂ʉ, ndə məmɔʼfyii-a ndəŋ Nyii, ndə məkie ghɔ-tʉʉnə-kə ndə nubə inchəŋ. 13 Kɔ́ ŋwɔŋ-aŋ ndə mə-kə́-tíi ŋgieNyiikə mu bʉə, kə́ lɔ̀ʼ bɔŋleʼ kə́ dàhə, tə mɔ yi gwè.

14 Kə a mə wúɔŋhə kɔ-Nyii-kə ndə i bɛ mu mbʉə-a ndə a kə kie ndʉʉ ndə bʉəyʉkəŋgieNyii kə kwə́ʼ, bəntəŋbəshʉ chə̀ŋtə mɔ̀ʼ ghɔkə-ʉə ndəŋ aŋ gháaNyii tʉ a fɛ. 15 Kə́ fɔ̀ʼ nubə-ɔ̄ŋ, kɔ́ ŋwɔŋ-aŋ chɔ mbɔ bʉə bənchəŋ chʉʼ nyíɛ ndə a tʉʼ gɛ̀ nə shʉbə. 16 Kə́ kíi ŋwɔŋ-aŋ jyujyu leʼnə nubə ndə a tʉʼ dàhə. Kə́ fɔ̀ʼ nubə-ɔ̄ŋ gɛ̀gɛ̀, bʉʼka kaʼ a kə́ fɔ̀ʼ, a kwáa ŋwɔŋ-aŋ leʼnə bʉə ndə bɔ̂ŋ tʉʼ yʉ́ a.